Tebu Ozüngtem
Küm mezüngnü ita mezüngbuba anogo nung mapa ajak azünga yu, temezütsü mezüa talidak nung yu, Aron aser pa jabasotem shitok aser süoshi semok. Idangji mepeti sentep süki nembang aser Tebu sentsüwangshi aji süngda tashi agi sünga Mosa ailatsü. Iba nungi aotsü, mepeti parnok aotsü anogo lemtet.
40 1Idangji Tebui Mosa dang ashi,
2“Mezüngbuba ita mezüngnü nung nai tekülemdak süki, sentep süki azünga yuang. 3Idakji Ozüng Süngden yuang, aser teyindangba sü agi süngdenji nembangang. 4Langbangji bena arung, iba oset tatongi shia yuang, milendong bena arung, aser iba milentem ataloka yuang. 5Ozüng Süngden jakdang hon liangmesen arongtsü tenladak yuang, aser tekülemdak süki kishi teyindangba sü yuang. 6Tekülemdak süki, sentep süki, kishi jakdang tarongba tenladak yuang, 7aser susaji sentep süki aser tenladak na tsüngda yuang, aser idakji tzü enokang. 8Kimalen meketa azünga yuang, aser kima kikümbang nung teyindangba sü sangzüa yuang.
9“Temezütsü totzüji benang aser tekülemdak süki aser idakji oset ajak mezüang; aji aser iba oset ajak meshitetang, aser aji temeshi alitsü. 10Tarongba tenladak aser idakji aliba oset ajak mezüang; tenladakji meshitetang, aser tenladak koba kanga temeshi alitsü. 11Susa aser iba tamentakdak mezüang, aser aji meshitetang.
12“Idangji Aron aser pa jabasotem sentep süki kishi dangi anir arung, aser tzü agi parnok shitokang. 13Pai putir mapa inyakdaktsütsü asoshi, Aron dak temeshi sobutsü semokjang, aser pa dak totzü mezüja meshitetang. 14Pa jabasotem anir arung; parnok dak semoksüji sobujang. 15Parnoki putir mapa inyakdaktsütsü asoshi, parnok tebu mezüba ama parnok dak mezüang. Parnok temezütsü parnok putusa putu asoshi teti putir mapa agütsü.”
16Tebui pa dang melaba ama Mosai ajak inyak. 17Tanabuba küm mezüngbuba ita mezüngnü nung tekülemdak sükiji azünga liasü. 18Mosai tekülemdak süki azüng: pai iba tesembangtsü ayu, iba süngtsük noktakdak, iba tarüdangtsü enok, aser iba tongshi azüng. 19Pai tekülemdak süki temalen süki alem aser iba manung iba temeyibangtsü nembang, Tebui Mosa dang melaba ama. 20Pai ozüngji bena arua süngden nung ayu, süngden nung süngra enok, aser süngden temalen taochi menden ayu. 21Pai süngdenji tekülemdak süki nung bener ai, teyindangba sü sangzüa, aser Ozüng Süngden nembang, Tebui Mosa dang melaba ama. 22Pai langbangji sentep süki nung, tekülemdak süki anüdoklentip, teyindangba sü taktang nung ayu, 23aser iba manung amtsükji Tebu madang tatongi shia ayu, Tebui Mosa dang melaba ama. 24Pai milendongji sentep süki nung, langbang tsütsülen, tekülemdak süki anüolentip ayu, 25aser milentemji Tebu madang ataloka ayu, Tebui Mosa dang melaba ama. 26Pai hon tenladakji sentep süki nung teyindangba sü jakdang ayu, 27aser iba manung teronem menemba liangmesen arong, Tebui Mosa dang melaba ama. 28Idangji pai tekülemdak süki kishi teyindangba sü sangzüa ayu. 29Pai tarongba tenladakji tekülemdak süki, sentep süki, kishi nung ayu, aser iba manung tarongba tenla aser chiyungtsü tenla agü, Tebui Mosa dang melaba ama. 30Pai susaji sentep süki aser tenladak na tsüngda yu, aser shitoktsü asoshi idakji tzü enok, 31aser iba tzü nungjagi Mosa, Aron, aser pa jabasotemi parnok teka aser tetsüng shitok. 32Kodangsa parnoki sentep süki-i aitdir mesüra tenladak anasa arudir, parnok shitok, Tebui Mosa dang melaba ama. 33Pai tekülemdak süki aser tenladak meketa kimalen azüng, aser kima kikümbang nung teyindangba sü sangzüa ayu. Anungji Mosai mapaji renem.
Pa Sentsüwangshii Tekülemdak Süki Sübang
34Idangji mepeti sentep süki nembang, aser Tebu sentsüwangshi tekülemdak süki sübang. 35Mosa sentep süki-i aitsü manüngtsü liasü, kechiaser iba manung mepet anen, aser Tebu sentsüwangshi tekülemdak süki sübang. 36Kodangsa mepetji tekülemdak süki temalen nungi akongdir, Israel chirtemi pei lenmang balala nung apusotsü; 37saka mepetji makong, aji akong anogo tashi parnoki mapusotsü. 38Kechiaser anüngdang Tebu mepetji tekülemdak süki temalen liasü, aser aonung iba manung mi liasü, aji Israel kidong ajaki pei lenmang ajak nung angu.