Bouei heangsho lembü matjemda
Thuseibü Israelbü shongh shuong to tetenkei, khüto shumang hoba lemshang shuong longda, hoba haibü mang kho haoeneibü heangsho thedanga phokulabü dogo laukei. Lausikei joubü shuong kaonyek maanga satenan, seneibü Bou damenlabü, hoba aeibou kümbü mangsenlabü shanga aeibou jenyua müt haitian tuonglabü.
6 1Boueibü ngüh kü jungto loukei:
2Müteibü Shou, Israelbü shongh shuong aeto sepeian kaibü the phokuan, haoen khulimbo tetenashi. 3Lenashi: O Israelbü shongh shuong, Thükenbou Boueibü ngüh ditashi. Thükenbou Bouei shongh hoba shonghshou shuong to, shumang hoba pholi shuong to hai lauda: Chühashi, ngei kan thükto in che sungbalabü, hoba kaneibü shongh kabü lemshang shuong leilulabü. a a v3 Shongh kabü lemshang kho shonghkhua kibü lembüchem shuong kikei, khünei Israelbüei küksithang mühghaü to khangenan lembei. 4Kaneibü lemshang shuong leiluan kilabü, hoba kaneibü jenjuokbü lemshang shuong netla yeiko jangnyinlabü, hoba kaneibü heangsho thedanga kaneibü haitibü shuong laklabü. 5Ngei Israel shousi shuongeibü haibü mang haoeneibü heangsho thedanga phokulabü, hoba kaneibü lo kaneibü lemshang kaijembo lintilabü. 6Kan kishang pendoua, sangnyu shuong leiluan kilabü hoba shongh kabü lemshang leilulabü, khoei kaneibü lemshang shuong leiluan sangliphanga kilabü, kaneibü heangsho shuong netla yeiko mautilabü, kaneibü jenjuokbü lemshang shuong wetan attilabü, hoba kanei kümbü pendou mautilabü. 7Kan jenyua müt haitian tuonglabü, hoba ngo kaneibü Bou ki dogo kanei ngelabü.
8Lausikei ngei joubü shuong hautilabü, aishanga kaodak pendou ka kan lintikunyet, at phangshuong yoa in ka satenlabü. 9Kheijinei kan joubü shuongei, haoen thüngbou la yeitian kibü phangshuong yoa, ngo damenlabü—ngo ka sepeian maangpokbü haoeneibü maangponei hoba haoeneibü heangsho aeto sepeian lamyobü nyekei ngeibü maangpon lai leilukei dogo. Haoenei kümbü amaibü shanga, haoeneibü mangsenlabü kümsilei pendou shanga, haoen lolo mangsenlabü. b b v9 Seneibü Bouei lauda, haoeibü shousi shuongeibü maangpokbüei haoeibü maangpon lai leilukei—hanei matjembü ho leilukubü sanou ka louakei, hat kibü inletbü ka aying. 10Hoba ngo haoeneibü Bou ki dogo haoenei ngelabü; ngei haoen thükto ho thushed loulabü dogo amlangbüei alaukei.
11Thükenbou Bouei hai lauda: Kaibü ik ipan, kaibü you kaoa ngüman, hoba Israel chungbüeibü amaibü, mangsenlabü kümsilei pendou shanga, “Ügütü!” dogo ngekashi, aishanga haoen inei, mühsinou hoba limei tuonglabü. 12Saabüa kibü shuong limei hailabü, nyangbüa kibü shuong inei tuonglabü, hoba jou ongkei jouletbü aoyou mühsinou hailabü. Kheijinei ngei ngeibü khauang haoen thükto sungbalabü. 13Kheijinei, haoeneibü lemshang kaijembo kibü heangsho jenyua, sangtüngbü shonghshou pendou thüka, shonghkhu pendou thüka, bunyu bukhu shangbü pendou phanga hoba ik hongmaibü yembulong phanga—khünei haoenei haoeneibü heangsho pendou to ponlem maibü jen juokkei—haoeneibü haitibü shuong tuongan kijinei, ngo kaneibü Bou ki dogo kanei ngelabü. 14Ngei haoen thükto ngeibü ik shinglabü, hoba yam ka Ribla sühko, haoen kishang pendou, kaonyek sangliphang la yeitilabü. Kheijinei ngo haoeneibü Bou ki dogo haoenei ngelabü.
