ଯିହିଜିକଲ 4 FHB Father's Heart Bible™

4 ¹“ହେ ମନୁଷ୍ୟପୁତ୍ର, ତୁମ୍ଭେ ଗୋଟିଏ ଇଟା ନେଇ ଆପଣା ସମ୍ମୁଖରେ ରଖ, ପୁଣି ତହିଁ ଉପରେ ଗୋଟିଏ ନଗର, ଅର୍ଥାତ୍‍ ଯିରୂଶାଲମ ଖୋଦନ କର। ²ପୁଣି ତାହା ବିରୁଦ୍ଧରେ ଅବରୋଧ ସ୍ଥାପନ କର; ତାହା ବିରୁଦ୍ଧରେ ଅବରୋଧ-ପ୍ରାଚୀର ନିର୍ମାଣ କର, ତାହା ବିରୁଦ୍ଧରେ ବନ୍ଧ ବାନ୍ଧ, ତାହା ବିରୁଦ୍ଧରେ ଛାଉଣି ସ୍ଥାପନ କର ଓ ତାହା ଚତୁର୍ଦ୍ଦିଗରେ ଯନ୍ତ୍ର ବସାଅ। ³ପୁଣି ତୁମ୍ଭେ ଗୋଟିଏ ଲୁହା ତାୱା ନେଇ ତୁମ୍ଭ ଓ ନଗର ମଧ୍ୟରେ ଲୌହ-ପ୍ରାଚୀର ସ୍ୱରୂପେ ତାହା ସ୍ଥାପନ କର; ଆଉ ତହିଁ ଆଡ଼େ ଆପଣା ମୁଖ ରଖ, ତାହା ଅବରୁଦ୍ଧ ହେବ ଓ ତୁମ୍ଭେ ତାହା ବିରୁଦ୍ଧରେ ଅବରୋଧ ଦୃଢ଼ କରିବ। ଏହା ଇସ୍ରାଏଲ ବଂଶ ନିମନ୍ତେ ଗୋଟିଏ ଚିହ୍ନ ଅଟେ।

⁴“ପୁଣି ତୁମ୍ଭେ ଆପଣା ବାମ ପାର୍ଶ୍ୱରେ ଶୟନ କର ଓ ତହିଁ ଉପରେ ଇସ୍ରାଏଲ ବଂଶର ଅପରାଧ ରଖ; ଯେତେ ଦିନ ତୁମ୍ଭେ ତହିଁ ଉପରେ ଶୟନ କରିବ, ସେତେ ଦିନ ତୁମ୍ଭେ ସେମାନଙ୍କ ଅପରାଧ ବହିବ। ⁵କାରଣ ଆମ୍ଭେ ସେମାନଙ୍କ ଅପରାଧର ବର୍ଷସମୂହକୁ ଦିନର ସଂଖ୍ୟା ସ୍ୱରୂପେ, ଅର୍ଥାତ୍‍ ତିନି ଶହ ନବେ ଦିନ ତୁମ୍ଭ ପ୍ରତି ନିରୂପଣ କରିଅଛୁ; ତହିଁରେ ତୁମ୍ଭେ ଇସ୍ରାଏଲ ବଂଶର ଅପରାଧ ବହିବ।

⁶“ପୁଣି ଏହିସବୁ ସମାପ୍ତ କଲା ଉତ୍ତାରେ ତୁମ୍ଭେ ଦ୍ୱିତୀୟ ଥର ଆପଣା ଡାହାଣ ପାର୍ଶ୍ୱରେ ଶୟନ କର ଓ ଚାଳିଶ ଦିନ ଯିହୂଦା ବଂଶର ଅପରାଧ ବହ; ଆମ୍ଭେ ତୁମ୍ଭ ପ୍ରତି ପ୍ରତି ବର୍ଷ ନିମନ୍ତେ ଏକ ଏକ ଦିନ ନିରୂପଣ କରିଅଛୁ। ⁷ପୁଣି ତୁମ୍ଭେ ଆପଣା ବାହୁ ଅନାବୃତ କରି ଯିରୂଶାଲମର ଅବରୋଧ ଆଡ଼େ ମୁଖ ରଖିବ ଓ ତାହା ବିରୁଦ୍ଧରେ ଭବିଷ୍ୟଦ୍‍ବାକ୍ୟ ପ୍ରଚାର କରିବ। ⁸ଆଉ ଦେଖ, ଆମ୍ଭେ ତୁମ୍ଭ ଅବରୋଧର ଦିନସମୂହ ସମାପ୍ତ ନ ହେବା ପର୍ଯ୍ୟନ୍ତ ତୁମ୍ଭେ ଯେପରି ଏ ପାର୍ଶ୍ୱରୁ ସେ ପାର୍ଶ୍ୱକୁ ଫେରି ନ ପାର, ଏଥିପାଇଁ ତୁମ୍ଭକୁ ରଜ୍ଜୁରେ ବାନ୍ଧିବା।

⁹“ପୁଣି ତୁମ୍ଭେ ଗହମ, ଯବ, ଶିମ୍ବ, ମସୂର, କାଙ୍ଗୁ ଓ ଜୱାର ନେଇ ଗୋଟିଏ ପାତ୍ରରେ ରଖ, ଆଉ ତହିଁରୁ ଆପଣା ନିମନ୍ତେ ରୁଟି ପ୍ରସ୍ତୁତ କର; ଯେତେ ଦିନ ତୁମ୍ଭେ ଆପଣା ପାର୍ଶ୍ୱରେ ଶୟନ କରିବ, ସେହି ସମସ୍ତ ଦିନ, ଅର୍ଥାତ୍‍ ତିନି ଶହ ନବେ ଦିନ ତାହା ଭୋଜନ କରିବ। ¹⁰ପୁଣି ତୁମ୍ଭେ ଯେଉଁ ଖାଦ୍ୟ ଭୋଜନ କରିବ, ତାହା ତୌଲ କରି, ଦିନକୁ ପ୍ରାୟ କୋଡ଼ିଏ ଶେକଲ ପରିମାଣରେ ଭୋଜନ କରିବ; ନିରୂପିତ ସମୟେ ସମୟେ ତାହା ଭୋଜନ କରିବ। ¹¹ଆଉ ତୁମ୍ଭେ ପରିମାଣ କରି ଜଳ ପାନ କରିବ, ଦିନକୁ ପ୍ରାୟ ଏକ ହିନର ଷଷ୍ଠାଂଶ; ନିରୂପିତ ସମୟେ ସମୟେ ତାହା ପାନ କରିବ। ¹²ଆଉ ତୁମ୍ଭେ ତାହା ଯବ ରୁଟି ତୁଲ୍ୟ ଭୋଜନ କରିବ ଓ ସେମାନଙ୍କ ସାକ୍ଷାତରେ ତାହା ମନୁଷ୍ୟର ମଳ ଉପରେ ସେକିବ।” ¹³ଆଉ ଆମ୍ଭମାନଙ୍କ ପିତା କହିଲେ, “ଆମ୍ଭେ ଇସ୍ରାଏଲ ସନ୍ତାନଗଣକୁ ଯେଉଁ ଦେଶୀୟମାନଙ୍କ ମଧ୍ୟକୁ ତଡ଼ିଦେବା, ସେମାନଙ୍କ ମଧ୍ୟରେ ସେମାନେ ଏହିପରି ଅଶୁଚି ରୂପେ ଆପଣାମାନଙ୍କ ରୁଟି ଭୋଜନ କରିବେ।”

¹⁴ସେତେବେଳେ ମୁଁ କହିଲି, “ହାୟ, ହେ ସର୍ବାଧିପତି ପିତା! ଦେଖ, ମୁଁ କେବେ ଆପଣାକୁ ଅଶୁଚି କରି ନାହିଁ; କାରଣ ବାଲ୍ୟକାଳଠାରୁ ଏ ପର୍ଯ୍ୟନ୍ତ ଆପେ ମଲା କିମ୍ବା ପଶୁ ଦ୍ୱାରା ବିଦୀର୍ଣ୍ଣ ହୋଇଥିବା କୌଣସି ବସ୍ତୁ ମୁଁ ଭୋଜନ କରି ନାହିଁ, ଆଉ ଘୃଣ୍ୟ ମାଂସ ମୋʼ ମୁଖରେ ପ୍ରବେଶ କରି ନାହିଁ।”

¹⁵ତେବେ ସେ ମୋତେ କହିଲେ, “ଦେଖ, ମନୁଷ୍ୟର ମଳ ବଦଳେ ଆମ୍ଭେ ତୁମ୍ଭକୁ ଗୋମୟ ଦେଲୁ, ତହିଁ ଉପରେ ତୁମ୍ଭେ ଆପଣା ରୁଟି ପ୍ରସ୍ତୁତ କରିବ।”

¹⁶ଆହୁରି ସେ ମୋତେ କହିଲେ, “ହେ ମନୁଷ୍ୟପୁତ୍ର, ଦେଖ, ଆମ୍ଭେ ଯିରୂଶାଲମରେ ଅନ୍ନରୂପ ଯଷ୍ଟି ଭାଙ୍ଗିବା; ତହିଁରେ ସେମାନେ ଉଦ୍‍ବିଗ୍ନ ହୋଇ ତୌଲ କରି ରୁଟି ଭୋଜନ କରିବେ ଓ ବିସ୍ମୟରେ ପରିମାଣ କରି ଜଳ ପାନ କରିବେ; ¹⁷କାରଣ ଅନ୍ନ ଓ ଜଳ ଅଭାବ ହେବ, ଆଉ ସେମାନେ ପରସ୍ପର ପ୍ରତି ବିସ୍ମୟରେ ଦୃଷ୍ଟି କରିବେ ଓ ଆପଣାମାନଙ୍କ ଅପରାଧରେ କ୍ଷୟ ପାଇବେ।”