ዘካርያስ 7 FHB Father's Heart Bible™

7 ¹ኣብ ራብዐይቲ ዓመት ንጉስ ዳርዮስ፥ ብራብዐይቲ መዓልቲ ናይታ ታሽዐይቲ ወርሒ፥ ማለት ኪስሌው፥ ቃል ኣቦና ናብ ዘካርያስ መፅአ። ²ሰብ ቤቴል ድማ ንሳሬፀርን ንሬገምሜሌክን ንሰባቶምን፥ ሞገስ ኣቦና ክልምኑ ለኣኹ፥ ³ነቶም ካህናት ቤት ኣቦ ሰራዊት ሰማይን ነቶም ነቢያትን ድማ፦ “ከምቲ ኣብዝ ብዙሕ ዓመታት ዝገበርክዎ፥ ብሓምሻይ ወርሒ ክበኪን ክፆምንዶ?” ኢሎም ክሓትቱ ለኣኹ።

⁴ሽዑ ቃል ኣቦ ሰራዊት ሰማይ ናባይ መፅአ፦

⁵ንዅሎም ህዝቢ እታ ምድርን ነቶም ካህናትን በሎም፦ በዝ ሰብዓ ዓመት ብሓምሻይን ብሻብዓይን ወርሒ ክትፆሙን ክትሓዝኑን እንተለኹም፥ ብሓቂዶ ንኣይ ኢልኩም ፆምኩም? ^a a v5 እቲ ናይ ሓምሻይ ወርሒ ፆም፥ ባቢሎን ንቤተ መቕደስ ሰሎሞን ዘንደደትሉ ዝዝክር ነበረ፤ እቲ ናይ ሻብዓይ ወርሒ ፆም ከዓ፥ ናይ ጎዶልያስ፥ እቲ ናይ ይሁዳ ዳሕራዋይ ሹም፥ ምቕታል ዝዝክር ነበረ። ⁶ክትበልዑን ክትሰትዩን እንተለኹም፥ ንነፍስኹምዶ ኢልኩም ኣይኮንኩምን እትበልዑን እትሰትዩን?

⁷እዚኣቶምዶ እቶም ኢየሩሳሌምን እተን ኣብ ዙርያኣ ዘለዋ ኸተማታትን ተቐሚጠን ኣብ ሰላም ኣብ ዝነበረሉ፥ ደቡብን ቈላታትን ከዓ ሰብ ዝነበረለን ኣብ ዝነበረሉ ጊዜ፥ ኣቦና ብቐዳሞት ነቢያት ዘወጆም ቃላት ኣይኮኑን?

⁸ቃል ኣቦና ድማ ናብ ዘካርያስ መፅአ፦

⁹ኣቦ ሰራዊት ሰማይ ከምዙይ ይብል፦ ናይ ሓቂ ፍትሒ ፍረዱ፤ ነንሕድሕድኩም ድማ ሕያዋይነትን ርህራሀን ኣርእዩ። ¹⁰ንመበለትን ንደኽታምን ንስደተኛን ንድኻን ኣይትግፍዑ፤ ነንሕድሕድኩም ድማ ኣብ ልብኹም ክፉእ ኣይትሕሰቡ።

¹¹ንሳቶም ግና ምስማዕ ኣበዩ፤ ተረርቲ ኾይኖም ድማ ዝባኖም መለሱ፤ ከይሰምዑ ኸዓ ኣእዛኖም ዓፀዉ። ¹²ልቦም ከም ፅንፅልሒት ኣትረሩ፤ ነቲ ሕጊ፥ ነቲ ኣቦ ሰራዊት ሰማይ ብመንፈሱ ብቐዳሞት ነቢያት ዝለኣኾ ቃላት ከዓ ምስማዕ ኣበዩ። ስለዙይ ካብ ኣቦ ሰራዊት ሰማይ ዓብዪ ቍጥዓ መፅአ።

¹³“ከምቲ ኣነ ዝፀዋዕኹ ንሳቶም ግና ዘይሰምዑ፥ ከምኡ ኸዓ ንሳቶም ምስ ፀውዑ ኣነ ኣይሰማዕኹን” ይብል ኣቦ ሰራዊት ሰማይ። ¹⁴ናብቶም ዘይፈለጥዎም ኵሎም ህዝብታት ብንፋስ ኣውሎ ፋሕ ኣበልክዎም። እታ ምድሪ ድማ፥ ዝመፅእ ወይ ዝኸይድ ሓላፊ ሓደ እኳ ዘይብላ፥ ብድሕሪኦም ባደመት። በዝ ኸምዙይ ነታ ባህ እተብል ምድሪ ዑና ገበርዋ።