UHezekeli 5

5 ¹“Wena, ndodana yomuntu, thatha inkemba ebukhali njengempuco yomgundi, uyidlulise ekhanda lakho nasesilevini sakho. Bese uthatha isikali, uhlukanise izinwele. ²Shisa ingxenye yesithathu ngomlilo phakathi komuzi lapho izinsuku zokuvinjezelwa seziphelile. Thatha ingxenye yesithathu, uyishaye ngenkemba nxazonke zomuzi. Hlakazela ingxenye yesithathu emoyeni, ngiyakuhosha inkemba ngibe semuva kwazo. ³Uthathe ezimbalwa kuzo, uzibophele emaphethelweni engubo yakho. ⁴Phinda uthathe ezinye kulezi, uziphonse emlilweni, uzishise kuwo. Kusukela lapho umlilo uyakuqhela uye endlini yonke yakwa-Israyeli.’

⁵Nakhu akushoyo iNkosi uBaba: Lokhu yiJerusalema. Ngayibeka maphakathi kwezizwe, kunamazwe nxazonke zayo. ⁶Kodwa yahlubuka ezahlulelweni zami ngobubi obedlula obezizwe, nasezimisweni zami ngaphezu kwamazwe ayizungezile; ngokuba benqaba izahlulelo zami, abazilandela izimiso zami.

⁷Ngakho iNkosi uBaba ithi: “Ngenxa yokuthi beninenkani ngaphezu kwezizwe ezinizungezile, ningazilandeli izimiso zami, ningazigcini izahlulelo zami, ningenzi ngisho nangezahlulelo zezizwe ezinizungezile, ⁸ngalokho-ke iNkosi uBaba ithi: ‘Bheka, mina ngokwami ngimelene nawe, ngiyakwenza izahlulelo phakathi kwakho phambi kwamehlo ezizwe. ⁹Ngenxa yazo zonke izinto zakho ezinengekayo ngiyakwenza phakathi kwakho lokho engingakaze ngikwenze ngaphambili, nengingasoze ngikwenze futhi. ¹⁰Ngakho abazali bayakudla abantwana babo phakathi kwakho, nabantwana bayakudla abazali babo. Ngiyakwenza izahlulelo kuwe, ngihlakazele bonke abasindileyo bakho kuwo wonke umoya.’

¹¹“Impela njengokuba ngiphila, kusho iNkosi uBaba, ngenxa yokuthi ungcolise indlu yami engcwele ngazo zonke izinto zakho ezinyanyekayo nangemikhuba yakho enengekayo, nami ngiyakuhoxa; angiyikuyeka muntu, angiyikuba nasihawu. ¹²‘Ingxenye yesithathu yakho iyakufa ngesifo noma ngendlala phakathi kwakho; ingxenye yesithathu iyakuwa ngenkemba nxazonke zakho; ingxenye yesithathu ngiyakuyihlakazela kuwo wonke umoya, ngiyixoshe ngenkemba ehoshiweyo.’

¹³“Khona-ke intukuthelo yami iyakuphela, ngisuthise ulaka lwami kubo, ngiduduzeke. Bayakwazi ukuthi mina, uBaba wabo, ngikhulumile entshisekweni yami, lapho sengiselulisile ulaka lwami kubo.

¹⁴“Ngiyakukwenza incithakalo nehlazo phakathi kwezizwe ezikuzungezile, phambi kwamehlo abo bonke abadlulayo. ¹⁵Uyakuba yihlazo nenhlekiso, isixwayiso nesesabiso ezizweni ezikuzungezile, lapho ngikwenza izahlulelo kuwe ngentukuthelo, ngolaka, nangokusola okunolaka. Mina, uBaba wakho, ngikhulumile. ¹⁶Lapho ngikucibishela ngemicibisholo ebulalayo yendlala, ethunyelwe ukuba ikubhubhise, ngiyakwandisa indlala kuwe, nginqamule nokudla kwakho. ¹⁷Ngiyakuthumela indlala nezilo zasendle kuwe; ziyakukushiya ungenabantwana. Isifo negazi kuyakudabula phakathi kwakho, ngiyakwehlisela inkemba phezu kwakho. Mina, uBaba wakho, ngikhulumile.’”