Alamar Gashin da Aka Watsar

Ya aske kansa da gemunsa da takobi, ya raba gashin ta wurin nauyi, kowane kashi ɗaya bisa uku a ƙone, ko a sare, ko a warwatsa, kamar ƙaddarar birnin. Ubanmu ya ce Urushalima, wadda aka kafa a tsakiyar al'ummai, ta yi tawaye fiye da su.

Babi na 5.

“Kai, ɗan mutum, ka ɗauki takobi mai kaifi kamar aska ta wanzami, ka zāga shi bisa kanka da gemunka. Sa'an nan ka ɗauki ma'auni ka raba gashin. Ka ƙone kashi ɗaya bisa uku da wuta a cikin birnin sa'ad da kwanakin ƙawanya suka cika. Ka ɗauki kashi ɗaya bisa uku, ka buge shi da takobi kewaye da birnin. Ka watsar da kashi ɗaya bisa uku ga iska, zan kuma zāre takobi in bi su. Ka kuma ɗauki kaɗan daga cikinsu ka ɗaura su a cikin gefen rigarka. Ka sāke ɗaukar waɗansu daga cikinsu, ka jefa su cikin wuta, ka ƙone su a cikinta. Daga nan wutar za ta bazu zuwa dukan gidan Isra'ila.'

Ga abin da Uba Mai Iko Duka ya ce, Wannan ita ce Urushalima. Na kafa ta a tsakiyar al'ummai, da ƙasashe kewaye da ita. Amma ta yi tawaye ga dokokina da mugunta fiye da al'ummai, ta kuma yi gāba da ƙa'idojina fiye da ƙasashen da suke kewaye da ita; gama sun ƙi dokokina, ba su kuma bi ƙa'idojina ba.

Saboda haka Uba Mai Iko Duka ya ce, “Domin kun yi tawaye fiye da al'umman da suke kewaye da ku, ba ku bi ƙa'idojina ba, ba ku kuma kiyaye dokokina ba, har ma ba ku yi aiki bisa ga dokokin al'umman da suke kewaye da ku ba, saboda haka Uba Mai Iko Duka ya ce, ‘Ga shi, ni kaina ina gāba da ku, zan kuma zartar da hukunce-hukunce a cikinku a idon al'ummai. Saboda dukan abubuwanku na ƙyama, zan yi a cikinku abin da ban taɓa yi ba, wanda kuma ba zan ƙara yi ba har abada. Saboda haka iyaye za su ci 'ya'yansu a cikinku, 'ya'ya kuma za su ci iyayensu. Zan zartar da hukunce-hukunce a kanku, in kuma watsar da dukan raguwarku ga kowace iska.'

“Muddin ina da rai, in ji Uba Mai Iko Duka, domin kun ƙazantar da wuri na mai tsarki da dukan abubuwanku na banƙyama da ayyukanku na ƙyama, ni kaina zan janye; ba zan ji tausayin kowa ba, ba zan kuwa nuna juyayi ba. ‘Kashi ɗaya bisa uku naku za su mutu ta annoba ko yunwa a cikinku; kashi ɗaya bisa uku za su faɗi ta takobi kewaye da ku; kashi ɗaya bisa uku kuma zan watsar ga kowace iska, ina bin su da takobi zāre.

“Sa'an nan fushina zai ƙare, zan kuma ƙosar da hasalata a kansu, in sami salwa. Za su kuma sani cewa ni, Ubansu, na yi magana cikin kishina, sa'ad da na zuba musu hasalata.

“Zan mai da ke kango da abin kunya a cikin al'umman da suke kewaye da ke, a idon duk masu wucewa. Za ki zama abin kunya da abin ba'a, abin gargaɗi da abin razana ga al'umman da suke kewaye da ke, sa'ad da na zartar da hukunce-hukunce a kanki cikin fushi, da hasala, da horo mai zafi. Ni, Ubanki, na yi magana. Sa'ad da na harbe ki da kibiyoyi masu kisa na yunwa, waɗanda aka aiko su hallaka ki, zan ƙara yunwa a kanki, in kuma datse miki tanadin abinci. Zan aiko da yunwa da namun jeji a kanki; za su bar ki babu 'ya'ya. Annoba da zubar da jini za su ratsa ki, zan kuma kawo takobi a kanki. Ni, Ubanki, na yi magana.'”