Dimtengen ti Gibus

Ti sao ni Ama ket ti panungpalan lattan. Saan a pakdaar nga addaan pay iti oras: dimteng ti didigra, agpada a mapukaw ti amin dagiti manggatang ken agtagilako, ket ti pirak ken balitok ket maipurruak kadagiti kalsada kas awan serserbina. Dagiti propeta, padi ken panglakayen ket maawanan amin iti balakad. Awan ti napalag-an ditoy.

Agsao ni Amatayo kadagiti bersikulo 2–27

Kapitulo 7.

Immay kaniak ti sao ni Amatayo, a kunana:

Ket sika, anak ti tao—daytoy ti kuna ti Soberano nga Ama iti daga ti Israel: Gibus! Dumteng ti gibus kadagiti uppat a suli ti daga. Ita adda iti ngatuenmo ti gibus, ket ibaonkonto ti pungtotko kenka. Usigenka segun kadagiti wagasmo ken iyegko kenka amin a makarimon nga aramidmo. Dikanto kaasian ti matak, ken diakanto asian; bayadankanto kadagiti wagasmo, ket addanto iti tengngam dagiti makarimon nga aramidmo. Kalpasanna, maammuamto a siak ni Amam. Kastoy ti kuna ti Soberano nga Ama: Didigra! Maysa a didigra a awan kapadana—kitaenyo, umayen! Dimtengen ti gibus! Dimtengen ti gibus! Nagriingen a maibusor kenka—kitaem, umayen! Dimtengen kenka ti pannakadadael, sika nga agnaed iti daga. Dimtengen ti oras; asidegen ti aldaw—aldaw ti panagbuteng, saan a ti naragsak a panagpukkaw kadagiti bantay. ^a Iti saan a nagbayag, ibukbokkonto ti ungetko kenka ket ipaayko ti pungtotko a maibusor kenka. Usigenka segun kadagiti wagasmo ken iyegko kenka amin a makarimon nga aramidmo. Dikanto kaasian ti matak, ken diakanto asian; bayadankanto segun kadagiti wagasmo, ket addanto iti tengngam dagiti makarimon nga aramidmo. Kalpasanna, maammuamto a siak ni Amam, ti mangdangran. Kitaenyo, ti aldaw! Kitaenyo, umayen! Rimmuar ti pannakadadael; nagsabong ti sarukod, nagbukel ti kinatangsit. Timmakder ti kinaranggas a nagbalin a sarukod ti kinadangkes. Awan ti mabati kadakuada—awan iti taguobda, awan iti kinabaknangda— ken awan ti napateg kadakuada. Dimtengen ti oras; dimtengen ti aldaw. Saan koma nga agrag-o ti gumatang ken saan koma nga agladingit ti aglaklako, ta adda ti pungtot kadagiti amin a taguobda. Saan a makaisubli ti aglaklako iti inlakona, uray no agbibiagda pay laeng. Ta saan a mabaliwan ti sirmata a maibusor kadagiti amin a taguobda, ket gapu iti basolna awan ti makatengngel iti biagna.

Pinuyotda ti trumpeta ken insaganada amin, ngem awan ti mapan makigubat, ta adda ti pungtotko kadagiti amin a taguobda. Adda ti kampilan iti ruar; adda ti sakit ken bisin iti uneg. Ti adda iti talon matayto iti kampilan, ket ti adda iti siudad—ti bisin ken sakit ti mangibus kenkuana. Dagidiay makalibas kadakuada agtalawdanto nga agturong kadagiti bantay a kas kadagiti kalapati dagiti tanap, amin kadakuada agdung-dung-aw, tunggal maysa gapu iti bukodna a basol. Agkapsutto amin nga ima, ket agbalin a danum ti tunggal tumeng. Isuotda ti kawes ti panagleddaang, ket abbungan ida ti buteng; adda ti bain iti tunggal rupa, ket mapukisanto ti tunggal ulo. Ibellengda ti pilakda kadagiti kalsada, ket maibilangto a narugit dagiti balitokda. Saan a makaisalakan kadakuada ti pilakda ken balitokda iti aldaw ti pungtotko. Saan a mangted iti mapnek iti bisinda wenno mangpunno iti tianda, ta isu ti pakaitibkolan a nangiturong kadakuada iti basol. Impannakkelda ti kinapintas dagiti alahasda ket inaramidda kadagitoy dagiti makarimon nga ladawanda ken narugit a didiosen. Gapuna pinagbalinko dagitoy a banag a narugit kadakuada. Itedkonto dagitoy kas samsam kadagiti ganggannaet ken kas sinamsam kadagiti nadangkes iti daga, ket rugitanda daytoy. Iyadayokonto ti rupak kadakuada, ket rugitandanto ti napateg a lugarko; sumrek dagiti agtatakaw iti dayta ket rugitanda. Pandayenyo ti kadena! Ta napno ti daga iti nadara a pagbasolan ken napno ti siudad iti kinaranggas. Iyegkonto dagiti kadadangkesan kadagiti nasion tapno tagikuaenda dagiti balayda. Pukawenkonto ti kinatangsit dagiti napigsa, ket marugitanto dagiti nasantoan a lugarda. No dumteng ti panagrigat, agsapulda iti kappia, ngem awanto. Umay ti didigra iti rabaw ti didigra, ken ugong iti rabaw ti ugong. Agsapulda iti sirmata manipud iti mammadto, ngem mapukawto ti pannursuro manipud iti padi ken balakad manipud kadagiti panglakayen. Agleddaangto ti ari, maabbungan iti pannakaupay ti prinsipe, ket agpigerger dagiti ima dagiti tattao iti daga. Aramidenkonto kadakuada segun iti bukodda a tignay, ket segun kadagiti bukodda a pagbatayan usigenkoda. Kalpasanna, maammuandanto a siak ni Amada.