Kateiyetap Daudi agobo Yetunet
Shigaion ne po Daudi, ne ki tyenji Kwandanyo agobo Kush, Benjaminindet.
Kingo iweche Kush benjaminindet, yosye Daudi ng'atuutyet: ngot ki arepi chorwennyu yaityet, ingoluul punyondennyu anee eng' temburyek. Soomei Kwandanyi, Kirwoogindet ne cheeng'ei mugulelwek, kole iyai, ak keere kiptengeginik kobut regereiywot ne kagichop icheegei.
7 1Ee Kwandanyu, amang'u eng' inyee; isarwo eng' che asubi anee tugul, ak isarwo, 2si mata kobach anee ko uu ng'etundo, kobach anee kotagogoik, ma mi ne sarwo. 3Ee Kwandanyu, ngot ka ayai niito—ngot komi ne ma po iman eng' eunnyu, 4ngot ka ageerchini chiito ne kaalyan ak anee ne yaityet, anan ka aluul punyondennyu puch, 5ingosup anyun punyondennyu anee ak koname anee, ak koiyany saboondanyu ng'wony ak konde toroornatennyu eng' temburyek.
6Ng'eet, Kwandanyu, eng' angeeng'ung'; ng'eetyi nereegek che po puunikyuk; ng'eetu agobo anee—ki ing'at kirwooget. 7Ingotuiyo pororyosyek koriikyi inyee; itebee parak icheek eng' ng'echereeng'ung'. 8Irwookyin Kwandanyo pororyosyek. Irwookyinwo, Kwandanyu, ko uu imandanyu ak ko uu lititindo ne mi anee. 9Ingobata yaityetap kiptengeginik, ago tiia che po iman—inyee ne cheeng'ei mindilileen ak mugulelwek, ee Kwandanyu ne po imanda. 10Long'ennyu ko Kwandanyu, ne sarei che po iman eng' muguleldo. 11Kwandanyo ko kirwoogindet ne po iman, Kamuktaindet ne angen peetuusyek tugul. 12Ngot koma sigu chii age tugul, ngalit Kwandanyo rotwennyi; kaging'us kwangennyi ak kochop. 13Kaachop kariikyik che po meet; yaei kipchabonikyik koek che lalei maat. 14Keero, kagomanach kiptengeginindet ne yaityet; manach nyalilda ak kosich ng'aleek che ma iman. 15Pal keriinget ak koteposyo, ago kobutyi keriinget ne kaayai. 16Weekyigei nyalildanyi eng' metinnyi; ak kobutyi koroomnateennyi eng' metinnyi ineegei. 17Agoochi Kwandanyu kongoi agobo imandanyi, ak atyenji kalasunoik kainetap Kwandanyu, ne Toroor Miising'.