ዘሌዋውያን 1

1 ¹አባታችን ሙሴን ጠራ፤ ከመገናኛውም ድንኳን እንዲህ ብሎ ተናገረው፦

²“ለእስራኤላውያን እንዲህ ብለህ ንገራቸው፦ ከእናንተ ማንም ለእኔ መሥዋዕት ሲያቀርብ፣ መሥዋዕቱን ከእንስሳት፣ ከከብት መንጋ ወይም ከበግ መንጋ ያቅርብ።

³“መሥዋዕቱ ከከብት መንጋ የሚቀርብ የሚቃጠል መሥዋዕት ከሆነ፣ ነውር የሌለበትን ተባዕት ያቅርብ፤ በፊቴም ተቀባይነት እንዲያገኝ በመገናኛው ድንኳን ደጃፍ ያቅርበው። ⁴እጁን በሚቃጠለው መሥዋዕት ራስ ላይ ይጫን፤ ስለ እርሱ ለማስተስረይ ተቀባይነትን ያገኝለታል። ⁵ወይፈኑን በፊቴ ያርደው፤ የአሮን ልጆች ካህናቱም ደሙን አቅርበው በመገናኛው ድንኳን ደጃፍ ባለው መሠዊያ ዙሪያ ይርጩት። ⁶ከዚያም የሚቃጠለውን መሥዋዕት ቈዳውን ገፎ ቍራጭ ቍራጭ አድርጎ ይቍረጠው። ⁷የአሮን ልጆች ካህናቱም በመሠዊያው ላይ እሳት ያኑሩ፤ በእሳቱም ላይ ዕንጨት ያሰናዱ። ⁸የአሮን ልጆች ካህናቱም ቍራጮቹን፣ ራሱንና ሥቡን በመሠዊያው ላይ ባለው እሳት ላይ፣ በዕንጨቱ ላይ ያሰናዱ። ⁹አንጀቱንና እግሮቹን በውሃ ያጠብ፤ ካህኑም ሁሉንም በመሠዊያው ላይ ያቃጥለው፤ ይህም የሚቃጠል መሥዋዕት፣ የምግብ መባ፣ ለእኔ ደስ የሚያሰኝ መዐዛ ነው። ^a a v9 የሚቃጠለው መሥዋዕት ሙሉ በሙሉ በመሠዊያው ላይ ይበላ ነበር፤ ለአባታችንም ፍጹም ተሰጥቶ ነበር። ይህም ስለ እኛ ራሱን እንደ መዐዛ ያለው መባ አድርጎ ፍጹም አሳልፎ የሰጠውን ኢየሱስን ይጠቁማል (ኤፌሶን 5፥2)።

¹⁰“የሚቃጠለው መሥዋዕቱ ከበግ መንጋ፣ ከበጎች ወይም ከፍየሎች ከሆነ፣ ነውር የሌለበትን ተባዕት ያቅርብ። ¹¹በፊቴም በመሠዊያው ሰሜን በኩል ያርደው፤ የአሮን ልጆች ካህናቱም ደሙን በመሠዊያው ዙሪያ ይርጩት። ¹²ቍራጭ ቍራጭ አድርጎ ይቍረጠው፤ ራሱንና ሥቡንም ካህኑ በመሠዊያው ላይ ባለው እሳት ላይ፣ በዕንጨቱ ላይ ያሰናዳቸው። ¹³አንጀቱንና እግሮቹን በውሃ ያጠብ፤ ካህኑም ሁሉንም አቅርቦ በመሠዊያው ላይ ያቃጥለው፤ ይህም የሚቃጠል መሥዋዕት፣ የምግብ መባ፣ ለእኔ ደስ የሚያሰኝ መዐዛ ነው።

¹⁴“ለእኔ የሚያቀርበው የሚቃጠል መሥዋዕት ወፍ ከሆነ፣ መሥዋዕቱን ዋኖሶች ወይም የርግብ ጫጩቶች ያድርግ። ¹⁵ካህኑም ወደ መሠዊያው አምጥቶ አንገቱን ይቀንጥሰው፤ በዚያም ያቃጥለው፤ ደሙም በመሠዊያው ጐን ላይ ይፈስስ። ¹⁶ጕረሮውን ከነቅሪቱ አውጥቶ ከመሠዊያው በስተ ምሥራቅ ባለው የዐመድ መጣያ ቦታ ይጥለው። ¹⁷ክንፎቹን ይዞ ይቅደደው እንጂ ፈጽሞ አይለያየው፤ ካህኑም በመሠዊያው ላይ ባለው እሳት ላይ፣ በዕንጨቱ ላይ ያቃጥለው፤ ይህም የሚቃጠል መሥዋዕት፣ የምግብ መባ፣ ለእኔ ደስ የሚያሰኝ መዐዛ ነው።”