Kailong Lei Meimeijung Haukei
Kailong lei kaodak pendou thüka Bunyubou shanga kaodak to meimeijung haula louko ki. Kheijinei satentibü shuongeibü hon ka khulou che kümkei hoba Joshua khua phokukei, Bhek kho chühletko, aoei seneibü Bou chem dangkulabü hoba sangle setshang si thükkabü penyi sangmaia kutilabü.
6 1Ngo toukei limchühsi, shongh nyi kanglanga kailong lei meimeijung louko hapbei, hoba khübü shongh kho chinam shongh kikei. 2Shaangbü kailonga saklangbü koli shuong kikei, hoba nyiboubü kailonga ngao shaubü koli shuong kikei, 3semboubü kailonga laang angbü koli shuong, hoba leiboubü kailonga pujung longbü koli shuong kikei—khübü pendou sekoktham kikei. 4Kheijinei ngei ngo yoa joyoko kitoua khuthük hangangbü to phekei, “Ngeibü bunyu, habü ho ai ki?”
5Khuthük hangangbüei jongaikei, “Habü ho khuthük yei lei ki, kaodak pendou thüka Bunyubou thedanga loan kibü ka meimeijung haubü. 6Ngao shaubü koli kibü kailong kho chanep kaodak to hauda, laang angbü koli kho khübü phainei hauda, hoba pujung longbü koli kho chaangbou phei kaodak to hauda. 7Sekokbü koli shuong meimeijung haukei, hoba kaodaka paila aeibou maang kubei; hobaje haoei laukei, ‘Hauashi, kaodaka paiashi!’ Hibü haoenei kaodaka paikei.”
8Kheijinei haoei ngo ngaan laukei, “Chühashi, chanep kaodak to haubü shuongei chanep kaodaka ngeibü Soushou hakso kukei.” a a v8 “Ngeibü Soushou hakso kukei” dogo laubü kho, Mühghaüei chanep khulimbo matdakbü maangangbü—chanep kho Israelbü maanga songbou shuong loubü yam ki—tou jembü phoa dogo lauda.
Semlühei Haoeibü Chem Danglabü
9Kheijinei seneibü Bou ngüh kü jungto loukei:
10“Langsenbü shuong Heldai, Tobija hoba Jedaia, Babilon ka loubü, ka lembü kho leashi, hoba khünyettham Zefania shou Josiaeibü chem to hauashi. 11Chandinam hoba hon kho leashi, khun che kümashi, hoba kho thükkabou ungshedbou Jehozadak shou Joshuaeibü khua hankushi.’ 12Hao to lenshi: Thükenbou Bouei hai lauda: ‘Chühashi, Semlüh nyenan müt ao ki; haoei haoeibü kishang ka alilabü hoba seneibü Bou chem danglabü. 13Haoei seneibü Bou chem danglabü, hoba soneikangbü lenglabü, hoba haoeibü Choba setshanga setan songdaklabü. Haoei haoeibü Choba setshanga ungshedbou che kilabü, hoba sangmai paplepbüei lamshau nyi kho chela shenyotilabü. b b v13 Hanei müt che kho Choba setshanga Choba hoba ungshedbou nyitham ong ki—kho Israela songbou aoei ongkei kila lele akitei. Ho Jisu to chühko lauda, haoei mütpemei Choba hoba ungshedbou lamshau shenyoda, hoba hao yoa nyi kanglanga sangmai jembotham longa kia. 14Khun kho Heldai, Tobija, Jedaia, hoba Zefania shou Hen shanga damanchühlabü tegü seneibü Bou chema longlabü. 15Saabüa kibü shuongei loan seneibü Bou chem danglabü, hoba Thükenbou Bouei ngo kan jungto hautikei dogo kanei ngelabü. Kanei haujembo hao ngüha dialonga ho loushadlabü.’”
