Konyitot Ano Kaineng'ung'
Agobo kiptaiyatap musik: ko uu Gittith. Tyenwetap Daudi.
Keeri kipsengwet ne po kemeut, teebe tyendoindet kole amu nee si imindilil Kwandanyo chemegilyo che ming'in ko uu chuto, inyee ne kigochop arawet ak kecheik. Wolutyet ko ma kole ooen piik, ago ko kilaachi Kwandanyo icheek kurgetap toroornatet ak koitchi icheek poisyosyennyi.
8 1Ee Kwandanyo ne Kiptaiyat, konyitot ano kaineng'ung' eng' ng'wony komugul! Ki inde liilindang'ung' barak eng' kipsengwet. 2Eng' kutusweegap lagok ak lakweet che chuchuni, ki igimiit kimnateet, agobo puuniguk, si iger kutitap puunyoot ak ne yaaktoi korotiik. 3Ye akeer kipsengweng'ung', poisyetap morik, arawet ak kecheik che ki inde inyee, 4Nee kimugulmet si imindilil icheek, nee weeriitap chii si iriip ineendet? a a v4 Konde chairindetap Baruutap Hebrew ng'aleechu agobo Jeso — Weeriitap chii ne ki kiyai koek ne rektoot kosiir malaikaik eng' sait ne ming'in, yeityo kiilachi kurgeetap liilindo ak teegisto (Hebrew 2:6-9). 5Ago ki iyai inyee koek ne rektoot eng' tutik kosiir lugosyegap kipsengwet, ak kilaachi kurgeetap toroornatet ak teegisto. 6Ki igoochi inyee pounatet agobo poisyosyegap euneguk; ki inde tuguuk tugul eng' ng'wony keelyekyik: 7keechiirek tugul ak eiik, ak kobooto tyong'ik che po timiin, 8toriitigap kipsengwet, ak njireenigap nyanjet, kiit age tugul ne siirtoi eng' ortinwegap nyanjosyek. 9Ee Kwandanyo ne Kiptaiyat, konyitot ano kaineng'ung' eng' ng'wony komugul!