Moabwui Tuingashit
Moabli kharakhai kakhaneshi kaki kharim, kala mi kachiva chili ngasāngra: kharamnao, shanao, nao, thing kharaimi, tara ngaroimi, kala mathang kasāmkhami khale. Kakhanghai kaji mi hi kharakhai ngathāmhai eina a ngayung sakhangai kaji. Ngakhai kaji hi ithum Avāwui kaji; kakhanglak kaji hi ithumwui kaji, sāluiya.
29 1Ana athumli Horebli sākahai tuingashit chi hailaga, hi ithumwui Avāna Moabli Israelnaobingli sāmi khavai Mosesli kakaso tuingashitwui tuibingna. 2Mosesna Israel saikorali hokhuida athumli hānga: Nathumna Egypt ngaleili nathumwui miktāli ithumwui Avāna Pharaohli, awui rao saikorali, kala awui ngalei saikorali sāmihai saikora theihaira. 3Nathumna nathumwui mik eina hakkhamahā chāng khayangbing, kapanga machut, kala matakhak kahaibing theihaira. 4Kha aja rāshungda ithumwui Avāna nathumli theikhavai ning, theikhavai mik, kala shākhavai khanā mamimana.
5"Zingkum hangmati ina nathumli lamhāngli thānzata; nathumwui kachon matanarmana, kala nathumwui pheili pheihopla matanarmana. 6Nathumna khawok mashaimana, drakhāra̱la zamsheila mamangmana, I nathumwui Avā china kaji nathumna theikhavaina."
7Nathumna apam hili vākashung tharan, Heshbonwui awunga Sihon kala Bashanwui awunga Og ithumli ngarar khavai shoka, kala ithumna athumli sāthata. 8Ithumna athumwui ngalei khuida, chi Reubennaobing, Gadnaobing, kala Manasseh shang tangkhaili shimlui sākhavai mihaowa. 9Nathumna sākahai saikorali mataisang khavai, hi tuingashitwui tuibing mayonda chi sālu. 10Aja nathum saikora nathumwui Avāwui mangāli rānganinghaira: nathumwui shang-shangwui kathānabing, khararnaobing kala otva̱bing, Israelwui mi saikora, 11nathumwui naoshinao, preiva̱ ngarā, kala nathumwui rāmrahli khalei kha̱mi, nathumwui thing ata̱bing eina thuida nathumwui tara̱ sokkhuibing tāshungda, 12nathumna nathumwui Avāwui tuingashit, kala aja nathumwui Avāna nathumli sākahai awui ngashitsangli zangkhavaina, 13ana nathumli ngashitmi kahai kala nathumwui avāva̱ ngarā Abraham, Isaac, kala Jacobli ngashit kahai thāda, aja nathumli awui mi sākhavai, kala nathumwui Avā ngasā khavaina. 14Ina hi ngashit eina sākahai tuingashit chi nathummāng ngasoda masāhaimana, 15kha aja ithumli ngasoda ithumwui Avāwui mangāli apam hili khanganing saikorali ngasoda, kala aja ithumli ngasoda apam hili maleibing saikorali ngasoda sāhaira. 16Ithum Egyptli kathāda pama, kala nathumna kānung kānkhami yurbingwui alungli ithum kathāda kānkha, kaji saikora nathumna theihaira. 17Nathumna athumwui ningkakachai ot, kala athumwui ngachaili thing, ngalung, lupā, kala sinā eina sākakhui meoma̱bing theihaira. 18Nathumwui ngachaili mayarnao, sha̱nao, shimkhur, lala shang khipānakha aja awui ning ithumwui Avāwui eina ngareithuida yur chibingwui varebingli otram ngatha̱ chi masāpaimana, kala nathumwui ngachaili angayung khipākhana thingkhā kala khai athei matheipaimana, 19chi tuingashit hiwui tui kashā a chiya, awui alungshong khalattali soda, iwui ngakaishitingting kahai ning shurlala I khikha mathāmana da phaninga. Chithāda ana tara̱ kachaimi ngalei chi thengkahai ngalei eina akhamāng shimān ngasakra. a a v19 "Tara̱ kachaimi ngalei chi thengkahai eina shimān ngasak" — hi katonga, khangapui khavai shimān khavai Hebrew tuilamna: saikora shimān, tara̱ kachaimi kala tākok akhamāng. 20Ithumwui Avāna ali pheomi khavai mamayāmara; chiwui mahutli awui malungkhavāt kala yuikashina mipā chiwuitungli leira, kala lairik hiwui pongli kapihai khonkashi saikora awuitungli tāra, kala ithumwui Avāna awui ming okathuiwui eina katatserhaora. 21Ain hiwui lairik hili kapihai tuingashitwui khonkashi saikora athishurda, ithumwui Avāna Israelwui shang saikorawui eina ali kalākashi khavai amāng katatra.
22Thot khangatei, nathumwui thili khalei naongarā, kala ram katāva̱wui eina rā kha̱mi khangateina, ngalei chiwui kazātkashi kala ithumwui Avāna chiwuitungli khuirā kazāt saikorali theira. 23meiri kala machi, ngalei katonga meina chuithat, mayaokahai, khikha makharshok, thingrong khikha makhar, ithumwui Avāna awui malungkhavāt kala malung kasāli shimān ngasak kahai Sodom, Gomorrah, Admah, kala Zeboiimwui shimān thāda; 24yur saikorana ngahānra, Khisāda ithumwui Avāna ngalei hili kathāda sākhala? Hi malung kasā hakva chi khina?
25Chieina mibingna hāngra, Khikhalajila athumli Egyptwui ngaleiwui eina horkhame tharan, ithumwui Avā, athumwui avāva̱ ngarāwui Varena athumli sākahai tuingashit chi athumna horhaowa; 26kala vare khangatei, athumna matheikasa kala ana athumli machizanghai varebingli vāda otram ngatha̱da khoruma; 27Chiwui vang ithumwui Avāwui malungkhavāt ngalei chiwuitungli leihaowa, kala lairik hiwui pongli kapihai khonkashi saikora chiwuitungli khuirāhaira. 28kala ithumwui Avāna malungkhavāt, malung kasā, kala ningkakachai hakva eina athumli athumwui ngaleiwui eina phurthathaowa, kala ngalei khangateili horshokhaowa, aja lei kahai thāda.
29Ngathum kahai otbing chi ithumwui Avāwuina, kha ain hiwui tui saikora ithumna sākhavai, chitheimi kahai otbing chiya katang makhavai ithum kala ithumwui naongarāwuina.
