Chaiyāng Kahai Kuisamwui Machut
Ana tangkhong eina akuiphung kala khamuyāng yaikhui kala kakuiwui eina akuimu ngakhui, akuimu akha thumwui akha kachida tākhui, tangkhong eina sākhui, eisai kathansho sākhui, khangachao sākhui kala ram hi kakhangkhavai sākhui. Ithumwui Avāna hanga, ramnao kachida kaphungli kahaisho Jerusalemna athum khui eina hakmi raonghangkhui.
5 1"Na, miwui naomayara, kazana raighai akha kuisighai thāda khuilaga, nakui kala namorhāli sitālu. Chieina sheron khuilaga kuisam ngayarlu. 2Kuinam atam kupra tharan, kathumwui akha keinung alungli mei eina riktālu. Kathum akha khuilaga, keinung kuimareida raighai eina shaolu. Kathum akha masi apam kachida chaiyāngmilu, kala ina athumwui thili raighai thairāra. 3Kala chibingwui eina kateokha khuilaga, nakachonwui aphili khalaptithailu. 4Chibing eina kaikhana latluida khuilaga, meili sa̱talu, kala chi alungli riktālu. Chi eina meina Israelwui shim saikorali ngayaovāra.'"
5Proho Avāna hithāda hānga: Hi Jerusalem hina. Ina ali yurbingwui alungthungli chipamhaira, kala akuimareida ngaleibing lei. 6Kha china yurbing eina khangui khalāngda iwui bicharli ngakaishi, kala akuimareida ngaleibing eina reimeida iwui shiyanli ngakaishi; kaja athumna iwui bichar khalanhaida, iwui shiyan mamayonmana.
7Chiwui vang Proho Avāna hānga: "Khikhalajila na nakuimareida yurbing eina reimeida ngakaishida, iwui shiyanli mazatthuda, iwui bichar mamayonthuwa, nakuimareida yurbingwui bichar athishurdala mazatmana, 8chiwui vang eina Proho Avāna hānga: 'Yanglu, ina I khalatta nawuitungli leira, kala yurbingwui miktāli nawui alungli bichar sāra. 9Nawui ningkakachai ot saikorawui vang eina, ina nawui alungli chikathā sāra. Chi ina teokhana masākahaina, kala latluida masāluimara. 10Chiwui vang eina, nawui alungli anina anaongarā zāra, kala naongarābingna ani zāra. Nawuitungli ina bichar sāda, nawui kataibing saikora masi apam kachida chaiyāngmira.'
11"Ina ringki chi kachangkhata, Proho Avāna hānga, khikhalajila nana iwui katharapam nawui mayangkhangai ot kala ningkakachai otsak saikora eina makhao ngasakhaira, ina I khalattala nawui eina khanuk sa̱na̱unga; khipālikha mashivāmla, kala lumashan khavai maleimara. 12'Nawui kathum akha nawui alungli kazātkashi lah chāmreina thira; kathum akha nakuimareida raighai eina pitāra; kathum akha ina masi apam kachida chaiyāngmira, kala raighai thairāda athumli kharomra.'
13"Chitharan iwui malungkhavāt vaira, kala iwui malungkhavāt athumwuitungli ungshungmira, kala ina ringphā samphangra. Ina athumwuitungli iwui malungkhavāt tāvaihai tharan, ina, athumwui Avā, iwui ningkatongna hānghaira da athumna theikhuira.
14"Ina nali kānthui kachiva̱ saikorawui miktāli nakuimareida yurbingwui ngachaili kashimān kala maikashi ngasakra. 15Ina malungvāt, malungkhavāt, kala malung kasā kharāk eina nawuitungli bichar sāra tharan, na nakuimareida yurbingli maikashi kala thānkhangui, hāngmathin kala khangachee-khangachā ngasāra. Ina, nawui Avā, hānghaira. 16Nali sāshimān khavai chihovā kahai chāmreiwui khangachee-khangachā malā ina nawuitungli thairā tharan, chāmrei kachungkha phāsangmira, kala nawui kashakazā katathaira. 17Nawuitungli chāmrei kala luili khalei sāyurbing ina chihovāra; athumna nali naokashum ngasakra. Kazātkashi kala ashee nawui alungli ngaruivāra, kala ina nawuitungli raighai chihovāra. Ina, nawui Avā, hānghaira.'"
