David pora bachao nimite kanda

David laga ekta shiggaion, juntu tai Benjamin jati laga Cush laga bisoy te amar Pitri usor te gaise.

Benjamin laga Cush pora dosh diya somoi, David kosom khai: jodi tai ekjon bondhu ke beya pora badla dise, tente tai laga dushman taike dhula te gosi dibi. Tai laga Pitri, jun Bisar Kora Jon ase aru mon khan bisare, Taike kam koribole mange, aru hinsa kora manuh khan nijor laga gaat te giri juwa tu dikhe.

Adhyay 7.

He moi laga Pitri, Apuni te moi suki loi ase; moi ke khedi thaka sob pora moi ke bacha bi, aru moi ke udhar koribi, nahole tai singho nisina moi ke phatai dibo, bacha-bole kun bhi nai, moi ke tukra tukra kori dibo. He moi laga Pitri, jodi moi eitu korise—jodi moi laga hath te golti ase, jodi moi laga sathi ke biya pora badla dise, nahole bina karone moi laga dushman ke lut korise, titia dushman pora moi ke khedi kene dhori lobi, tai moi laga jivon ke matite chipai dibi aru moi laga sonman ke dhula te rakhi dibi.

Uthibi, moi laga Pitri, Apuni laga khong te; moi laga dushman khan laga rage birodh te uthibi; moi karne jagibi—Apuni bisar niyom thik kori dise. manuh khan laga sabha Apuni laga age te joma hobo dibi; tarkhan uporte uporte Apuni bohi bi. amar Pitri pora manuh khan ke bisar kore. Moi laga dharmikota hisab te aru moi bhitor te thaka imandari hisab te moi ke nyay koribi, moi laga Pitri. biya manuh khan laga dusToi ke khotom koribi, kintu dharmik khan ke thik rakhibi— mon aru hridoy bisari thaka Apuni, He dharmik Pitri. Moi laga dhal to moi laga Pitri ase, kun hridoy te sidha thaka khan ke bachai. amar Pitri ekjon dharmik bisar-korta ase, hodai din khong uthi thaka ekjon Isor ase. jodi kun bhi mon nabodli le, amar Pitri Tar talwar dhar koribo; Tai Tar dhanu tani kene taiyar kori rakhise. Tai Tar morai diya hathiyar khan taiyar korise; Tai Tar tir khan ke juli thaka tir bonai. sabi, biya manuh kineka biya pora bhorta hoi kene ase; tai digdar pet te loi kene misa ke jonom diye. tai gata khundi kene khali kore, kintu tai nije bonaise gata bhitor te girise. tai laga digdar tai nijor matha te wapas ahe; tai laga julum tai nijor matha laga hardi te niche name. Moi moi laga Pitri ke Tar dharmikota karne dhanyavaad dibo, aru Sobse Uporte thaka moi laga Pitri laga nam ke prosansa git gabo.