Maimaitham Nyengbü, Maimaitham Maanglembü
Bethelei mühei nyengbü asühko kila sai dogo phela shanga müt shuong hautikei. Ngüh kho sepeian lenkei: po anjinlei kanei nyengkei kho kaneibü shanga ong, seneibü Bou shanga aying. Shangiedbü thuseibü shuong danko haoei lamkei kho maimaitham matjem, onou, hoba latnyu, bou akibü, yenbou ayingsi shalebü to himou akuma kikei.
7 1Choba Dariuseibü po leiboubüa, Chisak lit, kho lit güboubü chalou leiboubüa, Boueibü ngüh kho Zekharia jungto loukei. 2Hobaje Bethelbü mütshuongei Bou thedanga onou lamla shanga, Sharezer, Rekem-melek hoba haoen yoa kibü müt shuong hautikei, 3hoba Lakjaibü dan Bou chemeibü ungshedbü shuong hoba thuseibü shuong to phekei, “Ho po juong khei ngei kümbü tegü, ngei lit ngaoboubüa mühei nyengko haapla sai?”
4Hobaje Lakjaibü dan Boueibü ngüh kü jungto loukei:
5Kaodak mütshuong pendou hoba ungshedbü shuong to lenashi: Ho po anjinlei khei, lit ngaoboubü hoba nyetboubüa kanei nyengkei hoba mang haapbei kho, tükde ngo shanga kanei nyengbü sai? a a v5 Lit ngaoboubü nyengbü kho Babilonbüei Solomoneibü lembü chem wanei leilubü kho damenla shanga kikei; lit nyetboubü nyengbü kho Jihudabü thonlabü leiyeibou Gedalia haitibü kho damenla shanga kikei. 6Hoba ladang kanei shaula yungla, kho kan jembü shanga shaubü yungbü aying lo?
7Ladang Jerusalem hoba kho kaijembo kibü sangnyu shuong settian sangmaia kikei, hoba Negeb si pholi kaodak mütei nyaka kikei, kho jihsiphaia Bouei shangiedbü thuseibü shuong danko laubü ngüh habü aying lo?
8Hobaje Boueibü ngüh kho Zekharia jungto loukei:
9Lakjaibü dan Bouei hai lauda: Ngühmai matjem kümashi; cheei che to sanou hoba onou lenashi. 10Latnyu, bou akibü, yenbou ayingsi shalebü teshitekoe; hoba kaneibü maangpona cheei che khulimbo amaibü huon tetak.
11Lausikei haoenei ditla kausakkei, kaangkhühtham phai sepeian ngaikei, hoba aditda shanga haoeneibü nou khuilepbei. 12Haoenei haoeneibü maangpon laang akbü tegü kaangkhühtham yeitikei, Lakjaibü dan Bouei haoeibü Soushou danko shangiedbü thuseibü shuong danko hautibü ngühkhüm hoba ngüh shuong ditla kausakkei. Kheijinei Lakjaibü dan Boueibü khau yaangbü longkei.
13“Ngei ngaan haoenei aditbü tegü, haoenei ngalaje ngei adit,” dogo Lakjaibü dan Bouei lauda. 14Hoba ngei haoen leian anglabü jih tegü, haoenei achühbü phangshuong pendou yoto lintikei. Kaonyek kho haoen phainei sangliphang la yeitikei, aoeikei danjung alouda ayingsi ahauda. Kho khei haoenei chühsebü maibü kaonyek phetsen kaodak la yeitikei.
