Laa 7

7 ¹O iwui Avā, kaja ina nali ngayinkhui; ili kharomabing saikorawui eina ili kahuimilu, kala ili kanshokmilu, ²maningakha khipānakha ili kankhame maleila, ana kazingkha̱ thāda ili amarimrim sātāda ngalāra. ³O iwui Avā, ina hi sāhaiakha— iwui pāngli khayon leiakha, ⁴iwui khamashitpali makaphā eina athut khuiakha, lah maram maleila iwui yangkasheli ngaponkhuiakha, ⁵chithākha yangkashena ili kharomda ili ngaphankhuiranu, ana iwui mirin ngaleili naikazamranu, kala iwui khayā chifali haimiranu.

⁶Ngakarthuilu, O iwui Avā, nawui malungkhavātli; iwui yangkashebingwui malungkhavātli ngasungmilu; iwui vang ngakarthuilu, kaja nana bichar chi ngarān kahaina. ⁷miyurbingwui kazip chi nali kuimareida pamranu; athumwuitungli atungshong napam pamlu. ⁸Ithumwui Avāna mibingli bichar sāra. O iwui Avā, iwui khamashung khangarong athishurda, kala iwuklungli khalei ningsākhangazip athishurda ili mashun hāngsangmilu. ⁹makhayābingwui makaphā chi shimān ngasakmilu, kha khamashungabing chi khāngkhaningmilu, O ning kala wuklung kaphā khamashunga iwui Avā. ¹⁰Iwui chāngvei chi iwui Avāna, ana wuklung khangatarbingli huimi. ¹¹Ithumwui Avā chi khamashunga bichar kasā akhana, thangkachida malungvāt kaji Vare akhana. ¹²Khipānakha maningngateiakha, ithumwui Avāna awui raighai kharākhuira; ana awui malā hunda ngarān kahaina. ¹³Ana awui thikapai raisāri ngarān kahaina; awui malāthing chi meirikakā sāngasaka. ¹⁴Yanglu, makhayā mi chi makaphā eina nao vaihaira; ana kalākashi chungkasang kakapik pharai. ¹⁵Ana chom chuida ngathānphunga, kha ana sākahai akhurli tāzanga. ¹⁶Awui kalākashi awui khalattawui akuili tāngasakluira; kala awui khangama̱ awui akuira̱li tāzanga. ¹⁷Ina iwui Avāli awui khamashung khangarongwui vang ningshira, kala ina Juikhamatai iwui Avāwui mingli masot laa sāra.