Hawara Dawid ji bo rizgariyê
Şîgayona Dawid, ku wî li ser Kûşê Binyamînî ji Bavê me re got.
Kûşê Binyamînî ew tawanbar kiriye, û Dawid sond dixwe: heke wî xerabî li hevalekî vegerandibe, bila dijminê wî ew di nav axê de pêpes bike. Ew ji Bavê xwe, dadwerê ku dilan dikole, dixwaze ku tiştekî bike, û dibîne ku zordar dikevin çala xwe bi xwe.
7 1Ya Bavê min, ez xwe davêjim bextê te; min ji hemû kesên ku li pey min dikevin xilas bike û min rizgar bike, 2da ku ew mîna şêr min neqetîne, min perçe perçe neke, bêyî ku kes min rizgar bike. 3Ya Bavê min, heke min ev kiribe— heke neheqî li destên min hebe, 4heke min li hevalbendê xwe xerabî vegerandibe, an bêsedem dijminê xwe talan kiribe, 5bila dijmin li pey min bikeve û min bigire, bila jiyana min li erdê pêpes bike û rûmeta min bixe nav axê.
6Ya Bavê min, bi xezeba xwe rabe; li dijî hêrsa dijminên min rabe; ji bo min hişyar bibe—te dadwerî diyar kiriye. 7Bila civata gelan li dora te kom bibe; li bilindahiyê, li ser wan, rûne. 8Bavê me dadweriya gelan dike. Ya Bavê min, li gorî rastiya min û li gorî durustiya ku di min de ye, heqê min bide. 9Xerabiya neheqan bi dawî bîne, lê rastan xurt bike—tu yê ku hiş û dilan diceribînî, ya Bavê rast. 10Mertalê min Bavê min e, yê ku dilrastan xilas dike. 11Bavê me dadwerekî rast e, Xwedayekî ku her roj hêrs dibe. 12Heke kesek tobe neke, Bavê me wê şûrê xwe tûj bike; wî kevanê xwe kişandiye û amade kiriye. 13Wî çekên xwe yên kujer amade kirine; ew tîrên xwe dike tîrên agirîn. 14Binêre, mirovê neheq çawa bi xerabiyê ducanî ye; ew bi tengahiyê bihemle dibe û derewan tîne dinyayê. 15Ew çalekê dikole û kûr dike, lê dikeve wê çala ku wî çêkiriye. 16Tengahiya wî li serê wî bi xwe vedigere; zordariya wî datê ser qoqa serê wî bi xwe. 17Ezê ji ber rastiya wî ji Bavê xwe re şikir bikim, û ezê ji navê Bavê xwe, Yê Herî Bilind re stranên pesnê bistrêm.
