以西結書 4

4 ¹「你,人子啊,攞一塊磚,放喺你面前,喺上面刻一座城——就係耶路撒冷。 ²你要圍困佢:築起攻城嘅圍牆,堆起土坡,安營攻打佢,四圍擺設攻城槌。 ³你再攞一塊鐵鏊,當作鐵牆,豎喺你同座城之間。你要向住座城,座城就受圍困,你就係要圍攻佢。呢個係畀以色列家嘅預兆。

⁴「你要側住向左邊瞓,將以色列家嘅罪孽擺喺自己身上。你瞓幾多日,就擔當佢哋嘅罪孽幾多日。 ⁵因為我已經定咗佢哋犯罪嘅年數,做你要瞓嘅日數——三百九十日——咁你就擔當以色列家嘅罪孽。

⁶「你瞓完呢啲日子,就要再側住向右邊瞓,擔當猶大家嘅罪孽四十日;我已經定咗一日頂一年畀你。 ⁷你要向住被圍嘅耶路撒冷,露出手臂,向佢說預言。 ⁸睇啊,我要用繩綁住你,令你唔可以左右轉身,直到你完成圍困嘅日子。

⁹「你要攞小麥、大麥、豆、扁豆、小米同粗麥,放喺一個罐入面,用嚟做餅。喺你側住瞓嘅日子——三百九十日——就食呢啲餅。 ¹⁰你食嘅嘢要秤住嚟食——一日大約八安士;要按住定時嚟食。 ¹¹飲水都要有份量——一日大約一品脫;要按住定時嚟飲。 ¹²你要當佢係大麥餅咁食,喺眾人眼前用人糞燒烤佢。」 ¹³我哋嘅父話:「以色列人就係咁樣,喺我趕佢哋去嘅列國中間,食佢哋不潔淨嘅餅。」

¹⁴我就話:「唉,至高嘅父啊!我從來冇玷污過自己。由細到大,我未食過自然死嘅、或者畀野獸撕裂嘅嘢,亦冇不潔嘅肉入過我個口。」

¹⁵佢對我話:「睇啊,我准你用牛糞代替人糞嚟燒烤你嘅餅。」

¹⁶佢又對我話:「人子啊,睇啊,我要打斷耶路撒冷嘅糧食供應。佢哋要秤住糧食嚟食,滿懷憂慮;又要按份量飲水,驚惶失措, ¹⁷因為糧食同水都會缺乏。佢哋你眼望我眼,驚恐萬分,喺自己嘅罪孽中日漸消瘦。」