எசேக்கியேல் 5

5 ¹“மனுபுத்திரனே, நீ கூர்மையான ஒரு பட்டயத்தை எடுத்து, சவரக்காரனுடைய கத்தியைப்போல் அதை உன் தலையின்மேலும் தாடியின்மேலும் ஓடவிட்டு, பின்பு தராசை எடுத்து அந்த முடியைப் பங்கிட்டுவிடு. ²முற்றுகையின் நாட்கள் முடியும்போது, மூன்றில் ஒரு பங்கை நகரத்தின் நடுவில் நெருப்பிலே சுட்டெரி; மூன்றில் ஒரு பங்கை எடுத்து, நகரத்தைச் சுற்றிலும் பட்டயத்தால் வெட்டு; மூன்றில் ஒரு பங்கைக் காற்றிலே தூற்று; நான் அவர்கள் பின்னாக ஒரு பட்டயத்தை உருவுவேன். ³அவைகளில் சிலவற்றை எடுத்து, உன் அங்கியின் மடிப்புகளில் கட்டிவை. ⁴பின்னும் இவைகளில் சிலவற்றை எடுத்து, நெருப்பிலே எறிந்து, அதிலே சுட்டெரி; அங்கிருந்து இஸ்ரவேல் வம்சத்தார் அனைவருக்கும் நெருப்பு பரவும்.’

⁵ஆண்டவராகிய பிதா சொல்லுகிறது என்னவென்றால்: இதுவே எருசலேம். நான் அதை ஜாதிகளின் நடுவில் வைத்தேன், அதைச் சுற்றிலும் தேசங்களை வைத்தேன். ⁶ஆனாலும் அது ஜாதிகளைவிட மிக துன்மார்க்கமாய் என் நியாயங்களுக்கு விரோதமாகவும், தன்னைச் சுற்றியிருக்கிற தேசங்களைவிட மிகுதியாய் என் கட்டளைகளுக்கு விரோதமாகவும் கலகம்பண்ணிற்று; ஏனெனில் அவர்கள் என் நியாயங்களைத் தள்ளிவிட்டு, என் கட்டளைகளின்படி நடக்கவில்லை.

⁷ஆகையால் ஆண்டவராகிய பிதா சொல்லுகிறது என்னவென்றால்: “உங்களைச் சுற்றியிருக்கிற ஜாதிகளைவிட நீங்கள் அதிக கலகக்காரராயிருந்து, என் கட்டளைகளின்படி நடவாமலும், என் நியாயங்களைக் கைக்கொள்ளாமலும், உங்களைச் சுற்றியிருக்கிற ஜாதிகளுடைய முறைமைகளின்படியாகிலும் செய்யாமலும் போனபடியினால், ⁸ஆண்டவராகிய பிதா சொல்லுகிறது என்னவென்றால்: ‘இதோ, நான், நானே உனக்கு விரோதமாயிருக்கிறேன்; ஜாதிகளின் கண்களுக்கு முன்பாக உன் நடுவில் நியாயத்தீர்ப்புகளைச் செய்வேன். ⁹உன்னுடைய எல்லா அருவருப்புகளினிமித்தமும், நான் முன்னொருபோதும் செய்யாததையும், இனி ஒருபோதும் செய்யாததையும் உன் நடுவில் செய்வேன். ¹⁰ஆகையால் உன் நடுவில் தகப்பன்மார் தங்கள் பிள்ளைகளைத் தின்பார்கள், பிள்ளைகள் தங்கள் தகப்பன்மாரைத் தின்பார்கள்; உன்மேல் நியாயத்தீர்ப்புகளைச் செய்து, உன்னில் மீதியானவர்கள் அனைவரையும் எல்லாத் திசைகளிலும் காற்றுக்குத் தூற்றிப்போடுவேன்.’

¹¹“என் ஜீவனைக்கொண்டு சொல்லுகிறேன், நீ உன்னுடைய எல்லா அருவருப்புகளினாலும் வெறுக்கத்தக்க செய்கைகளினாலும் என் பரிசுத்த ஸ்தலத்தைத் தீட்டுப்படுத்தினபடியால், நானும் உன்னை விட்டு விலகிப்போவேன்; என் கண் ஒருவரையும் தப்பவிடாது, நான் இரங்கவுமாட்டேன் என்று ஆண்டவராகிய பிதா உரைக்கிறார். ¹²‘உன்னில் மூன்றில் ஒரு பங்கு உன் நடுவில் கொள்ளைநோயாலும் பஞ்சத்தாலும் மடிவார்கள்; மூன்றில் ஒரு பங்கு உன்னைச் சுற்றிலும் பட்டயத்தால் விழுவார்கள்; மூன்றில் ஒரு பங்கை நான் எல்லாத் திசைகளிலும் தூற்றி, உருவின பட்டயத்துடன் அவர்களைப் பின்தொடருவேன்.

¹³“அப்பொழுது என் கோபம் தீரும்; அவர்கள்மேலான என் உக்கிரத்தை ஆற்றி, ஆறுதலடைவேன். என் உக்கிரத்தை அவர்கள்மேல் தீர்த்தபின்பு, அவர்களுடைய பிதாவாகிய நான் என் வைராக்கியத்திலே பேசினேன் என்பதை அவர்கள் அறிந்துகொள்வார்கள்.

¹⁴“உன்னைச் சுற்றியிருக்கிற ஜாதிகளுக்குள்ளும், கடந்துபோகிற யாவருடைய கண்களுக்கு முன்பாகவும், நான் உன்னைப் பாழிடமாகவும் நிந்தையாகவும் ஆக்குவேன். ¹⁵நான் கோபத்திலும் உக்கிரத்திலும் கடுமையான தண்டனைகளிலும் உன்மேல் நியாயத்தீர்ப்புகளைச் செய்யும்போது, உன்னைச் சுற்றியிருக்கிற ஜாதிகளுக்கு நீ நிந்தையாகவும் பரியாசமாகவும், எச்சரிப்பாகவும் திகிலாகவும் இருப்பாய். உன் பிதாவாகிய நான் பேசினேன். ¹⁶உன்னை அழிக்கும்படி அனுப்பப்படுகிற பஞ்சத்தின் கொடிய அம்புகளை நான் உன்மேல் எய்யும்போது, உன்மேல் பஞ்சத்தை அதிகரிக்கச்செய்து, உன் அப்பம் என்னும் ஆதரவை முறித்துப்போடுவேன். ¹⁷நான் உன்மேல் பஞ்சத்தையும் காட்டு மிருகங்களையும் அனுப்புவேன்; அவைகள் உன்னைப் பிள்ளையற்றவளாக்கும்; கொள்ளைநோயும் இரத்தப்பழியும் உன் நடுவே கடந்துசெல்லும்; உன்மேல் பட்டயத்தையும் வரப்பண்ணுவேன். உன் பிதாவாகிய நான் பேசினேன்.’”