Ezekiel 7

7 ¹Ithumwui Avāwui tui china ili rāhānga:

²Kala na, miwui naomayara, Israel ngaleili Proho Avāna hithāda hānga: Khanao rāhaira! Khanao chi ngalei chiwui achikun matili rāhaira. ³Ara khanao chi nawuitungli rāhaira, kala iwui malungkhavāt nawuitungli chihotāra. Nawui apong athishurda ina nali bichar sāra, kala nawui ningkakachai ot saikora nawuitungli khuirāra. ⁴Imikna nali mayangkheimara, kala ina malumashanmimara; nawui apongwui vang ina nali sāman mira, kala nawui ningkakachai ot saikora nawui alungli leira. Chithāda nana I nawui Avāna kaji theikhuipaira. ⁵Proho Avāna hithāda hānga: Kalākashi! Kalākashi khangatei akhanida makhathā; yanglu, chi rārāli! ⁶Khanao rāhaira! Khanao chi rāhaira! Chi nawuitungli ngakarthuihaira; yanglu, chi rārāli! ⁷Unshimui nawuitungli rāhaira, na ngaleili kapama. Atam rāhaira; ngashun nganaihaira; chi khangachee ngashunna, kaphungbingli khamathānna vaowa ngashun maningmana. ^a a v7 Khangkhuiwui Israelli phungreibing chi mibingwui ngaram phanit kala mareojao sāwui pambing sai; kachaikhamei chiya, hi zimikna khamathān maningla khangachee tang khuiraina. ⁸Ara thākta ina iwui malungkhavāt nawuitungli rotāra, kala iwui malung nawuitungli chitheira. Nawui apong athishurda ina nali bichar sāra, kala nawui ningkakachai ot saikora nawuitungli khuirāra. ⁹Imikna mayangkheimara, kala ina malumashanmimara; nawui apong athishurda ina nali sāman mira, kala nawui ningkakachai ot saikora nawui alungli leira. Chithāda nana I nawui Avā, kashaoa chi kaji theikhuipaira. ¹⁰Yanglu, ngashun chi rāhaira! Yanglu, chi rārāli! Unshimui shokhaira; lijei mawonphokhaira, khayāning ashon phokhaira. ¹¹Khangashao chi juikai makaphāwui lijei sāhaira. Athumwui alungli khipākha maleisāmara; athumwui yarui khikha, athumwui lan khikha, athumwui ngachaili katong khikha maleimara. ¹²Atam rāhaira; ngashun ungshunghaira. Khalopa china mamathānranu, kala khayorapā china machapkhangachāranu, kaja malungkhavāt chi athumwui yarui saikorawuitungli lei. ¹³Khanini ara kharing eina leilala, khayorapā china awui yorkahai chili malatungmara. Kaja athumwui yarui saikorawuitungli khamahā chi makaimara, kala awui moreiwui vang khipākha awui mirin chi masingtitshapmara.

¹⁴Athumna talla̱ khonghaowa, kala ot saikora vāusahaira, kha khipākha raili mavāmara, kaja iwui malungkhavāt chi athumwui yarui saikorawuitungli lei. ¹⁵Raighai chi ayarli lei; kazātkashi kala chāmrei chi alungli lei. Luili leikasāpā china raighai eina thira, kala keinungli leikasāpāli, chāmrei kala kazātkashina ali tukshaira. ¹⁶Athumwui alungli latshok kahaibing saikora, mi kachiva̱na khalattawui moreiwui vang sifada, tampākwui nāsha̱bing thāda kaphungbingli yāmvāra. ¹⁷Pāng saikora tāta̱haora, kala khuksao saikora tara̱ thāda ngazanhaora. ¹⁸Athumna bora ngavaira, kala khangachee khangachāna athumli pemra; mai kachiva̱li maikashi leira, kala kui kachiva̱ ngakokserhaira. ¹⁹Athumna athumwui lupā chānreili horyānghaora, kala athumwui sinā makathar ot thāda ngasāra. Athumwui lupā kala sināna iwui malungkhavātwui atamli athumli kanshok ngasakrarmana. China athumli maphauimara, athumwui hupva̱la machipemmara, khikhalajila china phei ngaphok khavai chi athumli morei sāngasaka. ²⁰Athumna athumwui ornanwui khamathāli langsot sai, kala chi eina athumwui ningkakachai meoma̱ kala mayangkhangai meoma̱bing sākhui. Chiwui vang eina ina chibing athumwui vang makathar ot sāmi kahaina. ²¹Ina chibing yur kateibingli sāshai sāda, kala okathuiwui makhayābingli otyur sāda khuithuira, kala athumna chi sākhamāngra. ²²Ina imai athumwui eina ngathumhaira, kala athumna iwui sākhangasak pam sākhamāngra; phama̱kashaobingna chi zangda sākhamāngra. ²³Mari-khara̱ sālu! khikhalajila ngalei hi ashee tāmi moreina pemtinghai, kala keinung chi khangashaona pemtinghai. ²⁴Athumwui shimbing sāman khui khavai, ina yurbingwui ngachaili makaphā phungmeikap chi khuirāra. Kapangpangabingwui langsot ina shimān ngasakra, kala athumwui kathara pambing sākhamāng ngasakra. ²⁵Kakhanang rā tharan, athumna chingri kahai phaora, kha chi maleimara. ²⁶Kalākashitungli kalākashi rāra, kala paotungli pao samphangra. Athumna marānwui eina khamahā phaora, kha pāngmonwui eina ain shimānra, kala khararnaobingwui eina hāngkachithei shimānra. ²⁷Awungana chapngachāra, wungnaona khāsut mahaina pemra, kala ngaleiwui mibingwui pāng nganukra. Athum khalattawui acham athishurda ina athumli sāmira, kala athum khalattawui ningphanin athishurda ina athumli bichar sāra. Chithāda athumna I athumwui Avā jikahaina chi theira.