Avāna Meoma̱li Khokharumli Bichar Sā
Ezekielna ramkaphung kala langkhal khalei Israelwui kaphungli prophet tui hormangkhui, kala sithui miyarana athumwui vareshiwui alāngli kacho haokhavai da ali hanga. Kha ramnaoli mi chuk kharingkhavai, ithumwui Avāli ungkhui, kala athumna sāhai eina athumwui mangli mahaokhui.
6 1Ithumwui Avāwui tui china ili rāhānga:
2Miwui naomayara, Israelwui kaphungbingshong ngareivāda athumli makhamayā tui marānmilu. 3Israelwui kaphungbing, Proho Avāwui tui hi nganālu, da hānglu. Proho Avāna kaphungbing kala phungrābing, kongrābing kala tampākbingli hi hithāda hānga: Yanglu, ina raighai nathumwuitungli khuirāra, kala nathumwui kajuipambing sāshimānhaora. a a v3 Kajuipam chiya kaphungtonli khalei khorum otram sai, chili Israelna vare kateibingli khorum sai. 4Nathumwui hanphutbing sākhaitāserhaora, nathumwui nganamkaphā hanphutbing shaokhaiserhaora, kala ina nathumwui shaothat kahaibingli nathumwui meoma̱bingwui mangāli horshokhaora. 5Ina Israelwui mibingwui kathingun athumwui meoma̱bingwui mangāli haihaora, kala nathumwui ara̱kui nathumwui hanphutbing kuimareida chaiyāngmihaora. 6Nathum sompam apam kachida, keinungbing ramcho ngasāra kala kajuipambing sākazamserhaora, chieina nathumwui hanphutbing sākazama ramcho ngasāra, nathumwui meoma̱bing shaokhaida sāshimānserhaora, nathumwui nganamkaphā hanphutbing sātekserhaora, kala nathumna sākahai saikora sāshimitmiserhaora. 7Nathumwui ngachaili shaothat kahaibing pitāra, kala nathumna ina nathumwui Avā china da theira.
8Chithālala ina shākkahaibing tāngasakra: nathum ngaleitungli chaiyāngmi tharan, kaikhana yurbingwui ngachaili raighai eina latshokra. 9Chithāda nathumwui shākkahaibing china athumli tukthui kahai yurbingwui ngachaili ili phaningungra; ina athumwui iwui eina ngareithui kahai chipat wuklung, kala athumwui meoma̱bingshong ngahānngai mikna kathada sākhayangmi kahaina. Athumna sākahai makhayāwui vang kala athumwui ningkakachai ot saikorawui vang, athumna athum khalattali yangkharingra. b b v9 Ithumwui Avāna hānga, awui khalattawui wuklung chi anaobingwui chipat kahaiwui vang sākhayangmi kahaina. Hili bichar chi khamā za̱kahai leikashi eina rāra, kasik makhuikasangwui eina maningmana. 10Kala athumna ina athumwui Avā china da theira; ina athumwuitungli hi makaphā tākhavai da aremali hānga maningmana.
11Proho Avāna hithāda hānga: Nathumwui pāng kaphelu, nathumwui pheina ngalei shaolu, kala Israelwui shimwui makhayā kala ningkakachai ot saikorawui vang "Kakhanang!" da vaolu; kaja athum raighai, chāmrei kala kazātkashi eina thira. 12Katāva̱li khalei china kazātkashi eina thira, rāki khalei china raighai eina thira, kala shākkahai taihaida khalei china chāmrei eina thira. Chithāda ina iwui malungkhavāt athumwuitungli ungshungmira. 13Athumwui shaothat kahaibing china athumwui meoma̱bingwui ngachaili, athumwui hanphutbing kuimareida, kajuia phungrā saikorali, kaphungton saikorali, khamateka thingphei kachiva̱li kala pompa̱ta̱ kahai shirimthing kachiva̱li, athumna athumwui meoma̱ saikorali nganamkaphā otyur riktai kaji apambing chili khalei tharan, nathumna ina nathumwui Avā china da theira. 14Ina athumwuitungli ipāng katingshokra, kala athum sompam apam kachida, lamhāngwui eina thuilaga Riblah vāpeida, ngalei chi ramcho sāngasakra. Chithāda athumna ina athumwui Avā china da theira.
