Ezekiel 4

4 ¹"Na, miwui naomayara, chek akha khuilu, nawui mangāli chipamlu, kala chitungli Jerusalem keinung akha sākhuilu. ²Chi kuinamhaolu: chiwui mangāli raipan sākāshānda, chiwui mangāli ngalei thongkāda, chiwui mangāli rāmrah vasāda, kala chi kuimareida khamor chipamlu. ³Mari khāng akha khuilu; kala chi na eina keinung chiwui ngachaili mari phākho thāda chipamlu. Chishong ngareivālu; chi kuinam ngasāra, kala nana chili kuinamhaora. Hi Israelwui shimkhurwui vang machut akhana.

⁴"Na, nawui uishongli ngayaipi, kala Israelwui shimkhurwui khayonkhamāng chitungli chipamlu. Chitungli napi zimiksho peida, nana athumwui khayonkhamāng phungra. ⁵Kaja ina athumwui khayonkhamāng zingkum chi zimiksho 390 thāda nawuili ngateihaira; chieina nana Israelwui shimkhurwui khayonkhamāng phungra.

⁶"Hibing nana kupra tharan, latluida nawui yashongli ngayaipi, kala Judahwui shimkhurwui khayonkhamāng zimiksho hangmati phungra; ina nawuili zingkum akhawui vang zimiksho akha ngateihaira. ⁷Jerusalemwui kuinamshong ngareivāda, nawui pāngthei chitheihaida, kala chiwuitungli makhamayā tui marānlu. ⁸Yanglu, ina nali seipeng eina khalaphaora, chieina nawui kuinamwui zimiksho chi nana kupranglakha eina tangda, na akhashong eina khangateishongli ngalan masāpaimara.

⁹"Kehu, nāpai, māngatai, marongthei, millet, kala tharāthei khuilu; chibing ham akhali chipamda, chi eina khamui sālu. Nawui shong napi zimiksho 390 peida chi shailu. ¹⁰Nana shai kashakazā chi thangkachida shekel maga̱ kharit tama khuilu; kachitheihai atamli shailu. ¹¹Thangkachida lik akha ngarakkhami tara̱ manglu; kachitheihai atamli manglu. ¹²Mikumowui apai eina mibingwui miktāli nailaga, chi nāpai khamui thāda shailu." ¹³Kala ithumwui Avāna hānga, "Chithāda Israelnaobingna, ina athumli khuithui kahai yurbingwui ngachaili, athumwui khamui makathar eina zāra."

¹⁴Chieina ina hānga, "Aha, Proho Avā! Ina I khalattali makathar masākakā kahaina. I nganuilakha eina thuida ara eina tangda, khalatta thipai lah sāyurna shaothat kahai ot akhala mashairanu kahaina, kala ningkakachai asā akhala ikhamorli mazangrā kahaina."

¹⁵Ana ili hānga, "Yanglu, nawui khamui hang khavai mikumowui apaiwui mahutli simuk apai khuiphung khavai ina nawuili chipenhaira."

¹⁶Ana ili hānga, "Miwui naomayara, yanglu, ina Jerusalemli khamuiwui khāmshui chi sātekmira. Athumna khamui kharit tama malungkharing eina zāra, kala tara̱ ngarakkhami eina chihuiran eina mangra, ¹⁷kaja khamui kala tara̱ khavāt ngasāra. Athumna khangachee-khangachāna eina akha eina akha yangngarokta, kala athumwui khayonkhamāngli shimānhaora."