അന്ത്യം വന്നിരിക്കുന്നു

നമ്മുടെ പിതാവിന്റെ വചനം ഇത്രമാത്രം: അവസാനം. സമയം ബാക്കിയുള്ള ഒരു മുന്നറിയിപ്പല്ല: നാശം വന്നെത്തിയിരിക്കുന്നു, വാങ്ങുന്നവനും വിൽക്കുന്നവനും ഒരുപോലെ എല്ലാം നഷ്ടപ്പെടുന്നു, വെള്ളിയും പൊന്നും പ്രയോജനമില്ലാത്തതായി തെരുവുകളിൽ എറിഞ്ഞുകളയുന്നു. പ്രവാചകനും പുരോഹിതനും മൂപ്പനും ആലോചന ഇല്ലാതെയാകുന്നു. ഇവിടെ ഒന്നും മയപ്പെടുത്തിയിട്ടില്ല.

അധ്യായം 7.

നമ്മുടെ പിതാവിന്റെ വചനം എനിക്ക് ഉണ്ടായി:

മനുഷ്യപുത്രാ, പരമാധികാരിയായ പിതാവ് യിസ്രായേൽ ദേശത്തോട് ഇപ്രകാരം അരുളിച്ചെയ്യുന്നു: അന്ത്യം! ദേശത്തിന്റെ നാലു കോണുകളിലും അന്ത്യം വരുന്നു. ഇപ്പോൾ നിന്റെമേൽ അന്ത്യം വന്നിരിക്കുന്നു; എന്റെ കോപം ഞാൻ നിന്റെനേരേ അയയ്ക്കും. നിന്റെ നടപ്പിനൊത്തവണ്ണം നിന്നെ ഞാൻ ന്യായം വിധിക്കുകയും നിന്റെ സകല മ്ലേച്ഛതകളും നിന്റെമേൽ വരുത്തുകയും ചെയ്യും. എന്റെ കണ്ണ് നിന്നോട് ആദരവു കാണിക്കുകയില്ല, ഞാൻ കരുണ കാട്ടുകയുമില്ല; നിന്റെ നടപ്പിനു തക്കവണ്ണം ഞാൻ നിനക്കു പകരം ചെയ്യും, നിന്റെ മ്ലേച്ഛതകൾ നിന്റെ നടുവിൽ ഇരിക്കും. അപ്പോൾ ഞാൻ നിന്റെ പിതാവ് ആകുന്നു എന്നു നീ അറിയും. പരമാധികാരിയായ പിതാവ് ഇപ്രകാരം അരുളിച്ചെയ്യുന്നു: അനർഥം! മറ്റൊന്നിനോടും സദൃശമല്ലാത്ത അനർഥം—ഇതാ, അതു വരുന്നു! അന്ത്യം വന്നിരിക്കുന്നു! അന്ത്യം വന്നിരിക്കുന്നു! അതു നിന്റെനേരേ ഉണർന്നിരിക്കുന്നു—ഇതാ, അതു വരുന്നു! ദേശത്തു വസിക്കുന്നവനേ, നാശം നിന്റെമേൽ വന്നിരിക്കുന്നു. സമയം വന്നിരിക്കുന്നു; ദിവസം സമീപിച്ചിരിക്കുന്നു—പരിഭ്രാന്തിയുടെ ദിവസം, പർവതങ്ങളിൽ ആനന്ദഘോഷത്തിന്റേതല്ല. ^a ഇനി വേഗത്തിൽ ഞാൻ എന്റെ ക്രോധം നിന്റെമേൽ പകരുകയും എന്റെ കോപം നിന്റെനേരേ അഴിച്ചുവിടുകയും ചെയ്യും. നിന്റെ നടപ്പിനൊത്തവണ്ണം നിന്നെ ഞാൻ ന്യായം വിധിക്കുകയും നിന്റെ സകല മ്ലേച്ഛതകളും നിന്റെമേൽ വരുത്തുകയും ചെയ്യും. എന്റെ കണ്ണ് ആദരവു കാണിക്കുകയില്ല, ഞാൻ കരുണ കാട്ടുകയുമില്ല; നിന്റെ നടപ്പിനൊത്തവണ്ണം ഞാൻ നിനക്കു പകരം ചെയ്യും, നിന്റെ മ്ലേച്ഛതകൾ നിന്റെ നടുവിൽ ഇരിക്കും. അപ്പോൾ അടിക്കുന്നവനായ നിന്റെ പിതാവ് ഞാൻ ആകുന്നു എന്നു നീ അറിയും. ഇതാ, ആ ദിവസം! ഇതാ, അതു വരുന്നു! നാശം പുറപ്പെട്ടിരിക്കുന്നു; വടി പൂത്തിരിക്കുന്നു, അഹങ്കാരം തളിർത്തിരിക്കുന്നു. അതിക്രമം ദുഷ്ടതയുടെ വടിയായി ഉയർന്നിരിക്കുന്നു. അവരിൽ ആരും ശേഷിക്കുകയില്ല—അവരുടെ പുരുഷാരത്തിൽ ആരും, അവരുടെ സമ്പത്തിൽ ഒന്നും— അവരുടെ ഇടയിൽ വിലയേറിയതൊന്നും ഇല്ല. സമയം വന്നിരിക്കുന്നു; ദിവസം എത്തിയിരിക്കുന്നു. വാങ്ങുന്നവൻ സന്തോഷിക്കരുത്, വിൽക്കുന്നവൻ ദുഃഖിക്കുകയുമരുത്, എന്തെന്നാൽ അവരുടെ സകല പുരുഷാരത്തിന്മേലും ക്രോധം ഇരിക്കുന്നു. ഇരുവരും ജീവനോടിരിക്കുമ്പോൾത്തന്നെ, വിറ്റവൻ താൻ വിറ്റതിലേക്കു മടങ്ങിവരികയില്ല. എന്തെന്നാൽ അവരുടെ സകല പുരുഷാരത്തിനെതിരേയുള്ള ദർശനം മടക്കപ്പെടുകയില്ല, അവനവന്റെ പാപംനിമിത്തം ആർക്കും തന്റെ ജീവനെ പിടിച്ചുനിർത്താൻ കഴിയുകയുമില്ല.

അവർ കാഹളം ഊതി സകലവും ഒരുക്കിയിരിക്കുന്നു, എങ്കിലും ആരും യുദ്ധത്തിനു പോകുന്നില്ല, എന്തെന്നാൽ അവരുടെ സകല പുരുഷാരത്തിന്മേലും എന്റെ ക്രോധം ഇരിക്കുന്നു. വാൾ പുറത്ത്; മഹാമാരിയും ക്ഷാമവും അകത്ത്. വയലിലുള്ളവൻ വാളാൽ മരിക്കും, നഗരത്തിലുള്ളവനെ—ക്ഷാമവും മഹാമാരിയും വിഴുങ്ങിക്കളയും. അവരിൽ രക്ഷപ്പെടുന്നവർ താഴ്‌വരകളിലെ പ്രാവുകളെപ്പോലെ പർവതങ്ങളിലേക്ക് ഓടിപ്പോകും, എല്ലാവരും അവനവന്റെ പാപത്തെക്കുറിച്ചു കുറുകിക്കൊണ്ടുതന്നെ. എല്ലാ കൈകളും തളരും, എല്ലാ മുഴങ്കാലുകളും വെള്ളംപോലെ ആയിത്തീരും. അവർ ചാക്കുശീല ധരിക്കും, ഭീതി അവരെ മൂടും; എല്ലാ മുഖത്തും ലജ്ജയുണ്ടാകും, എല്ലാ തലയും മൊട്ടയടിക്കപ്പെടും. അവർ തങ്ങളുടെ വെള്ളി തെരുവുകളിലേക്ക് എറിഞ്ഞുകളയും, അവരുടെ സ്വർണം അശുദ്ധവസ്തുവായി ഗണിക്കപ്പെടും. എന്റെ ക്രോധത്തിന്റെ ദിവസത്തിൽ അവരുടെ വെള്ളിക്കും സ്വർണത്തിനും അവരെ രക്ഷിക്കാൻ കഴിയുകയില്ല. അവരുടെ വിശപ്പടക്കാനോ വയറു നിറയ്ക്കാനോ അതിനു കഴിയുകയില്ല, എന്തെന്നാൽ അതായിരുന്നു അവരെ പാപത്തിലേക്കു നയിച്ച ഇടർച്ചക്കല്ല്. തങ്ങളുടെ ആഭരണങ്ങളുടെ ഭംഗിയിൽ അവർ അഭിമാനിച്ചു, അവ ഉപയോഗിച്ച് തങ്ങളുടെ മ്ലേച്ഛവിഗ്രഹങ്ങളും നീചവിഗ്രഹങ്ങളും ഉണ്ടാക്കി. അതുകൊണ്ട് ഈ വസ്തുക്കളെ ഞാൻ അവർക്ക് ഒരു അശുദ്ധവസ്തുവാക്കിയിരിക്കുന്നു. ഈ വസ്തുക്കളെ ഞാൻ അന്യജാതിക്കാർക്കു കൊള്ളയായും ഭൂമിയിലെ ദുഷ്ടന്മാർക്കു കവർച്ചയായും ഏല്പിച്ചുകൊടുക്കും, അവർ അതിനെ അശുദ്ധമാക്കും. ഞാൻ എന്റെ മുഖം അവരിൽനിന്നു തിരിച്ചുകളയും, അവർ എന്റെ നിധിസ്ഥാനത്തെ അശുദ്ധമാക്കും; കവർച്ചക്കാർ അതിൽ കടന്ന് അതിനെ അശുദ്ധമാക്കും. ചങ്ങല ഉണ്ടാക്കുക! എന്തെന്നാൽ ദേശം രക്തച്ചൊരിച്ചിലിന്റെ കുറ്റങ്ങളാൽ നിറഞ്ഞിരിക്കുന്നു, നഗരം അതിക്രമത്താൽ നിറഞ്ഞിരിക്കുന്നു. ജാതികളിൽ അതിനീചന്മാരെ ഞാൻ വരുത്തും, അവർ അവരുടെ വീടുകൾ കൈവശമാക്കും. ബലവാന്മാരുടെ അഹങ്കാരത്തെ ഞാൻ ഇല്ലാതാക്കും, അവരുടെ വിശുദ്ധസ്ഥലങ്ങൾ അശുദ്ധമാക്കപ്പെടും. മനോവ്യഥ വരുമ്പോൾ അവർ സമാധാനം അന്വേഷിക്കും, എന്നാൽ അത് ഉണ്ടാകുകയില്ല. അനർഥത്തിന്മേൽ അനർഥം വരും, കിംവദന്തിയിന്മേൽ കിംവദന്തിയും. അവർ പ്രവാചകനോടു ദർശനം തേടും, എന്നാൽ പുരോഹിതനിൽനിന്ന് ഉപദേശവും മൂപ്പന്മാരിൽനിന്ന് ആലോചനയും നശിച്ചുപോകും. രാജാവു ദുഃഖിക്കും, പ്രഭു നിരാശയിൽ പൊതിയപ്പെടും, ദേശത്തെ ജനത്തിന്റെ കൈകൾ വിറയ്ക്കും. അവരുടെ സ്വന്തം നടപ്പിനൊത്തവണ്ണം ഞാൻ അവരോടു പെരുമാറും, അവരുടെ സ്വന്തം അളവുകോലാൽ ഞാൻ അവരെ ന്യായം വിധിക്കും. അപ്പോൾ ഞാൻ അവരുടെ പിതാവ് ആകുന്നു എന്ന് അവർ അറിയും.