சகரியா 7

7 ¹தரியு ராஜாவின் நான்காம் ஆண்டிலே, ஒன்பதாம் மாதமாகிய கிஸ்லேயு மாதத்தின் நான்காம் நாளிலே, எங்கள் பிதாவின் வார்த்தை சகரியாவுக்கு உண்டாயிற்று. ²எங்கள் பிதாவின் தயவை மன்றாடிக் கேட்கும்படி, பெத்தேல் ஊரார் சரேத்சேரையும் ரெகெம்மெலேகையும் அவர்களுடைய மனுஷரையும் அனுப்பினார்கள்; ³பரலோக சேனைகளின் பிதாவினுடைய ஆலயத்தின் ஆசாரியர்களையும் தீர்க்கதரிசிகளையும் நோக்கி, “நான் இத்தனை வருஷமாய்ச் செய்துவந்ததுபோல, ஐந்தாம் மாதத்திலே அழுது, என்னைப் பிரித்து உபவாசம் பண்ணவேண்டுமோ?” என்று கேட்கும்படி அனுப்பினார்கள்.

⁴அப்பொழுது பரலோக சேனைகளின் பிதாவின் வார்த்தை எனக்கு உண்டாயிற்று:

⁵தேசத்தினுடைய சகல ஜனங்களையும் ஆசாரியர்களையும் நோக்கி நீ சொல்லவேண்டியது என்னவென்றால்: இந்த எழுபது வருஷமாக நீங்கள் ஐந்தாம் மாதத்திலும் ஏழாம் மாதத்திலும் உபவாசம்பண்ணி துக்கங்கொண்டாடினபோது, நீங்கள் உண்மையாய் எனக்கென்று உபவாசம்பண்ணினீர்களா? ^a a v5 ஐந்தாம் மாத உபவாசம் பாபிலோன் சாலொமோனின் ஆலயத்தை எரித்ததை நினைவுகூர்ந்தது; ஏழாம் மாத உபவாசம் யூதாவின் கடைசி அதிபதியாகிய கெதலியாவின் கொலையை நினைவுகூர்ந்தது. ⁶நீங்கள் புசிக்கிறபோதும் குடிக்கிறபோதும், உங்களுக்கென்றல்லவோ நீங்கள் புசித்துக் குடிக்கிறீர்கள்?

⁷எருசலேமும் அதைச் சுற்றியிருந்த பட்டணங்களும் குடியேற்றப்பட்டு சமாதானமாயிருந்தபோதும், தென்தேசமும் சமபூமியும் குடியேற்றப்பட்டிருந்தபோதும், எங்கள் பிதா முந்தின தீர்க்கதரிசிகள் மூலமாய்ச் சொன்ன வார்த்தைகள் இவைகள்தானல்லவா?

⁸மேலும் எங்கள் பிதாவின் வார்த்தை சகரியாவுக்கு உண்டாயிற்று:

⁹பரலோக சேனைகளின் பிதா சொல்லுகிறது என்னவென்றால்: உண்மையான நியாயத்தீர்ப்புச் செய்யுங்கள்; அவனவன் தன் சகோதரனுக்குத் தயவும் இரக்கமும் காட்டுங்கள். ¹⁰விதவையையும் திக்கற்ற பிள்ளையையும் பரதேசியையும் ஏழையையும் ஒடுக்காதேயுங்கள்; ஒருவரும் தன் சகோதரனுக்கு விரோதமாய்த் தன் இருதயத்திலே தீங்கு நினையாதேயுங்கள்.

¹¹ஆனாலும் அவர்கள் செவிகொடுக்க மனதில்லாமல், முரண்டாய்த் தங்கள் முதுகைத் திருப்பி, கேளாதபடிக்குத் தங்கள் காதுகளை அடைத்துக்கொண்டார்கள். ¹²பரலோக சேனைகளின் பிதா தமது ஆவியினாலே முந்தின தீர்க்கதரிசிகள் மூலமாய் அனுப்பின வேதப்பிரமாணத்தையும் வார்த்தைகளையும் கேளாதபடிக்கு, அவர்கள் தங்கள் இருதயத்தை வைரக்கல்லைப்போலக் கடினப்படுத்திக்கொண்டார்கள். ஆகையால் பரலோக சேனைகளின் பிதாவினிடத்திலிருந்து மகா கோபம் உண்டாயிற்று.

¹³“நான் கூப்பிட்டபோது அவர்கள் கேளாமற்போனதுபோல, அவர்கள் கூப்பிட்டபோது நானும் கேளாதேபோனேன்” என்று பரலோக சேனைகளின் பிதா சொல்லுகிறார். ¹⁴அவர்கள் அறியாத எல்லா ஜாதிகளுக்குள்ளும் நான் அவர்களைப் பெருங்காற்றினால் சிதறடித்தேன். அவர்களுக்குப் பின்னாக அந்த தேசம் பாழாய் விடப்பட்டது; போக்கும் வரத்துமாய்க் கடந்துபோகிறவன் ஒருவனும் இல்லாமற்போனான். இப்படியாக அவர்கள் அந்த இன்பமான தேசத்தைப் பாழ்நிலமாக்கினார்கள்.