ሕዝቅኤል 5

5 ¹አንተ የሰው ልጅ ሆይ፣ ስለታም ሰይፍ እንደ ጸጕር አስተካካይ ምላጭ ውሰድ፤ በራስህና በጢምህ ላይ አሳልፈው። ከዚያም ሚዛን ወስደህ ጠጕሩን ክፈል። ²የከበባው ቀኖች ሲፈጸሙ፣ አንድ ሦስተኛውን በከተማዪቱ ውስጥ በእሳት አቃጥል፤ አንድ ሦስተኛውን ወስደህ በከተማዪቱ ዙሪያ በሰይፍ ምታው፤ አንድ ሦስተኛውንም ለነፋስ በትነው፤ እኔም ሰይፍ መዝዤ አሳድዳቸዋለሁ። ³ከእነርሱም ጥቂቶቹን ወስደህ በልብስህ ዘርፍ ውስጥ እሰራቸው። ⁴ከእነዚህም እንደ ገና ጥቂቱን ወስደህ ወደ እሳቱ ጣላቸው፤ በእርሱም አቃጥላቸው። ከዚያም እሳቱ ወደ እስራኤል ቤት ሁሉ ይዛመታል።

⁵ጌታ አባታችን እንዲህ ይላል፤ ይህቺ ኢየሩሳሌም ናት። በአሕዛብ መካከል አኖርኋት፤ በዙሪያዋም አገሮች አሉ። ⁶እርሷ ግን ከአሕዛብ ይልቅ በክፋት በሕጎቼ ላይ ዐመፀች፤ በዙሪያዋ ካሉት አገሮችም ይልቅ በሥርዐቶቼ ላይ ዐመፀች፤ ሕጎቼን ንቀዋልና፤ ሥርዐቶቼንም አልተከተሉምና።

⁷ስለዚህ ጌታ አባታችን እንዲህ ይላል፤ “በዙሪያሽ ካሉት አሕዛብ ይልቅ ዐማፂ ስለ ሆንሽ፣ ሥርዐቶቼን ስላልተከተልሽ ሕጎቼንም ስላልጠበቅሽ፣ በዙሪያሽ ያሉት አሕዛብ እንደሚያደርጉት እንኳ ስላላደረግሽ፣ ⁸ስለዚህ ጌታ አባታችን እንዲህ ይላል፤ ‘እነሆ፣ እኔ ራሴ በአንቺ ላይ ነኝ፤ በአሕዛብም ፊት በመካከልሽ ፍርድን አደርጋለሁ። ⁹ከሚያስጸይፉ ነገሮችሽ ሁሉ የተነሣ ከዚህ በፊት ያላደረግሁትን፣ ወደ ፊትም ዳግመኛ የማላደርገውን በመካከልሽ አደርጋለሁ። ¹⁰ስለዚህ በመካከልሽ ወላጆች ልጆቻቸውን ይበላሉ፤ ልጆችም ወላጆቻቸውን ይበላሉ። በአንቺ ላይ ፍርድን አደርጋለሁ፤ የተረፉትንም ሁሉ ወደ ነፋስ ሁሉ እበትናለሁ።’

¹¹“ጌታ አባታችን እንዲህ ይላል፤ በሕያውነቴ እምላለሁ፣ በርኩሰቶችሽ ሁሉና በሚያስጸይፉ ተግባሮችሽ ሁሉ መቅደሴን ስላረከስሽ፣ እኔ ራሴ ከአንቺ እርቃለሁ፤ ማንንም አልምርም፤ አልራራምም። ¹²‘ከአንቺ አንድ ሦስተኛው በመቅሠፍት ወይም በመካከልሽ በራብ ይሞታል፤ አንድ ሦስተኛው በዙሪያሽ በሰይፍ ይወድቃል፤ አንድ ሦስተኛውንም ወደ ነፋስ ሁሉ እበትናለሁ፤ የተመዘዘ ሰይፍ ይዤ አሳድዳቸዋለሁ።

¹³“ከዚያም ቍጣዬ ይፈጸማል፤ በእነርሱ ላይ መዐቴን እወጣለሁ፤ እጽናናለሁም። መዐቴን በእነርሱ ላይ ባፈስስሁ ጊዜ፣ እኔ አባታቸው በቅናቴ እንደ ተናገርሁ ያውቃሉ።

¹⁴“በዙሪያሽ ባሉ አሕዛብ መካከል፣ በሚያልፍ ሁሉ ፊት ፍርስራሽና ነውር አደርግሻለሁ። ¹⁵በቍጣ፣ በመዐትና በብርቱ ተግሣጽ በአንቺ ላይ ፍርድን በማደርግ ጊዜ፣ በዙሪያሽ ላሉ አሕዛብ ነውርና መዘበቻ፣ ማስጠንቀቂያና አስፈሪ ነገር ትሆኛለሽ። እኔ አባትሽ ተናግሬአለሁ። ¹⁶ለጥፋትሽ የተላኩትን ገዳይ የራብ ፍላጻዎች በአንቺ ላይ በምተኰስ ጊዜ፣ ራብን አበዛብሻለሁ፤ የምግብሽንም አቅርቦት አቋርጣለሁ። ¹⁷ራብንና የዱር አራዊትን በአንቺ ላይ እሰዳለሁ፤ ልጆችሽን ያሳጡሻል። መቅሠፍትና ደም ማፍሰስ በመካከልሽ ያልፋል፤ ሰይፍንም በአንቺ ላይ አመጣለሁ። እኔ አባትሽ ተናግሬአለሁ።’”