ଅନ୍ତିମ କାଳ ଉପସ୍ଥିତ

ଆମର ପିତାଙ୍କ ବାକ୍ୟ କେବଳ ଏତିକି: ଶେଷ। ସମୟ ବାକି ଥିବା ଚେତାବନୀ ନୁହେଁ: ସର୍ବନାଶ ଆସି ପହଞ୍ଚିଛି, କିଣାଳି ଓ ବିକାଳି ଉଭୟେ ସବୁକିଛି ହରାନ୍ତି, ଓ ରୂପା ଓ ସୁନା ଅକାମୀ ବୋଲି ରାସ୍ତାରେ ଫିଙ୍ଗି ଦିଆଯାଏ। ଭାବବାଦୀ, ଯାଜକ ଓ ପ୍ରାଚୀନ ସମସ୍ତଙ୍କର ପରାମର୍ଶ ସରିଯାଏ। ଏଠାରେ କିଛି ହିଁ କୋମଳ କରାଯାଇ ନାହିଁ।

ଅଧ୍ୟାୟ 7।

ଆମ୍ଭମାନଙ୍କ ପିତାଙ୍କ ବାକ୍ୟ ମୋʼ ନିକଟରେ ଉପସ୍ଥିତ ହୋଇ କହିଲା,

ପୁଣି ହେ ମନୁଷ୍ୟପୁତ୍ର, ସର୍ବାଧିପତି ପିତା ଇସ୍ରାଏଲ ଦେଶ ବିଷୟରେ ଏହା କହନ୍ତି, ଅନ୍ତିମ କାଳ ଉପସ୍ଥିତ! ଦେଶର ଚାରି ପ୍ରାନ୍ତ ଉପରେ ଅନ୍ତିମ କାଳ ଆସୁଅଛି। ବର୍ତ୍ତମାନ ତୁମ୍ଭ ଉପରେ ଅନ୍ତିମ କାଳ ଆସିଅଛି, ଆଉ ଆମ୍ଭେ ତୁମ୍ଭ ବିରୁଦ୍ଧରେ ଆପଣା କ୍ରୋଧ ପ୍ରେରଣ କରିବା। ଆମ୍ଭେ ତୁମ୍ଭ ଆଚରଣ ଅନୁସାରେ ତୁମ୍ଭର ବିଚାର କରିବା ଓ ତୁମ୍ଭର ସକଳ ଘୃଣ୍ୟ କର୍ମ ତୁମ୍ଭ ଉପରକୁ ଆଣିବା। ଆମ୍ଭ ଚକ୍ଷୁ ତୁମ୍ଭକୁ ଦୟା କରିବ ନାହିଁ, କିଅବା ଆମ୍ଭେ କରୁଣା କରିବା ନାହିଁ; ଆମ୍ଭେ ତୁମ୍ଭ ଆଚରଣର ଫଳ ତୁମ୍ଭକୁ ଦେବା, ଆଉ ତୁମ୍ଭର ଘୃଣ୍ୟ କର୍ମ ତୁମ୍ଭ ମଧ୍ୟରେ ରହିବ। ସେତେବେଳେ ଆମ୍ଭେ ଯେ ତୁମ୍ଭର ପିତା, ଏହା ତୁମ୍ଭେ ଜାଣିବ। ସର୍ବାଧିପତି ପିତା ଏହା କହନ୍ତି, ବିପଦ! ଅତୁଳନୀୟ ବିପଦ—ଦେଖ, ତାହା ଆସୁଅଛି! ଅନ୍ତିମ କାଳ ଆସିଅଛି! ଅନ୍ତିମ କାଳ ଆସିଅଛି! ତାହା ତୁମ୍ଭ ବିରୁଦ୍ଧରେ ଜାଗ୍ରତ ହୋଇଅଛି—ଦେଖ, ତାହା ଆସୁଅଛି! ହେ ଦେଶନିବାସୀ, ତୁମ୍ଭ ଉପରେ ବିନାଶ ଆସିଅଛି। ସମୟ ଉପସ୍ଥିତ ହୋଇଅଛି; ସେ ଦିନ ନିକଟ—ପର୍ବତ ଉପରେ ଆନନ୍ଦଧ୍ଵନିର ଦିନ ନୁହେଁ, ମାତ୍ର ଆତଙ୍କର ଦିନ। ^a ବର୍ତ୍ତମାନ ଅଚିରେ ଆମ୍ଭେ ତୁମ୍ଭ ଉପରେ ଆପଣା କୋପ ଢାଳିବା ଓ ତୁମ୍ଭ ବିରୁଦ୍ଧରେ ଆପଣା କ୍ରୋଧ ଉତ୍ପନ୍ନ କରିବା। ଆମ୍ଭେ ତୁମ୍ଭ ଆଚରଣ ଅନୁସାରେ ତୁମ୍ଭର ବିଚାର କରିବା ଓ ତୁମ୍ଭର ସକଳ ଘୃଣ୍ୟ କର୍ମ ତୁମ୍ଭ ଉପରକୁ ଆଣିବା। ଆମ୍ଭ ଚକ୍ଷୁ ଦୟା କରିବ ନାହିଁ, କିଅବା ଆମ୍ଭେ କରୁଣା କରିବା ନାହିଁ; ଆମ୍ଭେ ତୁମ୍ଭ ଆଚରଣ ଅନୁସାରେ ତୁମ୍ଭକୁ ପ୍ରତିଫଳ ଦେବା, ଆଉ ତୁମ୍ଭର ଘୃଣ୍ୟ କର୍ମ ତୁମ୍ଭ ମଧ୍ୟରେ ରହିବ। ସେତେବେଳେ ଆମ୍ଭେ ଯେ ତୁମ୍ଭର ପ୍ରହାରକାରୀ ପିତା, ଏହା ତୁମ୍ଭେ ଜାଣିବ। ଦେଖ, ସେ ଦିନ! ଦେଖ, ତାହା ଆସୁଅଛି! ବିନାଶ ବାହାରିଅଛି; ଯଷ୍ଟି ପୁଷ୍ପିତ ହୋଇଅଛି, ଅହଙ୍କାର ପଲ୍ଲବିତ ହୋଇଅଛି। ଦୌରାତ୍ମ୍ୟ ଉଠି ଦୁଷ୍ଟତାର ଯଷ୍ଟି ହୋଇଅଛି। ସେମାନଙ୍କ ମଧ୍ୟରୁ କେହି ଅବଶିଷ୍ଟ ରହିବେ ନାହିଁ— ସେମାନଙ୍କ ଜନତା ମଧ୍ୟରୁ କେହି ନୁହେଁ, ସେମାନଙ୍କ ସମ୍ପତ୍ତି ମଧ୍ୟରୁ କିଛି ନୁହେଁ—ଆଉ ସେମାନଙ୍କ ମଧ୍ୟରେ ମୂଲ୍ୟବାନ କିଛି ନାହିଁ। ସମୟ ଉପସ୍ଥିତ ହୋଇଅଛି; ସେ ଦିନ ଆସିଅଛି। କ୍ରେତା ଆନନ୍ଦ ନ କରୁ ଓ ବିକ୍ରେତା ବିଳାପ ନ କରୁ, କାରଣ ସେମାନଙ୍କ ସମଗ୍ର ଜନତା ଉପରେ କୋପ ଉପସ୍ଥିତ। ବିକ୍ରେତା ଯାହା ବିକ୍ରୟ କରିଅଛି, ତାହା ପୁନର୍ବାର ପାଇବ ନାହିଁ, ଉଭୟେ ଜୀବିତ ଥିଲେ ହେଁ। କାରଣ ସେମାନଙ୍କ ସମଗ୍ର ଜନତା ବିରୁଦ୍ଧରେ ଥିବା ଦର୍ଶନ ନିବୃତ୍ତ ହେବ ନାହିଁ, ଆଉ ଆପଣା ଅଧର୍ମ ସକାଶୁ କେହି ଆପଣା ଜୀବନ ରକ୍ଷା କରିପାରିବ ନାହିଁ।

ସେମାନେ ତୂରୀ ବଜାଇ ସମସ୍ତ ବିଷୟ ପ୍ରସ୍ତୁତ କରିଅଛନ୍ତି, ମାତ୍ର କେହି ଯୁଦ୍ଧକୁ ଯାଉ ନାହିଁ, କାରଣ ସେମାନଙ୍କ ସମଗ୍ର ଜନତା ଉପରେ ଆମ୍ଭର କୋପ ଉପସ୍ଥିତ। ବାହାରେ ଖଡ୍ଗ; ଭିତରେ ମହାମାରୀ ଓ ଦୁର୍ଭିକ୍ଷ। ଯେ କ୍ଷେତ୍ରରେ ଥାଏ, ସେ ଖଡ୍ଗରେ ମରିବ, ଆଉ ଯେ ନଗରରେ ଥାଏ—ଦୁର୍ଭିକ୍ଷ ଓ ମହାମାରୀ ତାହାକୁ ଗ୍ରାସ କରିବ। ସେମାନଙ୍କ ମଧ୍ୟରୁ ଯେଉଁମାନେ ରକ୍ଷା ପାଆନ୍ତି, ସେମାନେ ଉପତ୍ୟକାର କପୋତ ତୁଲ୍ୟ ପର୍ବତକୁ ପଳାଇବେ, ପ୍ରତ୍ୟେକ ଆପଣା ଆପଣା ଅଧର୍ମ ସକାଶୁ ଆର୍ତ୍ତନାଦ କରିବେ। ପ୍ରତ୍ୟେକ ହସ୍ତ ଦୁର୍ବଳ ହେବ, ଆଉ ପ୍ରତ୍ୟେକ ଆଣ୍ଠୁ ଜଳ ତୁଲ୍ୟ ହେବ। ସେମାନେ ଶୋକବସ୍ତ୍ର ପରିଧାନ କରିବେ, ଆଉ ଆତଙ୍କ ସେମାନଙ୍କୁ ଆଚ୍ଛାଦନ କରିବ; ପ୍ରତ୍ୟେକ ମୁଖ ଉପରେ ଲଜ୍ଜା ରହିବ, ଆଉ ପ୍ରତ୍ୟେକ ମସ୍ତକ ମୁଣ୍ଡନ ହୋଇ ଟାଙ୍ଗରା ହେବ। ସେମାନେ ଆପଣା ରୂପା ସଡ଼କରେ ପକାଇ ଦେବେ, ଆଉ ସେମାନଙ୍କ ସୁନା ଅଶୁଚି ବସ୍ତୁ ତୁଲ୍ୟ ଗଣିତ ହେବ। ଆମ୍ଭ କୋପର ଦିନରେ ସେମାନଙ୍କ ରୂପା ଓ ସୁନା ସେମାନଙ୍କୁ ଉଦ୍ଧାର କରିପାରିବ ନାହିଁ। ତାହା ସେମାନଙ୍କ କ୍ଷୁଧା ତୃପ୍ତ କରିପାରିବ ନାହିଁ କିମ୍ବା ସେମାନଙ୍କ ଉଦର ପୂର୍ଣ୍ଣ କରିପାରିବ ନାହିଁ, କାରଣ ତାହା ସେମାନଙ୍କୁ ପାପରେ ଠେଲି ଦେଉଥିବା ବିଘ୍ନଜନକ ବସ୍ତୁ ଥିଲା। ସେମାନେ ଆପଣା ଆଭରଣର ସୌନ୍ଦର୍ଯ୍ୟରେ ଗର୍ବ କଲେ ଓ ତଦ୍ଦ୍ଵାରା ଆପଣା ଘୃଣ୍ୟ ପ୍ରତିମା ଓ ଅଶ୍ଲୀଳ ଦେବତା ନିର୍ମାଣ କଲେ। ଏଥିପାଇଁ ଆମ୍ଭେ ଏହିସବୁ ବିଷୟ ସେମାନଙ୍କ ପ୍ରତି ଅଶୁଚି ବସ୍ତୁ କରିଅଛୁ। ଆମ୍ଭେ ଏହିସବୁ ବିଷୟ ଲୁଟ ରୂପେ ବିଦେଶୀମାନଙ୍କୁ ଓ ଅପହୃତ ଦ୍ରବ୍ୟ ରୂପେ ପୃଥିବୀର ଦୁଷ୍ଟମାନଙ୍କୁ ସମର୍ପଣ କରିବା, ଆଉ ସେମାନେ ତାହା ଅଶୁଚି କରିବେ। ଆମ୍ଭେ ସେମାନଙ୍କଠାରୁ ଆପଣା ମୁଖ ଫେରାଇବା, ଆଉ ସେମାନେ ଆମ୍ଭର ପ୍ରିୟ ସ୍ଥାନ ଅଶୁଚି କରିବେ; ଡକାୟତମାନେ ତହିଁ ମଧ୍ୟରେ ପ୍ରବେଶ କରି ତାହା ଅଶୁଚି କରିବେ। ଶୃଙ୍ଖଳ ନିର୍ମାଣ କର! କାରଣ ଦେଶ ରକ୍ତପାତର ଅପରାଧରେ ପରିପୂର୍ଣ୍ଣ ଓ ନଗର ଦୌରାତ୍ମ୍ୟରେ ପରିପୂର୍ଣ୍ଣ। ଆମ୍ଭେ ନାନା ଦେଶୀୟ ଲୋକଙ୍କ ମଧ୍ୟରୁ ଅତି ଦୁଷ୍ଟମାନଙ୍କୁ ଆଣିବା, ଆଉ ସେମାନେ ସେମାନଙ୍କ ଗୃହସବୁ ଅଧିକାର କରିବେ। ଆମ୍ଭେ ବଳବାନମାନଙ୍କ ଅହଙ୍କାର ନିବୃତ୍ତ କରିବା, ଆଉ ସେମାନଙ୍କ ପବିତ୍ର ସ୍ଥାନସବୁ ଅଶୁଚି ହେବ। ଯେତେବେଳେ ଯନ୍ତ୍ରଣା ଆସିବ, ସେତେବେଳେ ସେମାନେ ଶାନ୍ତି ଅନ୍ଵେଷଣ କରିବେ, ମାତ୍ର ତାହା ମିଳିବ ନାହିଁ। ବିପଦ ଉପରେ ବିପଦ ଆସିବ, ଆଉ ଜନରବ ଉପରେ ଜନରବ। ସେମାନେ ଭାବବାଦୀଙ୍କଠାରୁ ଦର୍ଶନ ଅନ୍ଵେଷଣ କରିବେ, ମାତ୍ର ଯାଜକଠାରୁ ବ୍ୟବସ୍ଥା ଓ ପ୍ରାଚୀନବର୍ଗଙ୍କଠାରୁ ମନ୍ତ୍ରଣା ଲୁପ୍ତ ହେବ। ରାଜା ବିଳାପ କରିବେ, ଅଧିପତି ନିରାଶାରେ ଆଚ୍ଛନ୍ନ ହେବେ, ଆଉ ଦେଶସ୍ଥ ଲୋକଙ୍କ ହସ୍ତ କମ୍ପିତ ହେବ। ଆମ୍ଭେ ସେମାନଙ୍କ ଆପଣା ଆଚରଣ ଅନୁସାରେ ସେମାନଙ୍କ ପ୍ରତି ବ୍ୟବହାର କରିବା, ଆଉ ସେମାନଙ୍କ ଆପଣା ବିଚାର ଅନୁସାରେ ଆମ୍ଭେ ସେମାନଙ୍କର ବିଚାର କରିବା। ସେତେବେଳେ ଆମ୍ଭେ ଯେ ସେମାନଙ୍କ ପିତା, ଏହା ସେମାନେ ଜାଣିବେ।