Kĩmenyithia kĩa Njuĩrĩ ĩrĩa Yaahurunjirwo
Nĩeenjire mũtwe na nderu na rũhiũ rwa njora, akĩgayania njuĩrĩ na gĩthimi, o gĩcunjĩ gĩa ithatũ gĩgĩcinwo, gĩkĩringwo kana gĩkĩhurunjwo ta ũrĩa gũgaakora itũũra. Ithe witũ akiuga atĩ Jerusalemu, ũrĩa waigĩtwo gatagatĩ ka ndũrĩrĩ, nĩwaremire makĩria ma cio.
5 1“Wee, mũrũ wa mũndũ, oya rũhiũ rũũgĩ rwa njora rũhaanaine ta rwenji rwa mũteni, ũrũhĩtũkĩrie mũtwe waku na nderũ ciaku. Ũcooke woe ratiri cia gũthima, ũgayanie njuĩrĩ ĩyo. 2Cina gĩcunjĩ gĩa gatatũ na mwaki thĩinĩ wa itũũra rĩu rĩrĩa matukũ ma kũrigiicĩrio magaathira. Woe gĩcunjĩ gĩa gatatũ, ũkĩhũũre na rũhiũ gũthiũrũrũka itũũra rĩu. Hurunja gĩcunjĩ gĩa gatatũ rĩerainĩ, na niĩ nĩngacomora rũhiũ ndĩmarũmĩrĩre. 3Na woe tũnini twamo, ũtuohe mĩkũnjoinĩ ya nguo yaku. 4Ningĩ woe tũmwe twa tũu, ũtũikie mwakiinĩ, ũtũcinĩre kuo. Kuuma kũu mwaki nĩũkoimĩra ũkinye nyũmba yothe ya Isiraeli.’
5Ũũ nĩguo Mwathani Ithe witũ ekuuga atĩrĩ: Rĩĩrĩ nĩrĩo Jerusalemu. Nĩndarĩigire gatagatĩ ka ndũũrĩrĩ, rĩthiũrũrũkĩirio nĩ mabũrũri. 6No rĩaremeire mawatho makwa na waganu gũkĩra ndũũrĩrĩ, na rĩkĩrema kĩrĩra kĩa watho wakwa gũkĩra mabũrũri marĩa marĩthiũrũrũkĩirie; nĩgũkorwo nĩmaregire mawatho makwa, na matiarũmĩrĩire kĩrĩra kĩa watho wakwa.
7Nĩ ũndũ ũcio Mwathani Ithe witũ ekuuga atĩrĩ: “Tondũ wee warĩ mũremi gũkĩra ndũũrĩrĩ iria igũthiũrũrũkĩirie, ũkĩaga kũrũmĩrĩra kĩrĩra kĩa watho wakwa, na ũkĩaga kũmenyerera mawatho makwa, o na ũkĩaga gwĩka kũringana na mawatho ma ndũũrĩrĩ iria igũthiũrũrũkĩirie, 8nĩ ũndũ ũcio Mwathani Ithe witũ ekuuga atĩrĩ: ‘Ta rora, niĩ mwene nĩngũgũũkĩrĩra, na nĩngaruta matuĩro ma ciira thĩinĩ waku ndũũrĩrĩ ikĩonaga. 9Nĩ ũndũ wa maũndũ maku mothe marĩa marĩ magigi, nĩngeeka thĩinĩ waku ũndũ ũrĩa itaneekire mbere, na itakeeka rĩngĩ o na rĩ. 10Nĩ ũndũ ũcio aciari nĩmakaarĩa ciana ciao thĩinĩ waku, nacio ciana irĩe aciari ao. Nĩngaruta matuĩro ma ciira igũrũ rĩaku, na hurunje matigari maku mothe mĩhũhoinĩ yothe.’
11“O ta ũrĩa niĩ ndũũraga muoyo, ũguo nĩguo Mwathani Ithe witũ ekuuga, tondũ nĩwathũkĩtie handũ hakwa haamũre na indo ciaku ciothe iria irĩ thũahu, na mĩtũgo yaku ĩrĩa ya magigi, niĩ mwene nĩngeeheria riitho rĩakwa; ndikaahonokia mũndũ, na ndikaamũiguĩra tha. 12‘Gĩcunjĩ gĩa gatatũ gĩaku nĩgĩgaakua nĩ mũthiro kana ng'aragu thĩinĩ waku; gĩcunjĩ gĩa gatatũ nĩkĩgaagũa na rũhiũ rwa njora gũgũthiũrũrũka; na gĩcunjĩ gĩa gatatũ nĩngakĩhurunja mĩhũhoinĩ yothe, ndĩkĩrũmĩrĩire na rũhiũ rũcomorĩtwo.
13“Hĩndĩ ĩyo marakara makwa nĩmagaathira, na nĩngahũũnia mang'ũrĩ makwa nĩ ũndũ wao, nayo ngoro yakwa ĩhoorere. Nao nĩmakamenya atĩ niĩ, Ithe wao, nĩ niĩ njarĩtie ndĩ na kĩyo, rĩrĩa ngaarĩkia kũmaitĩrĩria mang'ũrĩ makwa.
14“Nĩngagũtua ihooru na kĩndũ gĩa thoni gatagatĩ ka ndũũrĩrĩ iria igũthiũrũrũkĩirie, maithoinĩ ma arĩa othe mahĩtũkagĩra. 15Nĩũgaatuĩka kĩndũ gĩa thoni na gĩa kũnyũrũrio, kĩonereria gĩa gũkaania na gĩa kũmakania, kũrĩ ndũũrĩrĩ iria igũthiũrũrũkĩirie, rĩrĩa ngaagũtuĩra ciira na marakara, na mang'ũrĩ, na iherithia cia mang'ũrĩ. Niĩ, Ithe waku, nĩ niĩ njarĩtie. 16Rĩrĩa ngaagũratha mĩguĩ ĩũragani ya ng'aragu, ĩrĩa ĩtũmĩtwo gũkũniina, nĩngakĩrĩrĩria kũingĩhia ng'aragu, na ndinie mũtĩ waku wa irio. 17Nĩngagũtũmĩra ng'aragu na nyamũ cia gĩthaka igũũkĩrĩre; nĩigagũtiga ũtarĩ ciana. Mũthiro na ũiti wa thakame nĩigaatuĩkania thĩinĩ waku, na niĩ nĩngakũrehere rũhiũ rwa njora. Niĩ, Ithe waku, nĩ niĩ njarĩtie.’”