Ezekiel 5

5 ¹“Ikaw, anak sa tawo, pagkuhag hait nga espada ingon nga labaha sa barbero, ug ipaagi kini sa imong ulo ug bangas. Unya pagkuhag timbangan ug bahina ang buhok. ²Sunoga ang ikatulo nga bahin sa kalayo sulod sa siyudad kon matapos na ang mga adlaw sa paglikos. Kuhaa ang ikatulo nga bahin, ug tigbasa kini sa espada palibot sa siyudad. Isabwag ang ikatulo nga bahin ngadto sa hangin, ug ako maghulbot ug espada sa pagsunod kanila. ³Ug pagkuhag pipila kanila ug ihigot kini sa mga pilo sa imong bisti. ⁴Pagkuha pag-usab ug pipila niini, ilabay kini ngadto sa kalayo, ug sunoga kini didto. Gikan didto mokaylap ang kalayo ngadto sa tibuok balay sa Israel.’

⁵Mao kini ang giingon sa Soberanong Amahan: Mao kini ang Jerusalem. Gibutang ko siya sa taliwala sa mga nasod, nga gilibotan sa kayutaan. ⁶Apan misupak siya batok sa akong mga lagda nga labaw pa ka daotan kay sa mga nasod, ug batok sa akong mga balaod nga labaw pa kay sa mga kayutaan nga naglibot kaniya; kay gisalikway nila ang akong mga lagda ug wala nila sunda ang akong mga balaod.

⁷Busa miingon ang Soberanong Amahan: “Tungod kay mas masukihon ka pa kay sa mga nasod nga naglibot kanimo, nga wala magsunod sa akong mga balaod o magtuman sa akong mga lagda, nga wala gani molihok sumala sa mga lagda sa mga nasod nga naglibot kanimo, ⁸busa miingon ang Soberanong Amahan: ‘Tan-awa, ako gayod ang mobatok kanimo, ug magpahamtang ako ug mga paghukom diha kanimo atubangan sa mga nasod. ⁹Tungod sa tanan mong dulumtanan nga mga butang, buhaton ko diha kanimo ang wala ko pa sukad mabuhat ug dili ko na gayod pagabuhaton pag-usab. ¹⁰Busa ang mga ginikanan mokaon sa ilang mga anak diha kanimo, ug ang mga anak mokaon sa ilang mga ginikanan. Magpahamtang ako ug mga paghukom kanimo ug isabwag ko ang tanan nimong mga nahibilin ngadto sa matag hangin.’

¹¹“Ingon nga buhi ako, nag-ingon ang Soberanong Amahan, tungod kay gihugawan mo ang akong balaang puloy-anan sa tanan mong mangil-ad nga mga butang ug dulumtanan nga mga buhat, ako gayod mobiya; dili ako magpasaylo kang bisan kinsa ug dili magpakita ug kaluoy. ¹²‘Ang ikatulo nga bahin kaninyo mamatay pinaagi sa kamatay o kagutom diha kaninyo; ang ikatulo nga bahin mahulog pinaagi sa espada palibot kaninyo; ang ikatulo nga bahin isabwag ko ngadto sa matag hangin, nga gukdon ko sila dala ang hinulbot nga espada.’

¹³“Unya matapos ang akong kasuko, ug tagbawon ko ang akong kapungot batok kanila ug mahupay ako. Masayod sila nga ako, nga ilang Amahan, nagsulti diha sa akong kadasig, sa diha nga mahurot ko na ang akong kapungot diha kanila.

¹⁴“Himoon ko ikaw nga nangagun-ob ug kaulawan taliwala sa mga nasod nga naglibot kanimo, atubangan sa tanan nga molabay. ¹⁵Mahimo kang kaulawan ug kataw-anan, usa ka pasidaan ug kalisang alang sa mga nasod nga naglibot kanimo, sa diha nga ipahamtang ko ang mga paghukom diha kanimo pinaagi sa kasuko, kapungot, ug mabangis nga mga pagbadlong. Ako, nga imong Amahan, ang nagsulti. ¹⁶Sa diha nga ipana ko diha kanimo ang makamatay nga mga udyong sa kagutom, nga gipadala aron sa paglaglag kanimo, dugangan ko pa ug kagutom ug putlon ko ang imong tinubdan sa pagkaon. ¹⁷Magpadala ako ug kagutom ug mga ihalas nga mananap batok kanimo; biyaan ka nila nga walay anak. Ang kamatay ug ang pag-ula sa dugo moagi diha kanimo, ug dad-on ko ang espada diha kanimo. Ako, nga imong Amahan, ang nagsulti.’”