Ezekiel 3 FHB Father's Heart Bible™

3 ¹Tai moi ke koise, “Manuh laga putro, tumi ki pai, eitu khabi. Eitu kitab khabi, titia jai kene Israel ghor ke kotha kobi.”

²Titia moi laga mukh khuli dise, aru Tai eitu kitab moi ke khabole dise.

³Tai moi ke koise, “Manuh laga putro, Moi tumi ke di thaka eitu kitab pora tumar pet khilai lobi aru tumar peit bhoral koribi.” Moi eitu khaise, aru moi laga mukh te eitu mou nisina mitha thakise.

⁴Titia Tai moi ke koise, “Manuh laga putro, Israel ghor ke jabi aru Moi laga kotha tarkhan ke kobi.

⁵“Kilemane tumi ke buribo napara kotha aru tan bhasa thaka manuh khan logot te patha-i diya nai, kintu Israel ghor logot te he pathaise, ⁶buribo napara kotha aru tan bhasa thaka, jun laga kotha tumi buribo napare, eneka bisi jati khan logot te nohoi. Hosa bhi, jodi Moi tumi ke tarkhan logot te pathaise koile, tarkhan pora tumar kotha hunibo asele. ⁷Kintu Israel ghor pora tumar kotha hunibole itcha nakoribo, kilemane tarkhan Moi laga kotha hunibole bhi itcha nakore; kilemane Israel laga pura ghor tu tan matha aru tan mon thaka manuh khan ase. ⁸Sabi, Moi tumar chehera tu tarkhan laga chehera nisina tan bonai dise, tumar kopal tu tarkhan laga kopal nisina tan bonaise. ⁹Moi tumar kopal tu kathin pathor nisina, chokmoki pathor pora bhi tan bonai dise. Tarkhan ke bhoi nakoribi aru tarkhan laga chehera dikhi kene chinta nakoribi, kilemane tarkhan ekta bidrohi ghor ase.”

¹⁰Tai moi ke koise, “Manuh laga putro, Moi tumi ke kowa Moi laga sob kotha tumar mon te lobi aru tumar kaan pora huni lobi. ¹¹Bondi hoi kene thaka manuh khan, tumar nijor manuh khan logot te jabi, aru tarkhan ke kobi. Tarkhan ke kobi, ‘Prabhu Pitri pora eneka koi ase,’ tarkhan hunile bhi, nohole hunibole mana korile bhi.”

¹²Titia amar Pitri laga Atma pora moi ke uthai loise, aru moi laga pichete ekta dangor jor-awaj moi hunise: “Tar thaka jagah pora amar Pitri laga mohima dhonyo hobi!” ¹³jinda-jontu khan laga pakha ekta-ekta logot te lagikena kora awaj, aru tarkhan usorte thaka chakka khan laga awaj, dangor jor laga awaj. ¹⁴Atma pora moi ke uthai loise aru loijaise, aru moi tita mon pora jaise, moi laga atma moi bhitorte juli thakise, amar Pitri laga haath moi uporte takot pora thakise. ¹⁵Moi Kebar nodi usorte thaka Tel-abib te bondi manuh khan logot te ahhise, aru ta te tarkhan majote asurit hoi kene sat din bohi thakise.

Pitri pora Israel nimite ekjon Pahara-diya Manuh Basise

¹⁶Sat din pura huwa pichete, amar Pitri laga kotha moi logot te ahhise:

¹⁷“Manuh laga putro, Moi tumi ke Israel ghor nimite ekjon pahara-diya manuh bonai dise. Jitia tumi Moi laga mukh pora ekta kotha hunibo, Moi laga taraf pora tarkhan ke hoshiar kori dibi. ¹⁸Jodi Moi dusto manuh ke, ‘Tumi hosa bhi moribo,’ koile, aru tumi tar ke hoshiar nakorile, nohole tar jivon bachabole dusto manuh ke tar biya rasta pora hoshiar koribole eku nakoile, hei dusto manuh tar paap nimite moribo, kintu Moi tar khoon laga hisab tumar pora lobo.

¹⁹“Kintu jodi tumi dusto manuh ke hoshiar korile aru tai tar biya pora nohole tar biya rasta pora naghurile, tai tar paap nimite moribo, kintu tumi tumar nijor jivon bacha-i lobo.

²⁰“Aru bhi, jitia ekjon dharmik manuh tar dharmikota pora ghuri kene biya kaam korile, aru Moi tar age te ekta thokar khuwa pathor rakhile, tai moribo. Tumi tar ke hoshiar nakora karne, tai tar paap nimite moribo, aru tar dharmik kaam khan pahori jabo, aru Moi tar khoon laga hisab tumar pora lobo. ²¹Kintu jodi tumi dharmik manuh ke paap nakoribole hoshiar korile, aru tai paap nakorile, tai jinda thakibo kilemane tai hoshiar kotha mani loise, aru tumi tumar nijor jivon bacha-i lobo.”

²²Ta te amar Pitri laga haath moi uporte thakise, aru Tai moi ke koise, “Uthibi, maidan te ulai jabi, aru ta te Moi tumar logote kotha kobo.”

²³Titia moi uthi kene maidan te jaise, aru ta te amar Pitri laga mohima khara thakise, Kebar nodi usorte moi dikha mohima nisina, aru moi matha niche kori kene giri porise.

²⁴Atma moi bhitorte ahhise, moi ke theng uporte khara kori dise, moi logote kotha koise, aru koise: “Jabi, tumar ghor bhitorte nijor ke bondh kori lobi. ²⁵Aru tumi, manuh laga putro, tarkhan pora tumar uporte rusi bandhi dibo aru eitu pora tumi ke bandhi rakhibo, titia tumi manuh khan majote ulai jabo naparibo.

²⁶Moi tumar jiba tu tumar mukh laga uporte lagai dibo; tumi gunga hoi jabo, tarkhan ke gali dibole naparibo, kilemane tarkhan ekta bidrohi ghor ase. ²⁷Kintu jitia Moi tumar logote kotha kobo, Moi tumar mukh khuli dibo, aru tumi tarkhan ke kobi, ‘Prabhu Pitri pora eneka koi ase.’ Jun hunibo, tai hunibi dibi; aru jun mana koribo, tai mana koribi dibi—kilemane tarkhan ekta bidrohi ghor ase.”