Khulou Lintibü Amaaphilabü
Haoei in cheei kaibü khu si sembung shuan apkei, hoba namtetei khulou kho pensem ka jankei, pensem che wana jikan, pensem che inei thükenan, hoba pensem che yei thükto lintian, sangnyu shanga thushed yeikei. Seneibü Bouei lauda, Jerusalem phangshuong jenyua kümbü kho, haoen tokei amaibou meimeikei.
5 1“No, Müteibü Shou, khu shubou khujin tegü kibü in che leko kaibü khu si sembung thüka shuan apbushi. Kheijinei namtet che leko khulou kho jankushi. 2Shishang chalou thonjinei, pensem ka che sangnyu maanga wana jikan apashi. Pensem ka che leko sangnyu kaijembo inei thükenashi. Pensem ka che yei thükto lintiashi, hoba ngei haoen thükto in setenlabü. 3Hoba haoen ka shisho ong leko kaibü neithona khühashi. 4Habü ka nyibou shisho ong leshi hoba wana attiashi, hoba khonga jikan apashi. Kho ka wana Israel chung pendou to aan kilabü.”
5Thükenbou Bouei khübü to lauda: Ho Jerusalem ki. Ngei sao phangshuong jenyua kümakei, hoba kaonyek shuong sao kaijembo kikei. 6Lausikei saoei phangshuong tokei amaibou ngeibü matjem khulimbo meimeikei, hoba kaijembo kibü kaonyek shuong tokei ngeibü ngühkhüm khulimbo kei meimeikei; aishanga haoenei ngeibü matjem asunglet, hoba ngeibü ngühkhüm phai asemda.
7Khoei Thükenbou Bouei khübü to lauda: “Kaibü kaijembo kibü phangshuong tokei no kei meimeibü kibü ka, ngeibü ngühkhüm phai asembo, ngeibü matjem ajungeiko, kaijembo kibü phangshuongeibü matjem tegükei akümbo kibü ka, 8khoei Thükenbou Bouei khübü to lauda: ‘Chühashi, ngo lolo kaibü khulimbo ki, hoba phangshuong thedanga ka yoa matjem sungbalabü. 9Kaibü mangsenlabü kümsilei pendou shanga, ngei ladangkei akümbü hoba touje ladangkei akümlabü che, ka yoa kümlabü. 10Khoei ka yoa nyusibouei jembü shousi shaulabü, hoba shousiei jembü nyusibou shaulabü. Hoba ngei ka to matjem sungbalabü, hoba kaibü joubü pendou yei pendou to lintilabü.’
11“Ngo lang kisije, dogo Thükenbou Bouei lauda, nyi kaibü asaopobü peisilei pendou hoba mangsenlabü kümsilei pendouei ngeibü lemshang asaopoko aptibü ka shanga, ngokei kaibü ka sungngaian aplabü; ngei aoche to ongkei asenetlabü, ayingsi onou alenlabü. 12‘Kaibü pensem ka che limei ayingsi mühsinou ka yoa hailabü; pensem ka che kaibü kaijembo inei tuonglabü; pensem ka che ngei yei pendou to lintilabü, hoba in setenan haoen shijung haulabü.
13“Kheijinei ngeibü ange thonlabü, hoba ngei haoen khulimbo ngeibü maangshat soulabü, hoba ngo haksolabü. Ngei haoen thüka ngeibü maangshat lekhümjinei, ngo, haoeneibü Bouei, ngeibü maangdakei laukei dogo haoenei ngelabü.
14“Ngei kaibü kaijembo kibü phangshuong yoa, dangbü kaonyu pendou thedanga, no leiluan hoba himoulabü che yeitilabü. 15Ngei ange, maangshat, hoba khauangbü hakbüei ka to matjem sungbajinei, kaibü kaijembo kibü phangshuong shanga no himoulabü, nyikubü, tetsida hoba kongaedanga yeilabü. Ngo, kaibü Bouei, laukei. 16Ngei ka to, no mautila shanga hautibü, mühsinoueibü haibü laujin shuong kipan, ngei mühsinou juong ongshaikulabü, hoba kaibü shausiyung kho wapan aplabü. 17Ngei ka to mühsinou hoba yamkabü meisiau hautilabü; haoenei no chilang yeian aplabü. Limei hoba siiei ka yoa shoonglabü, hoba ngei ka thüka in sungbalabü. Ngo, kaibü Bouei, laukei.’”
