ሕዝቅኤል 4

4 ¹“አንተ የሰው ልጅ ሆይ፣ ጡብ ወስደህ በፊትህ አኑረው፤ በላዩም ከተማይቱን፣ ኢየሩሳሌምን ቅረጽ። ²ክበባትም፤ በእርሷ ላይ የመክበቢያ ቅጥር ሥራ፣ በእርሷም ላይ ትቢያ ከምር፣ በእርሷ ላይ ሰፈሮች አኑር፣ በዙሪያዋም የጦር መድፊያዎች አኑር። ³የብረት መጥበሻ ውሰድ፤ በአንተና በከተማይቱ መካከል እንደ ብረት ቅጥር አድርገህ አኑረው። ፊትህንም ወደ እርሷ አቅና፤ እርሷም ትከበባለች፣ አንተም ትከብባታለህ። ይህ ለእስራኤል ቤት ምልክት ነው።

⁴“አንተም በግራ ጎንህ ተኛ፤ የእስራኤልንም ቤት ኀጢአት በላዩ አኑር። በእርሱ ላይ በምትተኛባቸው ቀኖች ኀጢአታቸውን ትሸከማለህ። ⁵የኀጢአታቸውን ዓመታት እንደ ቀኖች ቍጥር መድቤልሃለሁና፤ ሦስት መቶ ዘጠና ቀን፤ ስለዚህ የእስራኤልን ቤት ኀጢአት ትሸከማለህ።

⁶“እነዚህንም ስትጨርስ፣ ዳግመኛ በቀኝ ጎንህ ተኛ፤ የይሁዳንም ቤት ኀጢአት አርባ ቀን ተሸከም፤ ለእያንዳንዱ ዓመት አንድ ቀን መድቤልሃለሁ። ⁷ፊትህንም ወደ ኢየሩሳሌም መከበብ አቅና፣ ክንድህንም ገልጠህ በእርሷ ላይ ትንቢት ተናገር። ⁸እነሆ፣ የመከበብህን ቀኖች እስክትጨርስ ድረስ ከጎን ወደ ጎን እንዳትገላበጥ በገመዶች አስርሃለሁ።

⁹“ስንዴ፣ ገብስ፣ ባቄላ፣ ምስር፣ ማሽላ፣ አጃም ውሰድ፤ በአንድ ዕቃ ውስጥ አድርጋቸው፣ ከእነርሱም እንጀራ ሥራ። በጎንህ በምትተኛባቸው ቀኖች ትበላዋለህ፤ ሦስት መቶ ዘጠና ቀን። ¹⁰የምትበላውን ምግብ በሚዛን መዝነህ፣ በየቀኑ ዐሥራ ስድስት ቂጣ ያህል ብላ፤ በተወሰነ ጊዜም ብላው። ¹¹ውሃውንም በመስፈሪያ ለክተህ ጠጣ፤ በየቀኑ አንድ ጽዋ ያህል፤ በተወሰነ ጊዜም ጠጣው። ¹²እንደ ገብስ ቂጣም አድርገህ ትበላዋለህ፤ በሰዎችም ዐይን ፊት በሰው ዓይነ ምድር ላይ ጋግረው።” ¹³አባታችንም እንዲህ አለ፤ “እንዲሁ የእስራኤል ልጆች በማሳድዳቸው ወዳሉባቸው አሕዛብ መካከል እንጀራቸውን ርኩስ ሆኖ ይበላሉ።”

¹⁴ያን ጊዜም እንዲህ አልሁ፤ “ወዮ፣ ሉዓላዊ አባት ሆይ! እኔ ራሴን አላረከስሁም። ከልጅነቴ ጀምሮ እስከ አሁን ድረስ በራሱ የሞተውን ወይም በአራዊት የተገደለውን ምንም አልበላሁም፣ የረከሰም ሥጋ ወደ አፌ አልገባም።”

¹⁵እርሱም አለኝ፤ “እነሆ፣ እንጀራህን በእርሱ ላይ ጋግረህ እንድትበላ ከሰው ዓይነ ምድር ፈንታ የላም ፋንድያ እንድትጠቀም ፈቀድሁልህ።”

¹⁶እርሱም አለኝ፤ “የሰው ልጅ ሆይ፣ እነሆ፣ በኢየሩሳሌም የእንጀራን በትር እሰብራለሁ። እንጀራቸውን በሚዛን በጭንቀት ይበላሉ፣ ውሃቸውንም በመስፈሪያ በድንጋጤ ይጠጣሉ፤ ¹⁷እንጀራና ውሃ እጥረት ይሆንባቸዋልና። እርስ በርሳቸውም በድንጋጤ ይተያያሉ፣ በኀጢአታቸውም ይከሳሉ።”