Salmo 7

7 ¹O akong Amahan, kanimo ako modangop; luwasa ako gikan sa tanang naggukod kanako, ug tabangi ako, ²kay tingali kuniskunison niya ako sama sa liyon, gision-gison ako nga walay bisan kinsa nga moluwas. ³O akong Amahan, kon nabuhat ko kini—kon adunay sayop sa akong mga kamot, ⁴kon gibalsan ko ang akong kaabin ug daotan, o gikawatan ang akong kaaway nga walay hinungdan, ⁵nan pagukda ako sa kaaway ug apson ako, tumbi niya ang akong kinabuhi ngadto sa yuta ug ibutang ang akong dungog sa abog.

⁶Bangon, akong Amahan, diha sa imong kasuko; barog batok sa kapungot sa akong mga kaaway; pagmata alang kanako—gitakda mo ang paghukom. ⁷Patiguma ang katilingban sa katawhan libot kanimo; lingkod sa kahitas-an ibabaw kanila. ⁸Ang atong Amahan nagahukom sa katawhan. Pakamatarunga ako, akong Amahan, sumala sa akong pagkamatarong ug sumala sa kaligdong nga ania kanako. ⁹Tapusa ang pagkadaotan sa mga daotan, apan tabangi ang mga matarong—ikaw nga nagasusi sa mga hunahuna ug mga kasingkasing, O matarong nga Amahan. ¹⁰Ang akong taming mao ang akong Amahan, nga nagaluwas sa mga matul-id ug kasingkasing. ¹¹Ang atong Amahan maoy usa ka matarong nga maghuhukom, usa ka Dios nga nasuko matag adlaw. ¹²Kon adunay dili maghinulsol, bairon sa atong Amahan ang iyang espada; gibinat na niya ang iyang pana ug giandam kini. ¹³Giandam na niya ang iyang makamatay nga mga hinagiban; gihimo niyang nagdilaab ang iyang mga udyong. ¹⁴Tan-awa, ang daotang tawo mabdos sa pagkadaotan; nanamkon siya ug kasamok ug nanganak ug mga bakak. ¹⁵Nagkalot siyag gahong ug gipalalom kini, apan nahulog siya sa bangag nga iyang gihimo. ¹⁶Ang iyang kasamok mobalik sa iyang kaugalingong ulo; ang iyang kabangis mokunsad sa iyang kaugalingong bagolbagol. ¹⁷Magpasalamat ako sa akong Amahan tungod sa iyang pagkamatarong, ug mag-awit ako ug pagdayeg sa ngalan sa akong Amahan, ang Labing Halangdon.