Kindanda kya Tavidi mu Kulomba Luhulusu
Shigayoni ya Tavidi, yina kayímbila kwena Tata wetu kikuma kya Kushi, mukwa Benyami.
Mu kufundisama ni Kushi mu-Benyamini, Tavidi wisi dya ndefi: yuka ni wáfuta nduku wandi ni mbi, buna mbeni wandi kamudyatikisa ha mufututu. Wisi lomba Tata wandi, Zusi wuna wisi sanda mbundu, kahanga dyambu, amana wisi tala bakwa kingolu-ngolu bisi bwa mu wanda ya bawu meni.
7 1A Tata wama, mwena ngeyi yiswamini; wumphulula kwena babana boosu bisi ndanda, amana wuntabula, 2ndangu kanguyatulaku hanga khosi, kanguzengaku bitini-bitini, konda mutu wa kuhulula. 3A Tata wama, yuka ni yísala dyadi—yuka ni mbi yenina mu moku mama, 4yuka ni yáfuta nduku wama ni mbi, holo yábotula mbeni wama konda kikuma, 5buna mbeni kandanda, kangubwila, kadyatikisa luzingu lwama ha tsi, amana kasya luzitu lwama mu mufututu.
6Telama, A Tata wama, mu khabu zaku; telama mu kunwanisa khabu za bambeni bama; tokama kikuma kyama—ngeyi wáyadika pfundusu. 7Kimvuka kya makanda kikutakana, kikuzingila; zakala ha kiti kyaku ku zulu ha thandu ya bawu. 8Tata wetu wisi fundisa makanda. Wunzengila, A Tata wama, bwosu buna masonga mama yi bwosu buna kyedika kyenina mwena meni. 9Fwasa mbi ya batu ba mbi, kaasi singika batu ba masonga—ngeyi wuna wisi sanda mabanza yi mbundu, A Tata wa masonga. 10Kibalaka kyama kenina Tata wama, wuna wisi hulula basungama mu mbundu. 11Tata wetu kenina zusi dya masonga, Nzambi wuna wisi funga khabu mu bilumbu byosu. 12Yuka ni mutu kabalumunaku mbundu, Tata wetu kalóla mbedi yandi ya phoku; wábonga buta bwandi amana wáyidika. 13Wáyidika binwaninu byandi bisi honda; wákhitula phunza zandi mu masoka ma mbawu. 14Tala buna mutu wa mbi kenina yi vumu dya mbi; wisi yimita kiwayi amana wisi buta luvunu. 15Wásima dibulu amana wadíkulumuna, kaasi wábwa mu dibulu dina kásima. 16Kiwayi kyandi kivutuka ha thandu ya ntu wandi; kingolu-ngolu kyandi kituluka ha thandu ya kibelengenzi kyandi. 17Yihána thandu kwena Tata wama kikuma kya masonga mandi, amana yiyímbila mikunga mya lukumu mu khumbu ya Tata wama, Wuna Wuluti Zulu.
