Chituri diya chuli laga chihna

Tai ekta talwar pora mur aru dari kati dise aru chuli khan ke ojon kori kene bhag korise, ek-tin bhag jolai dise, mari dise nohoile ura dise, sohor laga bhagya nisina. Amar Pitri koise, desh khan laga majot te rakhi diya Jerusalem, tarkhan pora bhi bisi biruddh korise.

Adhyay 5.

“Tumi, manuh laga putro, dhar thaka ekta tarwal lobi, chuli kata manuh laga khur nisena, aru eitu tumar matha aru dari uporte chola bi. Titia taraju loi kene chuli khan bhag koribi. Gheri thaka din khan khotom huwa homoi te, sheher bhitor te tin bhag laga ek bhag jui te julai dibi. Ek bhag loi kene, sheher laga age piche te tarwal pora mari dibi. Ek bhag ke hawa te chituri dibi, aru Moi tarkhan laga piche te tarwal ulabo. Aru eitu khan pora olop loi kene, tumar kapor laga bhaj te bandhi dibi. Aru eitu khan pora olop loi kene, jui te phelai dibi, aru eitu bhitor te julai dibi. Ta pora jui tu pura Israel laga ghor te phailibo.’”

Sob-Sakti thaka Pitri he eneka koi ase: Eitu Jerusalem ase. Moi tai ke desh khan laga majat te rakhise, tai laga age piche te desh khan thakise. Kintu tai desh khan pora bhi bisi biya pora Moi laga niyom khan birodh te jaise, aru tai laga age piche te thaka desh khan pora bhi bisi Moi laga bidhan khan birodh te jaise; kilemane tarkhan Moi laga niyom khan ke chari dise aru Moi laga bidhan khan mana nai.

Etia karone Sob-Sakti thaka Pitri he koi ase: “Tumar age piche te thaka desh khan pora bhi tumi bisi birodh kora karone, Moi laga bidhan khan mana nai aru Moi laga niyom khan rakha nai, tumar age piche te thaka desh khan laga niyom hisab te bhi kaam kora nai, etia karone Sob-Sakti thaka Pitri he koi ase: ‘Sabi, Moi nijor tumar birodh te ase, aru desh khan laga age te Moi tumar majat te bisar kori dibo. Tumar sob ghin kaam khan karone, Moi age te kitia bhi nakora, aru aru kitia bhi nakoribo thaka kaam tumar majat te koribo. Etia karone tumar majat te baba-ma khan tarkhan laga bacha khan ke khabo, aru bacha khan tarkhan laga baba-ma khan ke khabo. Moi tumar uporte bisar kori dibo aru tumar bachi juwa sob ke sob hawa te chituri dibo.’

“Moi jinda thaka nisena hosa, Sob-Sakti thaka Pitri he koi ase, tumar sob letera jinis khan aru ghin kaam khan pora tumi Moi laga pobitro jagah ke letera kori diya karone, Moi nijor pichete hati jabo; Moi kun ke bhi nasaribo aru eku doya nadikhabo. ‘Tumar tin bhag laga ek bhag tumar majat te mohamari nohoile akal pora moribo; ek bhag tumar age piche te tarwal pora giri jabo; ek bhag ke Moi sob hawa te chituri dibo, ulai thaka tarwal loi kene tarkhan laga piche te jabo.

“Titia Moi laga khong khotom hobo, aru Moi tarkhan uporte Moi laga gusa purah koribo aru shanti pabo. Jitia Moi tarkhan uporte Moi laga gusa khotom koribo, titia Moi, tarkhan laga Pitri, Moi laga mon-jalla pora koise koi kene tarkhan jani lobo.

“Tumar age piche te thaka desh khan laga majat te, aru paar hoi juwa sob laga age te, Moi tumi ke ekta nosto jagah aru ekta sorom laga jinis bonai dibo. Jitia Moi khong, gusa aru bhabi juwa saja pora tumar uporte bisar koribo, titia tumar age piche te thaka desh khan nimite tumi ekta sorom aru thatta, ekta hushiar aru bhoi laga jinis hobo. Moi, tumar Pitri, koise. Jitia Moi tumi ke khotom koribole pathai diya akal laga mora-mari tir khan tumar uporte maribo, titia Moi aru bisi akal dibo aru tumar kha-luwa laga joriya kati dibo. Moi tumar birodh te akal aru jongol laga janwar khan pathai dibo; tarkhan tumi ke bacha nathaka bonai dibo. Mohamari aru khoon bohai juwa tumar bhitor te ahibo, aru Moi tumar uporte tarwal anibo. Moi, tumar Pitri, koise.’”