Ezekiel 3

3 ¹Ana ili hānga, "Miwui naomayara, nana samphangkahai hi shailu. Lairik akhalui hi shailu, chieina Israelwui shimkhurli vāda hānglu."

²Chithāda ina ikhamor kāda, ana ili lairik akhalui hi shaikhavai mi.

³Ana ili hānga, "Miwui naomayara, nawukli shaimida, ina nali khami lairik akhalui hi eina nawuk pemtinghailu." Ina chi shaitāhaowa, kala ikhamorli khuira̱ thada shimshuna.

⁴Chiwui thili ana ili hānga, "Miwui naomayara, Israelwui shimkhurli vāda athumli iwui tui hānglu.

⁵"Kaja nali tuimatui theisak kala tuiyur khikha kahai mibingli machihovāmana, kha Israelwui shimkhurlina; ⁶tuimatui theisak kala tuiyur khikha kahai mibing kachungkhali machihovāmana, athumna kahāngla na bhab matāmara. Reikhamatai, ina nali athumwuili chihovāhaira kaja, athumna nali nganāsangra. ⁷Kha Israelwui shimkhurna nali nganāsang makhuisangmara, kaja athumna ili nganāsang makhuisangmana; khikhalajila Israelwui shimkhur saikora achei makathei kala ning khamakanga. ⁸Yanglu, ina namai athumwui mai thāda khamarar sāhaira, nawui khavei athumwui khavei thāda khamarar sāhaira. ⁹Ina nawui khavei lung khamarar meikap thāda, lungghai lāngda khamarar sāhaira. Athumli mangacheealu, kala athumwui azakli yangda makhakshingakhalu, kaja athum ngakaikashi shimkhurna."

¹⁰Ana ili hānga, "Miwui naomayara, ina nali kahāng iwui tui saikora nawui ningli phumhaida nawui khanā eina nganālu. ¹¹Raithā kahaibingli, nawui mibingli vāda athumli hānglu. Athumna nganāsanglala manganāsanglala, athumli hithāda hānglu, 'Proho Avāna hithāda hānga.'"

¹²Chiwui thili ithumwui Avāwui Manglāna ili khāngkai, kala ikhanukshong akhon kahakva̱ kaphan thada ina nganāhaowa: "Awui pamkhavaiwui eina ithumwui Avāwui tekhamatei chi soranu!" ¹³kharingyurbingwui angachāng akha eina akha ngasamnaruk akhon, kala athum ngasoda kāngpheibingwui akhon, kaphan kahakva̱ akhon chi ina shai. ¹⁴Manglāna ili khāngkāda khuikāhaowa, kala ina kakhāmāng eina vāhaowa, imanglā iwuklungli leirang kasāna leisai, kala ithumwui Avāwui pāng iwuitungli yāng eina rāpara. ¹⁵Ina Chebar kongli khalei Tel-abibwui raithā kahaibingli rāhaowa; kala apam chili ina athum ngachaili shinithang pamda khakshingakhaowa.

Avāna Shantri Akha Kapangsang

¹⁶Shinithang kupkahai tharan, ithumwui Avāwui tui china ili rāhānga:

¹⁷"Miwui naomayara, ina nali Israelwui shimkhurwui shantri sākhavai sangkahaina. Ikhamorwui eina tui nana nganā tharan, iwui eina athumli hāngmathinmilu. ¹⁸Makhayā mili ina, 'Na thiphalungra' da hānglala, nana ali mahāngmathinmida, makhayā mi chili awui makhayā apong eina ngareiungda awui mirin huikhuikhavai matuishokmiakha, chikathā makhayā mi china awui khayonwui vang thiphalungra, kha awui ashee chi ina nawuitungli tāngasakra.

¹⁹"Kha makhayā sāmi mili nana hāngmathinmiakha, awui makhayā lah awui makhayā apong eina a ngarei masaakha, awui khayonwui vang eina a thira; kha nana nawui mirin kanshokra.

²⁰"Latluida, khamashung khangarong mina awui khamashung khangarongwui eina ngareithuida morei kasā tharan, kala ina awui mangāli phei ngaphok khavai saakha, a thiphalungra. Nana ali mahāngmathinmiwui vang, awui khayonwui vang a thira, awui khangarong ot sākahai chi maphaningungla, kha awui ashee chi ina nawuitungli tāngasakra. ²¹Kha nana khamashung khangarong mili morei masā khavai hāngmathinlaga, ana morei masaakha, ana hāngmathin chi shāmiwui vang a ringphalungra, kha nana nawui mirin kankhuira."

²²Apamli ithumwui Avāwui pāng iwuitungli rāpara, kala ana ili hānga, "Ngakarthuilu, tampākli zatphoklu, kala apamli ina nawui vang pet sāra."

²³Chieina ina ngakarthuida tampākli vai, kala apamli Chebar kongli ina kathei masot chi thāda ithumwui Avāwui masot nganinga, kala ina mai mashunzanga.

²⁴Manglā china iwuklungli azanga, ili iphei tungli nganing ngasakta, ili pet sāda hānga, "Vālu, nawui shimlungli nakhalatta shungkhuilu. ²⁵Kala na, miwui naomayara, athumna nali khara̱ shānmihaida, chi eina nali khalapmira, chieina nana mibingwui ngachaili mashokrarmara.

²⁶Ina nawui male chi nakhamortungli napshānmira; na khak ngasāhaora, athumli kharar sākhavai mangasungrarmara, kaja athum ngakaikashe shimkhurna. ²⁷Kha ina nawui vang pet sā tharan, ina nawui khamor makāmira, kala nana athumli hāngra, 'Proho Avāna hithāda hānga.' Shākhui a china shākhuiranu; kala mashākhui a china mashākhuiranu; kaja athum ngakaikashe shimkhurna."