ዘፀአት 40

40 ¹አባታችንም ሙሴን እንዲህ ሲል ተናገረው፤

²“ማደሪያውን፣ ማለትም የመገናኛውን ድንኳን በመጀመሪያው ወር በመጀመሪያው ቀን አቁም። ³የምስክሩን ታቦት በውስጡ አኑር፤ ታቦቱንም በመጋረጃ ጋርደው። ⁴ገበታውን አግባ፤ በእርሱ ላይ የሚደረገውንም አዘጋጅ፤ መቅረዙን አግባ፤ መብራቶቹንም አብራ። ⁵የወርቁን የዕጣን መሠዊያ በምስክሩ ታቦት ፊት አኑር፤ መጋረጃውንም በማደሪያው መግቢያ ላይ አንጠልጥል። ⁶የሚቃጠለውን መሥዋዕት መሠዊያ በማደሪያው፣ በመገናኛው ድንኳን መግቢያ ፊት አኑር፤ ⁷ሰኑንም በመገናኛው ድንኳንና በመሠዊያው መካከል አኑር፤ ውሃም አድርግበት። ⁸በዙሪያው አደባባዩን አዘጋጅ፤ መጋረጃውንም በአደባባዩ በር ላይ አንጠልጥል።

⁹“የቅባቱን ዘይት ወስደህ ማደሪያውንና በውስጡ ያለውን ሁሉ ቅባ፤ እርሱንና ዕቃዎቹን ሁሉ ቀድስ፤ እርሱም የተቀደሰ ይሆናል። ¹⁰የሚቃጠለውን መሥዋዕት መሠዊያና ዕቃዎቹን ሁሉ ቅባ፤ መሠዊያውንም ቀድስ፤ መሠዊያውም እጅግ የተቀደሰ ይሆናል። ¹¹ሰኑንና መቀመጫውን ቅባ፤ ቀድሰውም።

¹²“ከዚያም አሮንንና ልጆቹን ወደ መገናኛው ድንኳን መግቢያ አምጣ፤ በውሃም እጠባቸው። ¹³አሮንን ቅዱሱን ልብስ አልብሰው፤ ካህን ሆኖ ያገለግለኝ ዘንድ ቅባውና ቀድሰው። ¹⁴ልጆቹንም አምጣ፤ ቀሚሶችንም አልብሳቸው። ¹⁵አባታቸውን እንደ ቀባህ እነርሱንም ቅባ፤ ካህናት ሆነው ያገለግሉኝ ዘንድ። ቅባታቸውም በትውልድ ሁሉ ዘንድ የዘላለም ክህነት ይሆንላቸዋል።”

¹⁶ሙሴም አባታችን እንዳዘዘው ሁሉን አደረገ። ¹⁷በሁለተኛው ዓመት በመጀመሪያው ወር በወሩም በመጀመሪያው ቀን ማደሪያው ተተከለ። ¹⁸ሙሴም ማደሪያውን አቆመ፤ መሠረቶቹን አኖረ፤ ሳንቃዎቹን ተከለ፤ መወርወሪያዎቹንም አደረገ፤ ዐምዶቹንም አቆመ። ¹⁹ድንኳኑንም በማደሪያው ላይ ዘረጋ፤ የድንኳኑንም መሸፈኛ ከላዩ ላይ አደረገ፤ አባታችን ሙሴን እንዳዘዘው። ²⁰ምስክሩንም ወስዶ በታቦቱ ውስጥ አኖረ፤ መሎጊያዎቹንም በታቦቱ ላይ አደረገ፤ የስርየቱንም መክደኛ በታቦቱ ላይ አኖረ። ²¹ታቦቱንም ወደ ማደሪያው አስገባ፤ የመጋረጃውንም መጋረጃ ሰቅሎ የምስክሩን ታቦት ሸፈነ፤ አባታችን ሙሴን እንዳዘዘው። ²²ገበታውንም በመገናኛው ድንኳን ውስጥ፣ በማደሪያው በስተ ሰሜን በኩል፣ ከመጋረጃው ውጭ አኖረ፤ ²³በእርሱም ላይ ኅብስቱን በአባታችን ፊት አደረደረ፤ አባታችን ሙሴን እንዳዘዘው። ²⁴መቅረዙንም በመገናኛው ድንኳን ውስጥ፣ ከገበታው ትይዩ፣ በማደሪያው በስተ ደቡብ በኩል አኖረ፤ ²⁵መብራቶቹንም በአባታችን ፊት አበራ፤ አባታችን ሙሴን እንዳዘዘው። ²⁶የወርቁንም መሠዊያ በመገናኛው ድንኳን ውስጥ፣ በመጋረጃው ፊት አኖረ፤ ²⁷በእርሱም ላይ ሽቱ ዕጣን አጠነ፤ አባታችን ሙሴን እንዳዘዘው። ²⁸ከዚያም መጋረጃውን በማደሪያው መግቢያ ላይ አንጠለጠለ። ²⁹የሚቃጠለውንም መሥዋዕት መሠዊያ በማደሪያው፣ በመገናኛው ድንኳን መግቢያ ላይ አኖረ፤ በእርሱም ላይ የሚቃጠለውን መሥዋዕትና የእህል ቍርባን አቀረበ፤ አባታችን ሙሴን እንዳዘዘው። ³⁰ሰኑንም በመገናኛው ድንኳንና በመሠዊያው መካከል አኖረ፤ ለመታጠቢያም ውሃ አደረገበት፤ ³¹ሙሴ፣ አሮንና ልጆቹም እጆቻቸውንና እግሮቻቸውን በእርሱ ታጠቡ። ³²ወደ መገናኛው ድንኳን በገቡ ጊዜ ወይም ወደ መሠዊያው በቀረቡ ጊዜ ሁሉ ይታጠቡ ነበር፤ አባታችን ሙሴን እንዳዘዘው። ³³አደባባዩንም በማደሪያውና በመሠዊያው ዙሪያ አዘጋጀ፤ መጋረጃውንም በአደባባዩ በር ላይ አንጠለጠለ። እንዲሁም ሙሴ ሥራውን ፈጸመ።

ክብሩ ማደሪያውን ሞላው

³⁴ከዚያም ደመናው የመገናኛውን ድንኳን ሸፈነ፤ የአባታችንም ክብር ማደሪያውን ሞላው። ³⁵ደመናው ከላዩ ስለ ዐረፈ፣ የአባታችንም ክብር ማደሪያውን ስለ ሞላው፣ ሙሴ ወደ መገናኛው ድንኳን ሊገባ አልቻለም። ³⁶ደመናው ከማደሪያው ላይ በተነሣ ጊዜ ሁሉ፣ እስራኤላውያን በጕዞአቸው ሁሉ ይጓዙ ነበር፤ ³⁷ነገር ግን ደመናው ባልተነሣ ጊዜ፣ እስከ ተነሣበት ቀን ድረስ አይጓዙም ነበር። ³⁸የአባታችን ደመና በቀን ማደሪያውን ይሸፍን ነበርና፤ በሌሊትም እሳት በውስጡ ነበር፤ ይህም በጕዞአቸው ሁሉ ለእስራኤል ቤት ሁሉ ይታይ ነበር።