Kakhum Shungkahai, Ning Katong Shungkahai
Bethelna ithumna zā khumda kachap chi sāshokra mangākha da hokhavai mi chihoi. Kakhapo chi ngalatkaia: kum hangshini zā kakhum chi athumwui vangna, Ithumwui Avāwui vang maningmana. Ana khareiwui marānbing mangā eina kapo chi khamashung bichar, lumashanthei, kala ra̱meinao, avāva̱ makhalei, kha̱mi kala lah kachāmali marekhareka khavaina.
7 1Awunga Dariuswui mungda zingkum khamateli, kachāng kachiko Chislevwui zimiksho khamatethang, ithumwui Avāwui tui Zechariahli rāhānga. 2Bethelwui mibingna Sharezer, Regem-melech kala athumwui mibingli, ithumwui Avāwui lukhamashan po khavai chihovāhaowa, 3kala saikorawui Avāwui shimli khalei pāngmonbing kala marānbingli hithāda ngahān khavai, "Zingkum kachungkha hi ina sākahai thāda, kachāng kaphangāli ina chapngachāda kakhum sāpairakhala?"
4Chiwui thili saikorawui Avāwui tui china ili rāhānga:
5Ngaleiwui mi saikora kala pāngmonbingli hānglu: Zingkum hangshini hi, kachāng kaphangā kala kashineli nathumna kakhum eina chapngachai tharan, chi mashungda iwui vang eina nathumna kakhum sākahaila? a a v5 Kachāng kaphangāwui kakhum china Babylonna Solomonwui khorumshim sa̱kahai phaningun khavaina; kachāng kashinewui kakhum china Judahwui atungthota khamunga Gedaliahli shaothatkahai phaningun khavaina. 6Nathumna kazā eina kazang tharan, chi nathum khalatta vang eina nathumna zā mang sākahai maningmala?
7Jerusalem kala chiwui kuikhamareili khalei keinungbing kapam eina chingrihai leilakha, kala Negeb kala Shephelahli mibing kapam leilakha tharan, ithumwui Avāna marān kharebingwui mangā eina hāshok kahai tui china hi maningmala?
8Kala ithumwui Avāwui tui Zechariahli rāhānga:
9Saikorawui Avāna hithāda hānga: Shungkahai bichar sālu; akha eina akhali lukhamashan kala ningshi chitheilu. 10Ra̱meinao, avāva̱ makhalei, kha̱mi, lah kachāma mibingli marekharek masālu; kala nathumwui ningli akha eina akhali makaphā sākhavai khangarān masaalu.
11Kha athumna nganā khavai mamayāmana, ngakaishilak eina khanuk ngareithuihaida, kala mashā khavai athumwui khanā khaluihaowa. 12Athumna khalattawui ning lunggui thāda makang ngasaka, saikorawui Avāna awui Manglā eina marān kharebingwui mangā eina chihovā kahai ain kala tui chi manganā khavai mamayāmana. Chiwui vang eina saikorawui Avāwui eina malungvāt haklak rāhaowa.
13"Ina hohaira kha athumna manganāmana; chithāda, athumna hoi tharan ina manganāsāmana," da saikorawui Avāna hānga. 14Ina athumli sur eina athumna matheikasa miyur saikorawui alungli kashamyāng ngasaka. Athumwui khanukli ngalei chi ngachakyānghaida, mi khipākha rārā kala kasā maleimana. Chithāda athumna leishiri kahai ngalei chi ramcho ngasaka.
