Umnqophiso waseMowabhi

Umnqophiso wesibini wenziwa kwelaseMowabhi, wonk'ubani eme apho: iinkokeli, abafazi, abantwana, abagawuli benkuni, abakhi bamanzi, nabo bangekazalwa. Ingozi echaziweyo yindoda eva isifungo kodwa ize izisikelele. Izinto ezifihlakeleyo zezikaBawo wethu; izinto ezityhiliweyo zezethu, ukuze sizenze.

Isahluko 29.

Ngawo la amazwi omnqophiso uBawo wethu awamyalela uMoses ukuba awenze noonyana bakaSirayeli ezweni laseMowabhi, ngaphandle komnqophiso awawenza nabo eHorebhe. Wababiza uMoses onke amaSirayeli, wathi kubo: Nina naziyibona zonke izinto awazenzayo uBawo wethu phambi kwamehlo enu ezweni laseYiputa, kuFaro, nakubakhonzi bakhe bonke, nasezweni lakhe lonke; izilingo ezikhulu enazibona ngamehlo enu, loo miqondiso emikhulu, nezimanga. Kodwa unanamhla uBawo wethu akaninikanga ntliziyo yakwazi, namehlo okubona, neendlebe zokuva.

“Iminyaka engamashumi mane ndanikhokela entlango; iingubo zenu azidleki, neembadada zenu azidleki ezinyaweni zenu. Anidlanga sonka, anisela wayini nasiselo esinxilisayo, ukuze nazi ukuba ndinguBawo wenu.”

Nakufika kule ndawo, uSihon ukumkani waseHeshbhon no-Ogi ukumkani waseBhashan baphuma basihlangabeza besiza kulwa, saza sababetha. Salithabatha ilizwe labo, salinika amaRubhen, namaGadi, nesiqingatha sesizwe sakwaManase ukuba libe lilifa. Gcinani amazwi alo mnqophiso, niwenze, ukuze nibe nempumelelo ezintweni zonke enizenzayo. Namhla nime nonke phambi koBawo wenu: iintloko zezizwe zenu, namadoda amakhulu, nababhali, yonke indoda yakwaSirayeli, nabantwana benu abancinane, nabafazi benu, nomphambukeli osemfudukeni yakho, ethabathela kobamba iinkuni zakho, esa kokha amanzi akho, ukuze ungene emnqophisweni kaBawo wakho, nasesifungweni sakhe, awawenza nawe uBawo wakho namhla; ukuze akumisele namhla ube ngabantu bakhe, abe nguBawo wakho, njengoko wathethayo kuwe, nanjengoko wabafungelayo ooyihlo, uAbraham, noIsake, noYakobi. Andenzi nani nodwa lo mnqophiso, esi sifungo; ndiwenza nalowo umi apha nathi namhla phambi koBawo wethu, nalowo ungekhoyo apha nathi namhla. Niyazi indlela esahlala ngayo eYiputa, nendlela esacanda ngayo phakathi kweentlanga enazicanda; nazibona izinto zazo ezizizothe, nezithixo zazo zemithi, nezamatye, nesilivere, negolide, eziphakathi kwazo. Maze kungabikho phakathi kwenu, nokuba yindoda, nokuba ngumfazi, nokuba ngumzalwane, nokuba sisizwe, ojika intliziyo yakhe namhla imke kuBawo wethu, aye kukhonza oothixo bezo ntlanga; maze kungabikho phakathi kwenu ngcambu evelisa ubuhlungu nesiqhamo esikrakra; lowo athi, akuweva amazwi esi sifungo, azisikelele entliziyweni yakhe, esithi, Ndoba luxolo nokuba ndihamba ngokunengqele kwentliziyo yam—ukuze kutshayelwe ilizwe elinyakamileyo ndawonye nelomileyo. ^a UBawo wethu akayi kuvuma ukumxolela; othi umsindo wakhe nobukhwele bakhe buvuthe kuloo mntu, sithi sihlale phezu kwakhe sonke isiqalekiso esibhaliweyo kule ncwadi, aze uBawo wethu alicime igama lakhe phantsi kwezulu. UBawo wethu womvalela ezizweni zonke zakwaSirayeli ukuba abe nobubi, ngokweziqalekiso zonke zomnqophiso ezibhaliweyo kule ncwadi yomyalelo.

Isizukulwana esiza, oonyana benu abeza emva kwenu, nomphambukeli ovela ezweni elikude, baya kubona izibetho zelo zwe, nezifo uBawo wethu azithumele kulo; isulfure netyuwa, lonke ilizwe litshile, lingahlwayelwa, lingavelisi nto, kungaphumi nto kulo, njengentshabalalo yaseSodom, neGomora, neAdama, neTsebhoyim, awazitshabalalisayo uBawo wethu ngomsindo wakhe nangobushushu bakhe, zonke iintlanga ziya kubuza, Kungani na ukuba uBawo wethu enze ngolu hlobo kweli lizwe? Yintoni na lo msindo mkhulu ovuthayo?

Baya kuphendula: Kungokuba bawushiya umnqophiso kaBawo wethu, uThixo wooyise, awawenza nabo mhla wabakhupha ezweni laseYiputa, baya, bakhonza oothixo bambi, babanqula, oothixo abangabaziyo, abengabamiselanga. Waza wavutha umsindo kaBawo wethu kweli lizwe, wazisa kulo zonke iziqalekiso ezibhaliweyo kule ncwadi. Waza uBawo wethu wabanyothula ezweni labo ngomsindo, nangobushushu, nangoburhalarhume obukhulu, wabaphosa kwelinye ilizwe, njengoko kunjalo namhla.

Izinto ezifihlakeleyo zezikaBawo wethu, kodwa izinto ezityhiliweyo zezethu nezabantwana bethu kude kube ngunaphakade, ukuze siwenze onke amazwi alo myalelo.