Kwanda ko Koboorun Yiemetap Jerusalem
Yaei Ezekiel yiemetap Kwandanyo ko uu kaboorunet eng' ooreet: matubaruk ne kipetee Jerusalem, irimeet ne po karnet ne koek tulweet, peetuusyek pogol somok ak tamanwogik sogool kirue eng' kebeberta age ak artam eng' kebeberta age, omiindo ne kiratilit ak peek che kikwae. Kong'ure agobo kobeelei omiindo eng' tuguuk che ya che punu chii, ak kigoochi tuguuk che ya che po teta eng' olooto.
Ng'alaali Kwandanyo eng' mustarisyek 1–13, 15–17
4 1“Inyee, Weeriitap chii, inam matubaruk, inde taing'ung', ak ipet eng' ineendet nganaseet—Jerusalem. 2Iyiem ineendet: iteech irimeet ne po yiemet konamgei ak ineendet, itogosta ng'ung'unyek koek tulweet ne konamgei ak ineendet, inde nganasook konamgei ak ineendet, ak inde tuguuk che ryepei irimennyi komoswek tugul. 3Inam kirambenit ne po karnet; inde koek irimeet ne po karnet eng' kwenutap inyee ak nganaseet. Igeer ineendet; kiyiemei, ak isiirtoi iyiem ineendet. Ni kaboorunet eng' kootap Israel.
4“Inyee, irue eng' kebebertang'ung' ne po kaataam, ak inde ng'oogistap kootap Israel eng' ineendet. Peetuusyek che irue eng' ineendet, ibaoryan ng'oogistonywa. 5Amu kaachamjin kenyiisyekwak che po ng'oogisto koek karogutap peetuusyek—peetuusyek pogol somok ak tamanwogik sogool—si ibaoryan ng'oogistap kootap Israel.
6“Ye iwong'u chooto, irue kogeny eng' kebebertang'ung' ne po tai, ak ibaoryan ng'oogistap kootap Judah peetuusyek artam; kaachamjin peetuut agenge eng' kenyiit age tugul. 7Iweigei iwe yiemet ne po Jerusalem, kobooto eung'ung' ne kaisuulakta, ak iamdosi ineendet. 8Keero, aratin rogoosyek si memuuchi iweigei kong'etee kebeberta agoi kebeberta age, agoi iwong'u peetuusyegap yiemeng'ung'.
9“Inam nganuuk, baale, sogoryek, igobek, mosongik, ak kusemet; inde eng' tereet agenge ak ichop eng' icheek magatyat. Iam eng' peetuusyek che irue eng' kebebertang'ung'—peetuusyek pogol somok ak tamanwogik sogool. 10Iweigei amitwogik che iame—ko uu shekelisyek tiptem eng' peetuut; iam eng' saaisyek che king'at. 11Inaga peek che kagikwa—ko uu kebebertap litait eng' peetuut; inaga eng' saaisyek che king'at. 12Iame koek magatinigap baale, ibeel eng' tainnywa piik tugul barak eng' eiyanigap chii.” 13Ak kole Kwandanyo, “Ou nooto anyun, oame lagogap Israel magatiannywa che ma tiliileen eng' kwenutap pororyosyek ole aoone icheek.”
14Yeityo ale, “Oo, Kiptaiyat Kwanda! Ma kaayaegei ne ma tiliil kata koigeny. Kobooch ming'inatennyu agoi nguno, ma kaaam kiy age tugul ne kome ineegei anan ne kagetonaton eng' tyong'ik, ak ma kagochut panyeek che wechei kutinnyu.”
15Koleenji, “Keero, achamin iboisyee eiyanigap teta ne kita eiyanigap chii, si ibeel magatiang'ung' barak eng' ineendet.”
16Koleenji, “Weeriitap chii, keero, atuiyei kirogindap magatyat eng' Jerusalem. Oame magatyat eng' weigei, kobooto rubeennateet, ak onaga peek eng' kakwaet, kobooto kwong'nateet, 17amu konyoorunot magatyat ak peek. Ogeeregei kobooto kwang'utyet, ak obeta eng' ng'oogistonywa.”