ሕዝቅኤል 3 FHB Father's Heart Bible™

3 ¹ንሱ ኸዓ “ኣታ ወዲ ሰብ፥ እዝ እትረኽቦ ብላዕ፤ ነዝ መፅሓፍ እዙይ በሊዕኻ ኬድካ ንቤት እስራኤል ተዛረቦም” በለኒ።

²ኣነ ድማ ኣፈይ ከፈትኩ፤ ንሱ ኸዓ ነዝ መፅሓፍ እዙይ ክበልዖ ሃበኒ።

³ንሱ ድማ “ኣታ ወዲ ሰብ፥ ነዝ ዝህበካ ዘለኹ መፅሓፍ ንኸብድኻ ኣብልዓዮ፥ ውሽጥኻ ድማ ምልኣሉ” በለኒ። ኣነ ኸዓ በላዕክዎ፤ ኣብ ኣፈይውን ከም መዓር ጥዑም ኮነ።

⁴ድሕሪዙይ ድማ “ኣታ ወዲ ሰብ፥ ናብ ቤት እስራኤል ኬድካ ቃላተይ ተዛረቦም” በለኒ።

⁵“ናብ ዘረባኦም ዝተሰወረ ቛንቋኦም ከዓ ከቢድ ዝኾነ ህዝቢ ዘይኮነ ደኣ፥ ናብ ቤት እስራኤል ኢኻ እትልኣኽ ዘለኻ፤ ⁶ናብ ብዙሓት፥ ዘረባኦም ዝተሰወረ ቛንቋኦም ከዓ ከቢድ፥ ቃላቶም ክትርዳእ ዘይትኽእል ኣህዛብ ኣይኮንካን ዝልኣኽካ። ናብኣቶም እንተ ዝልእከካ ነይረ፥ ብሓቂ ምሰምዑኻ ነይሮም። ⁷ቤት እስራኤል ግና ንኣይ ክሰምዑ ኣይደልዩን እዮም እሞ፥ ንኣኻ ኽሰምዑ ኣይደልዩን እዮም፤ ኵሉ ቤት እስራኤል ተረርቲ ኽሳድ፥ ተረርቲ ልቢ እዮም እሞ። ⁸እንሆ፥ ንገፅካ ኸም ገፆም፥ ንግንባርካ ድማ ከም ግንባሮም ኣትሪረ ኣለኹ። ⁹ንግንባርካ ኸም ኣልማዝ፥ ካብ ኰዅሒ ዝተረረ ገይረ ኣለኹ። ንሳቶም ዓመፀኛ ቤት እዮም እሞ፥ ኣይትፍራሕ፥ ብገፆም ድማ ኣይትሸበር” በለኒ።

¹⁰ንሱ ድማ “ኣታ ወዲ ሰብ፥ ነቲ ኣነ ዝዛረበካ ዅሉ ቃላተይ ናብ ልብኻ ውሰዶ፥ ብኣእዛንካ ድማ ስምዓዮ” በለኒ። ¹¹“ናብቶም ምሩኻት ዝኾኑ ደቂ ህዝብኻ ኬድካ ተዛረቦም። ይስምዑ ኾኑ ይኣብዩ፥ ‘እቲ ልዑል ኣቦ ኸምዙይ ይብል ኣሎ’ በሎም።”

¹²ሽዑ መንፈስ ኣቦና ኣልዓለኒ፤ ብድሕረይ ከዓ፥ “ክብሪ ኣቦና ካብ ማሕደሩ ይባረኽ!” ዝብል ዓብዪ ድምፂ ህዂም ሰማዕኹ፤ ¹³ድምፂ ኣኽናፍ እቶም ህያዋን ፍጡራት ነንሕድሕዱ ዝነኻኸ፥ ድምፂ እቲ ኣብ ጐኒኦም ዝነበረ መንኰራዅር፥ ዓብዪ ድምፂ ህዂም ነበረ። ¹⁴መንፈስ ድማ ኣልዒሉ ወሰደኒ፤ ኣነ ኸዓ መንፈሰይ ኣብ ውሽጠይ እናነደደ ብምረት ከድኩ፤ ኢድ ኣቦናውን ኣብ ልዕለይ በርትዐ። ¹⁵ናብቶም ኣብ ቴል-ኣቢብ ኣብ ጥቓ ርባ ኬባር ዝነበሩ ምሩኻት መፃእኹ፤ ኣብኡ ኸዓ ተገሪመ ሸውዓተ መዓልቲ ኣብ ማእኸሎም ተቐመጥኩ።

እቲ ኣቦ ሓደ ሓላዊ ይሸይም

¹⁶ድሕሪ ሸውዓተ መዓልቲ ድማ፥ ቃል ኣቦና ናባይ መፀ፦

¹⁷“ኣታ ወዲ ሰብ፥ ንኣኻ ንቤት እስራኤል ሓላዊ ገይረካ ኣለኹ። ካብ ኣፈይ ቃል ምስ ሰማዕኻ ድማ፥ ካባይ ኣጠንቅቆም። ¹⁸ኣነ ንሓጢኣተኛ ‘ብርግፅ ክትመውት ኢኻ’ ምስ በልክዎ፥ ንስኻ ኸዓ እንተ ዘይኣጠንቀቕካዮ፥ ነቲ ሓጢኣተኛ ህይወቱ ምእንቲ ኽትድሕን ካብ ክፉእ መንገዱ ኽትመልሶ እንተ ዘይተዛረብካ፥ እቲ ሓጢኣተኛ ብሓጢኣቱ ክመውት እዩ፤ ደሙ ግና ካብ ኢድካ ኽደሊ እየ።

¹⁹ንስኻ ግና ነቲ ሓጢኣተኛ እንተ ኣጠንቀቕካዮ፥ ንሱ ኸዓ ካብ ክፍኣቱ ወይ ካብ ክፉእ መንገዱ እንተ ዘይተመለሰ፥ ብሓጢኣቱ ክመውት እዩ፤ ንስኻ ግና ህይወትካ ኣድሒንካ ኢኻ።

²⁰ከምኡ ድማ ሓደ ፃድቕ ካብ ፅድቁ ተመሊሱ ዓመፅ እንተ ገበረ፥ ኣብ ቅድሚኡ ኸዓ መዐንቀፊ እንተ ኣንበርኩሉ፥ ክመውት እዩ። ንስኻ ስለ ዘየጠንቀቕካዮ፥ ብሓጢኣቱ ክመውት እዩ፤ እቲ ዝገበሮ ፅድቂ ኸዓ ኣይዝከርን፤ ደሙ ድማ ካብ ኢድካ ኽደሊ እየ። ²¹ንስኻ ግና ነቲ ፃድቕ ከይሓጥእ እንተ ኣጠንቀቕካዮ፥ ንሱ ኸዓ እንተ ዘይሓጥአ፥ ተጠንቂቑ ስለ ዝተቐበለ ብህይወት ክነብር እዩ፤ ንስኻውን ህይወትካ ኣድሒንካ ኢኻ።”

²²ኣብኡ ኢድ ኣቦና ኣብ ልዕለይ ነበረ፤ ንሱ ኸዓ “ተስኢ፥ ናብቲ ለሰ ውፃእ፤ ኣብኡ ኸዓ ምሳኻ ክዛረብ እየ” በለኒ።

²³ኣነ ድማ ተሲአ ናብቲ ለሰ ወፃእኩ፤ እንሆ ኸዓ፥ ከምቲ ኣብ ጥቓ ርባ ኬባር ዝረአኽዎ ክብሪ፥ ክብሪ ኣቦና ኣብኡ ደው ኢሉ ነበረ፤ ኣነ ኸዓ ብገፀይ ተደፋእኹ።

²⁴መንፈስ ድማ ናባይ ኣተወ፥ ኣብ እግረይ ደው ኣበለኒ፥ ተዛረበኒ፥ ከምዙይ ከዓ በለኒ፦ “ኪድ፥ ኣብ ውሽጢ ገዛኻ ተዓፀው። ²⁵ንስኻ ኸዓ ኣታ ወዲ ሰብ፥ እንሆ ገመድ ኣብ ልዕሌኻ ክገብሩ፥ ብእኡ ድማ ክኣስሩኻ እዮም፤ ስለዙይ ኣብ ማእኸል እቶም ህዝቢ ክትወፅእ ኣይትኽእልን ኢኻ።

²⁶ንልሳንካ ኣብ ትንሓግካ ከጥብቖ እየ፤ በሃም ክትከውን ኢኻ፤ ንሳቶም ዓመፀኛ ቤት እዮም እሞ፥ ክትገስፆም ኣይትኽእልን ኢኻ። ²⁷“ኣነ ምሳኻ ክዛረብ እንተለኹ ግና፥ ኣፍካ ክኸፍተልካ እየ፤ ንስኻ ኸዓ ‘እቲ ልዑል ኣቦ ኸምዙይ ይብል ኣሎ’ ክትብሎም ኢኻ። ንሳቶም ዓመፀኛ ቤት እዮም እሞ፥ ዝሰምዕ ይስማዕ፥ ዝኣቢ ድማ ይኣቢ።”