Kuzila kudya kwa kyedika yi kwikama dya kyedika
Batu ba Beteli bátuma bayakala mu kuhyula keti bafweti landa mu kuzila kudya. Kyufu kyavutudulu: mimvula makumi tsambwadi mya kuzila kudya myákala kikuma kya bawu-bawu, ka kikuma kya Tata wetu ku. Mana kalomba mu munwa wa bambikudi ba theti yákala mukanu wa masonga wa kyedika, buweti, amana kukonda kusuna mufwidi, mwana wakondi tata, munzenza, keti nsukami.
Tata wetu kisi zonza mu mavese 5–6, 9–10, 13–14
7 1Muna mvula ya kaya ya kinga Dariusi, ndinga ya Tata wetu yakwísa kwena Zakadiya, muna kilumbu kya kaya kya ngonda ya vwa, disongidila Kisilevi. 2Batu ba Beteli bátuma Salesele yi Legemi-meleki yi bayakala ba bawu, mu kulomba khenda za Tata wetu, 3amana mu kuhyula banganga Nzambi ba nzu ya Tata mukwa ngolu zoosu, yi bambikudi: «Mbati fwani dila yi zila kudya muna ngonda ya tanu, bwosu yisi hanga mu mimvula myami mya lawu?»
4Amana ndinga ya Tata mukwa ngolu zoosu yakwísa kwena meni:
5Zimbwala kwena batu boosu ba tsi yi kwena banganga Nzambi: Tangwa lwázila kudya yi lwadíla khondu muna ngonda ya tanu yi ya tsambwadi, muna mvula makumi tsambwadi mama, bwa kyedika ni kikuma kya meni lwázila kudya? a a v5 Kuzila kudya kwa ngonda ya tanu kwákala mu kutebukila moyu kuyoka kwa Babiloni nzu ya Nzambi ya Solomo; kuzila kudya kwa ngonda ya tsambwadi kwákala mu kutebukila moyu kuhondisa kwa Ngedaliya, pfumu wa tsuka wa Yuteya. 6Tangwa lwisi dya yi lwisi nwa, kinga ni kikuma kya benu-benu lwisi dila yi nwa?
7Kinga ni mana ma ndinga mana Tata wetu kásamuna mu munwa wa bambikudi ba theti, tangwa Yelusalemi yi mbanza za binzunga byandi byákala nangina yi mu ngemba, amana Negevi yi tsi ya mongu myákala yi batu bazingila?
8Amana ndinga ya Tata wetu yakwísa kwena Zakadiya:
9Bwabu buna kazimbudi Tata mukwa ngolu zoosu: Zengenu mukanu wa masonga wa kyedika; songilenu buweti yi kyadi benu yi benu. 10Lusunaku mufwidi, bana bakondi tata, munzenza, keti phutu; amana lukasaku mafwongu ma mbi benu yi benu muna mbundu zenu.
11Kaasi bábwisa mu kuyuka, bávutula makunda ma bawu ni mbundu za tadi, amana baziki matu ma bawu ndangu bayukaku. 12Básya mbundu za bawu zakala zangolu hanga tadi dya ngolu, mu kubwisa mu kuyuka mitsiku yi ndinga mana Tata mukwa ngolu zoosu kátuma mu Kitembu kyandi mu munwa wa bambikudi ba theti. Bwabuna khabu ya lawu yátuka kwena Tata mukwa ngolu zoosu.
13«Bwosu yábatela amana bázolaku kuyuka, phila mosi tangwa bántela, meni phi ngazolaku kuyuka,» buna kazimbudi Tata mukwa ngolu zoosu. 14Yábamwangisa ni pfunzi ya ngolu muna makanda moosu mana bázayaku. Tsi yásala zumbu ku manima ma bawu, konda mutu wisi hyoka, wisi kwisa keti wisi kwenda. Bwabu buna bákitula tsi ya kitoku yakítuka zumbu.
