Sekariah 7

7 ¹Ní ọdún kẹrin ọba Dariusi, ọ̀rọ̀ Baba wa tọ Sekariah wá ní ọjọ́ kẹrin oṣù kẹsàn-án, èyí tí í ṣe Kislefu. ²Àwọn ènìyàn Beteli rán Sareseri àti Regemu-meleki àti àwọn ọkùnrin wọn láti bẹ̀bẹ̀ fún ojú rere Baba wa, ³àti láti béèrè lọ́wọ́ àwọn àlùfáà ilé Baba àwọn ọmọ ogun ọ̀run, àti lọ́wọ́ àwọn wòlíì pé, “Ǹjẹ́ kí èmi kí ó sọkún kí ó sì gbààwẹ̀ ní oṣù karùn-ún, gẹ́gẹ́ bí mo ti ń ṣe ní ọ̀pọ̀lọpọ̀ ọdún wọ̀nyí?”

⁴Nígbà náà ni ọ̀rọ̀ Baba àwọn ọmọ ogun ọ̀run tọ̀ mí wá pé:

⁵Sọ fún gbogbo ènìyàn ilẹ̀ náà àti fún àwọn àlùfáà pé: Nígbà tí ẹ gbààwẹ̀ tí ẹ sì ṣọ̀fọ̀ ní oṣù karùn-ún àti ní oṣù keje ní àádọ́rin ọdún wọ̀nyí, ṣé èmi gan-an ni ẹ gbààwẹ̀ fún? ^a a v5 Àwẹ̀ oṣù karùn-ún jẹ́ ìrántí bí Babeli ti sun tẹmpili Solomoni; àwẹ̀ oṣù keje jẹ́ ìrántí bí a ti pa Gedaliah, baálẹ̀ ìkẹyìn Juda. ⁶Nígbà tí ẹ bá jẹ tí ẹ sì mu, ṣé kì í ṣe fún ara yín ni ẹ ń jẹ tí ẹ sì ń mu?

⁷Ǹjẹ́ kì í ṣe àwọn ọ̀rọ̀ wọ̀nyí gan-an ni Baba wa ti kéde láti ẹnu àwọn wòlíì ìṣáájú, nígbà tí Jerusalemu àti àwọn ìlú tí ó yí i ká wà ní ìdúró àti ní àlàáfíà, tí a sì ń gbé Negefu àti àwọn ẹsẹ̀ òkè pẹ̀lú?

⁸Ọ̀rọ̀ Baba wa sì tọ Sekariah wá pé:

⁹Ohun tí Baba àwọn ọmọ ogun ọ̀run wí nìyí: Ẹ ṣe ìdájọ́ òtítọ́; ẹ fi inú rere àti àánú hàn sí ara yín lẹ́nì kìíní-kejì. ¹⁰Ẹ má ṣe ni opó lára, tàbí aláìníbaba, tàbí àjèjì, tàbí tálákà; ẹ má sì ṣe gbèrò ibi sí ara yín lọ́kàn yín.

¹¹Ṣùgbọ́n wọ́n kọ̀ láti gbọ́, wọ́n fi orí kunkun yí ẹ̀yìn wọn padà, wọ́n sì di etí wọn kí wọn má bàa gbọ́. ¹²Wọ́n sọ ọkàn wọn di líle bí òkúta tó. Wọ́n kọ̀ láti gbọ́ òfin àti àwọn ọ̀rọ̀ tí Baba àwọn ọmọ ogun ọ̀run ti rán nípasẹ̀ Ẹ̀mí rẹ̀ láti ẹnu àwọn wòlíì ìṣáájú. Nítorí náà ìbínú ńlá ti ọ̀dọ̀ Baba àwọn ọmọ ogun ọ̀run wá.

¹³“Gẹ́gẹ́ bí mo ti pè tí wọn kò sì fẹ́ gbọ́, bẹ́ẹ̀ gẹ́gẹ́ ni nígbà tí wọ́n pè, èmi kò sì fẹ́ gbọ́,” ni Baba àwọn ọmọ ogun ọ̀run wí. ¹⁴Mo tú wọn ká pẹ̀lú ìjì líle sí àárín gbogbo àwọn orílẹ̀-èdè tí wọn kò mọ̀. Ilẹ̀ náà sì dahoro lẹ́yìn wọn, tí kò sí ẹni tí ó ń gba ibẹ̀ kọjá, tí ń lọ tàbí tí ń bọ̀. Báyìí ni wọ́n ṣe sọ ilẹ̀ dídára di aṣálẹ̀ ahoro.