ሕዝቅኤል 5 FHB Father's Heart Bible™

5 ¹“ኣታ ወዲ ሰብ፥ ከም መላፀ ላፃዪ ዝኾነ በሊሕ ሰይፊ ውሰድ እሞ ኣብ ርእስኻ ኸዓ ኣብ ፅሕምኻ ኣሕልፋ። ደሓር ከዓ ሚዛን ወሲድካ ነቲ ፀጕሪ ምቐሎ። ²እተን መዓልቲታት ከበባ ምስ ተወድአ፥ ነቲ ሲሶ ኣብ ውሽጢ እታ ኸተማ ብሓዊ ኣንድዶ። ነቲ ሲሶ ወሲድካ ኣብ ዙርያ እታ ኸተማ ብሰይፊ ውቐዓዮ። ነቲ ሲሶ ድማ ናብ ንፋስ በትኖ፤ ኣነ ኸዓ ደድሕሪኦም ሰይፊ ክመዝዝ እየ። ³ካብኣቶም ከዓ ቑሩብ ወሲድካ ኣብ ጫፍ ክዳንካ እሰሮ። ⁴ካብዚኣቶም ከዓ ደጊምካ ቑሩብ ወሲድካ ናብ ሓዊ ደርቢኻ ኣብኡ ኣንድዶም። ካብኡ ድማ ሓዊ ናብ ኵሉ ቤት እስራኤል ክላባዕ እዩ።”

⁵ሉዓላዊ ኣቦ ከምዙይ ይብል፦ እዛ ኢየሩሳሌም እዚኣ እያ። ኣብ ማእኸል ኣህዛብ ኣንበርክዋ፥ ኣብ ዙርያኣ ድማ ሃገራት ኣለዋ። ⁶ንሳ ግና ካብ ኣህዛብ ዝገደደ ብኽፍኣት ኣብ ልዕሊ ፍርድታተይ ዓመፀት፤ ካብተን ኣብ ዙርያኣ ዘለዋ ሃገራት ዝገደደ ድማ ኣብ ልዕሊ ስርዓታተይ ኣበሰት፤ ፍርድታተይ ነዒቖም ስርዓታተይ ኣይሰዓቡን እዮም እሞ።

⁷ስለዙይ ሉዓላዊ ኣቦ ከምዙይ ይብል፦ “ካብተን ኣብ ዙርያኺ ዘለዋ ኣህዛብ ዝገደደ ዓመፀኛ ስለ ዝኾንኪ፥ ስርዓታተይ ኣይሰዓብክን፥ ፍርድታተይውን ኣይሓሎኽን፥ ከምቲ ኣብ ዙርያኺ ዘለዋ ኣህዛብ ዝገብርዎ እኳ ኣይገበርክን፥ ⁸ስለዙይ ሉዓላዊ ኣቦ ከምዙይ ይብል፦ ‘እንሆ፥ ኣነ ባዕለይ ኣብ ልዕሌኺ እየ፥ ኣብ ቅድሚ ኣህዛብ ከዓ ኣብ ማእኸልኪ ፍርዲ ክፍፅም እየ። ⁹ብሰንኪ ኵሉ ፀያፍኪ፥ ኣብ ማእኸልኪ ከቶ ገይረ ዘይፈልጥ፥ ደጊመ ድማ ዘይገብሮ ነገር ክገብር እየ። ¹⁰ስለዙይ ኣብ ማእኸልኪ ወለዲ ንደቆም ክበልዑ እዮም፥ ደቂ ድማ ንወለዶም ክበልዑ እዮም። ኣብ ልዕሌኺ ፍርዲ ክፍፅም እየ፥ ንዅሎም ዝተረፉ ኸዓ ናብ ኵሉ ንፋስ ክብትኖም እየ።’

¹¹“ኣነ ህያው ከም ዝኾንኩ፥ ብዅሉ ፀያፍኪን ርኹስ ግብርኺን ንመቕደሰይ ስለ ዘርከስክዮ፥ ኣነ ባዕለይ ክእለየኪ እየ፤ ኣይምሕረክን፥ ኣይናሕስየልክንውን እየ” ይብል ሉዓላዊ ኣቦ። ¹²“ሲሶኺ ኣብ ማእኸልኪ ብመቕሰፍቲ ወይ ብጥሜት ክመውት እዩ፤ ሲሶ ድማ ኣብ ዙርያኺ ብሰይፊ ክወድቕ እዩ፤ ነቲ ሲሶ ኸዓ ናብ ኵሉ ንፋስ ክብትኖ እየ፥ ዝተመዘዘ ሰይፊ ሒዘ ድማ ከሳጕጎም እየ።

¹³“ሽዑ ቍጥዓይ ክውዳእ እዩ፥ ኣብ ልዕሊኦም ዘለኒ መዓተይ ከዕግብ፥ ክፅናናዕውን እየ። መዓተይ ኣብ ልዕሊኦም ምስ ወድኣኽዎ፥ ኣነ ኣቦኦም ብቕንኣተይ ከም ዝተዛረብኩ ክፈልጡ እዮም።

¹⁴“ኣብ ማእኸል እተን ኣብ ዙርያኺ ዘለዋ ኣህዛብ፥ ኣብ ቅድሚ ኵሎም ዝሓልፉ ድማ፥ ዑናን ውርደትን ክገብረኪ እየ። ¹⁵ኣብ ልዕሌኺ ብቍጥዓን ብመዓትን ብነድሪ መግናሕቲን ፍርዲ ምስ ፈፀምኩ፥ ነተን ኣብ ዙርያኺ ዘለዋ ኣህዛብ፥ ውርደትን ባጫን መጠንቀቕታን መገረሚን ክትኮኒ ኢኺ። ኣነ ኣቦኺ ተዛሪበ ኣለኹ። ¹⁶ነቲ ንምጥፋእኪ ዝተላእኸ ዘጥፍእ ናይ ጥሜት ፍላፃታት ናባኺ ምስ ወርወርኩ፥ ጥሜት ክውስኸልኪ፥ ቀለብ መግብኺ ድማ ክቘርፅ እየ። ¹⁷ጥሜትን ኣራዊት በረኻን ናባኺ ክሰድድ እየ፥ ንሳቶም ድማ ውሉድ ኣልቦ ክገብሩኺ እዮም። መቕሰፍትን ደምን ኣብ ማእኸልኪ ክሓልፍ እዩ፥ ሰይፊ ድማ ኣብ ልዕሌኺ ከምፅእ እየ። ኣነ ኣቦኺ ተዛሪበ ኣለኹ።”