Pen Loukei
Seneibü Boueibü ngüh kho pentham ki. Chalou danko lubü maangshat aying: thushed louko kia, üangbou si attibou ham pendou maanglembü, hoba neisimei si hon pühlama aipan aleshangbü. Thuseibü, ungshedbou hoba jaishou pendou songsido maangangbü. Hanei aikei temelabü aying.
7 1Seneibü Boueibü ngüh kü jungto louan laukei,
2Hoba no, müteibü shou—Thükenbou Bouei Israel kaodak to hai lauda: Pen che! Pen kho kaodak chemnyek lei to louko kia. 3Touje pen kho no thüka kia, hoba ngei kü angebü no thükto hautilabü. Ngei no to kaibü lam thüng matjemlabü hoba kaibü mangsenlabü kümsilei pendou no thüka loutikulabü. 4Kü nyekei no to sanou adamlabü, ayingsi ngei onou alenlabü; ngei kaibü lam thüng no la kungailabü, hoba kaibü mangsenlabü kümsilei kaibü jenyua kilabü. Kheijinei ngo kaibü Bou dogo no ngelabü. 5Thükenbou Bouei hai lauda: Thushed che! Thushed che, ho tegübü aoeikei achühbü—chühashi, kho louko kia! 6Pen loukei! Pen kho loukei! Kho no thükto meimeikei—chühashi, kho louko kia! 7Khonsak kho no thüka loukei, kaodaka kibü no. Jih loukei; chalou nyangko kia—panglangbü chalou, shongh shuonga olinko chisichia laubü chalou aying. a a v7 Shangied Israela shongh shuong kho mütshuong liko yoshaian lem pienbü hoba olinbü kaoen kiteikei; aieilausi ho chaloubüje olin ayingko, lüh ong loutilabü dogo khünei tangti kia. 8Touje nyangetnyu ngei kü maangshat no thüka jontilabü hoba kü angebü no thükto hautilabü. Ngei no to kaibü lam thüng matjemlabü hoba kaibü mangsenlabü kümsilei pendou no thüka loutikulabü. 9Kü nyekei sanou adamlabü, ayingsi ngei onou alenlabü; ngei kaibü lam thüng no la kungailabü, hoba kaibü mangsenlabü kümsilei kaibü jenyua kilabü. Kheijinei ngo kaibü Bou, thükbou dogo no ngelabü. 10Chühashi, chalou! Chühashi, kho louko kia! Khonsak kho longkei; ju kho chipen pungkei, lilibü kho tongkei. 11Ik shatyobü kho meimeian amaibü ju la yeikei. Haoen aokei ajoulabü— haoeneibü mütshang aokei, haoeneibü nyaksinam aokei— hoba haoen yoa nyenbü denche aokei akilabü. 12Jih loukei; chalou sühkei. Jekbouei teolinjan, hoba yaakbü mütei mang tehaapjan, aishanga maangshat kho haoeneibü mütshang pendou thüka kia. 13Yaakbü müt kho haoei yaakbü to alongeilabü, haosi touje lang kijinei kei. Aishanga haoeneibü mütshang pendou thükto mangsang kho asepeilabü, hoba jembü shabü kümsilei shanga aoeikei jembü langkei hatlepan athüklabü.
14Haoenei teklaang metkei, hoba pendou lamleettikei, lausikei aokei lason to ahaulabü, aishanga kü maangshat kho haoeneibü mütshang pendou thüka kia. 15In kho khonga kia; limei hoba mühsinou insiaubu kia. Aoei yama kibü kho in ka hailabü, hoba aoei sangnyu maanga kibü kho—mühsinou hoba limei hao shaulabü. 16Haoen yoa satenbü shuong kho pholi kabü dukutuk shuong tegü shongh shuong to satenlabü, haoen pendou haapbo, haoen weko jembü shabü shanga haaplabü. 17Ik pendou hau thetlabü, hoba sembung pendou dei la yeilabü. 18Haoenei senou neiei shenlabü, hoba haoen konga lühbü danglepanlabü; the pendou thüka himou kilabü, hoba khu pendou shuan aplabü. 19Haoenei jembü nam khongnyua laklabü, hoba haoeneibü hon kho asaopobü denche phatko yeilabü. Haoeneibü nam hoba honei kü maangshat chaloua haoen khümenla athük. Kho haoeneibü mühei hoba jembü phau senyühshemtila athük, aishanga kho haoen shabü danko leibü phaiyetlabü laang kikei. 20Haoenei jembü chinem hemaibü ka yongko maangsangkei, hoba kho sungan jembü mangsenlabü heangsho hoba amaibü mühghaü kümbei. Khoei ngei habü shuong kho haoen shanga asaopobü denche yeitikei. 21Ngei habü shuong kho yenbou shuong la soletbü shanga hoba kaodak amaibü shuong la sangshibü shanga kulabü, hoba haoenei kho leilulabü. 22Ngei kü the haoen ka sepeilabü, hoba haoenei kü haübü kaoen leilulabü; yepeijawebü shuongei khüto atlabü hoba kho leilulabü. 23Yangmen kümashi! Aishanga kaodak sii shatyobü shabüei shenan kia, hoba sangnyu ik shatyobüei shenan kia. 24Ngei amaibü yaangbü phang shuong haoeneibü chem lela shanga leian loulabü. Ngei seisihaubü shuong lilibü penbü yeilabü, hoba haoeneibü saopobü kaoen shuong leilulabü. 25Khonkuei sühlaje, haoenei sangmai lamlabü, lausikei kho akilabü. 26Thushed thüka thushed loulabü, hoba ngühlang thüka ngühlang loulabü. Haoenei thuseibou ka mangsang lamlabü, lausikei ungshedbou ka ngühkhüm maulabü hoba jaishou shuong ka dambü maulabü. 27Choba mang haaplabü, yaangenbou maangmauei sholeplabü, hoba kaodak mütshuong ik lühlabü. Ngei haoeneibü jembü kümsilei thüng haoen to jungeilabü, hoba haoeneibü jembü songsido thüng ngei haoen matjemlabü. Kheijinei haoenei ngo haoeneibü Bou ki dogo ngelabü.
