ዘካርያስ 7

7 ¹በንጉሥ ዳርዮስ በአራተኛው ዓመት፣ በዘጠነኛው ወር ኪስልዩ በተባለው በአራተኛው ቀን የአባታችን ቃል ወደ ዘካርያስ መጣ። ²የቤቴል ሰዎች የአባታችንን ሞገስ ለመለመን ሳራዛርንና ሬጌሜሌክን ከሰዎቻቸው ጋር ላኩ፤ ³የሰማይ ሠራዊት አባት ቤት ካህናትንና ነቢያትን እንዲህ ብለው ይጠይቁ ዘንድ ነበር፤ “በእነዚህ ብዙ ዓመታት እንዳደረግሁት በአምስተኛው ወር ላልቅስና ልጹም ይገባኛልን?”

⁴ከዚያም የሰማይ ሠራዊት አባት ቃል ወደ እኔ መጣ፤

⁵ለምድሪቱ ሕዝብ ሁሉና ለካህናቱ እንዲህ በላቸው፤ በእነዚህ ሰባ ዓመታት በአምስተኛውና በሰባተኛው ወር በጾማችሁና ባለቀሳችሁ ጊዜ፣ በእውነት የጾማችሁት ለእኔ ነበርን? ^a a v5 የአምስተኛው ወር ጾም ባቢሎን የሰሎሞንን ቤተ መቅደስ ማቃጠሉን ለማሰብ ነበር፤ የሰባተኛው ወር ጾም ደግሞ የይሁዳ የመጨረሻው ገዥ ጎዶልያስ መገደሉን ለማሰብ ነበር። ⁶በበላችሁና በጠጣችሁ ጊዜ፣ የበላችሁትና የጠጣችሁት ለራሳችሁ አይደለምን?

⁷ኢየሩሳሌምና በዙሪያዋ ያሉ ከተሞች ተቀምጠውና ሰላም ኖሯቸው፣ ኔጌብና ቈላው ሰው ይኖርበት በነበረ ጊዜ፣ አባታችን በቀደሙት ነቢያት በኩል ያወጀው ይኸው ቃል አይደለምን?

⁸የአባታችንም ቃል ወደ ዘካርያስ መጣ፤

⁹የሰማይ ሠራዊት አባት እንዲህ ይላል፤ እውነተኛ ፍርድ ፍረዱ፤ እርስ በርሳችሁ ቸርነትንና ርኅራኄን አሳዩ። ¹⁰መበለቲቱን፣ አባት የሌለውን፣ መጻተኛውን ወይም ድኻውን አትበድሉ፤ እርስ በርሳችሁም በልባችሁ ክፉ አታስቡ።

¹¹እነርሱ ግን ለመስማት እምቢ አሉ፤ በግትርነት ጀርባቸውን መለሱ፤ እንዳይሰሙም ጆሮአቸውን ደፈኑ። ¹²ልባቸውንም እንደ አለት አጠጠሩ፤ ሕጉንና የሰማይ ሠራዊት አባት በመንፈሱ በቀደሙት ነቢያት በኩል የላከውን ቃል ለመስማት እምቢ አሉ። ስለዚህ ከሰማይ ሠራዊት አባት ዘንድ ታላቅ ቍጣ መጣ።

¹³“እኔ በጠራሁ ጊዜ እነርሱ ለመስማት እንዳልፈለጉ፣ እንዲሁ እነርሱ በጠሩ ጊዜ እኔ ለመስማት አልፈለግሁም” ይላል የሰማይ ሠራዊት አባት። ¹⁴ባላወቋቸው አሕዛብ ሁሉ መካከል በዐውሎ ነፋስ በተንኋቸው። ምድሪቱም ከኋላቸው ማንም የማይመላለስባት፣ የሚመጣና የሚሄድ የሌለባት ባድማ ሆና ቀረች። የተወደደችውን ምድር ባድማ ያደረጓት እንዲህ ነው።