Nawui Ming Kayākha Khayā Kākhala
Laa sākasābingwui khararpali: Gittith athishurda. Davidwui laa akha.
Ngayāwui kazingram yangda, psalm kapia china kachāng kala sirābing sākahaiana kathāda mi kateowa hibingli phaningmi khala da ngahāna. Ngahānkhami chiya mibing kahak kaji maningmana, kha ithumwui Avāna athumli tekhamatei eina kuihonna ngahaimi kala awui otsakbing athumwui pāngli mi kajina.
8 1O ithumwui Proho Avā, nawui ming okathui saikorali kayākha khayā kākhala! Nawui tekhamatei nana kazingram atungshong haihaira. 2Angangnaobing eina na̱ zākasā naoshinaobingwui khamor eina, nawui yangkashebingwui vang, yangkashe eina athut hāngsangki kajipali ngasām ngasak khavai, nana pangshap semkāhaira. 3Ina nawui kazingrambing yangda tharan, nawui pāngmarengwui otsak, kachāng eina sirābing nana haimi kahai chi, 4Mikumo hi khida, nana awui vang phaningmi kahai, miwui naomayara hili nana sakta khuimikhala? a a v4 Hebrews lairik kapia mina tui hibing hi Jishuwui maramli hānghaowa — miwui Naomayara, atam kasha̱khawui vang kazingraobingli nemmeida sākahai, chieina tekhamatei kala khayākakā eina kuihon sāda ngahonmi kahai chi (Hebrews 2:6-9). 5Chithālala, nana ali kazingli khaleibingli kateokha nemmeida sākhui, kala tekhamatei eina khayā eina kuihonna ngahaimi. 6Nawui pāng eina sākahai saikorawuitungli nana ali mung ngasakhaira; ot saikora awui pheizingli nana hamsang ngasakhaira: 7yao eina mukkā saikora, kala khararwui sāyurbing, 8khamasaiwui vānaobing, kala shamadruwui khaibing, shamadruwui shongfa peichaoda kazata saikora. 9O ithumwui Proho Avā, nawui ming okathui saikorali kayākha khayā kākhala!
