Boaz sangnyu bakhüna
Sangnyu bakhüna Boazei nyangbou angngaibou to chühla kukei, hoba müt kho phet mautikei. Boazei kao jekkei, Rut leikei, hoba seneibü Bouei hao to bousushou che kukei. Yaksa shuongei Naomi to, nyi angngaibou ayingko teyobü aying dogo laukei; nouyangshoueibü thensilen Dawid to longkei.
4 1Boazei sangnyu bakhün to angan setkei. Haoei laubü chempen loujinei, Boazei hao to laukei, “Jena, hanei louan setteiashi.” Hibü haoei louan setkei. 2Hobaje haoei sangnyu leiyeibü jaishou shuong müt an leian laukei, “Hanei setteiashi.” Hibü haoen setkei. 3Haoei chempen to laukei, “Moab kaodak ka longeibü Naomiei seneibü jaisina Elimelek shangabü kao che yaakan. 4Kheijinei ngei ka to lenmang sühkei, Hanei setbü shuong hoba kü mütliei jaishou shuong thedanga nyi kho jekashi. Nyi kho angngaimang sühalonga, angngaiashi; lausikei angngaimang asühlonga, ngei ngela shanga kü la lenbüma; aishanga no kho angngaila shaangbou ki, hoba ngo no phainei ki.” Haoei laukei, “Ngei kho angngailabü.”
5Boazei laukei, “Nyi Naomi ka sek jekbü chalou, haibü müteibü nyen haoeibü phet thüka phola shanga, Moabbü sao Rut, haibü müteibü latnyu kho tokei nyi lelabü.”
6Kheijinei chempenei laukei, “Ngo kü mütpemei kho angngaila athük, aingenyu ngei kü lolo phet mautilabü. Kü angnam nyi lela phoashi; ngo kho angngaila athük.”
7Shangied Israela, angngaibü hoba küten lepbolangbü pendou taktela shanga, müt cheei jembü ngok hangletan lubü müt to kukei. Ho kho Israela taktebü lam kikei. a a v7 Shangied Israela ngok hangletan tang khüto lubü müt to kubü kho, ngühkhüm thüka aukabü thedanga theyolanyobü taktebü tegü kikei. 8Hibü chempenei Boaz to, “Nyi jembü shanga jekashi,” dogo laujinei, haoei jembü ngok hangletkei.
9Hobaje Boazei jaishou shuong hoba müt pendou to laukei, “Tat kan aukabü ki, ngei Naomi ka Elimelek, Chilon hoba Malon shangabü pendou jekkua. 10Haibü müteibü nyen haoeibü phet yoa phola shanga, hoba haoeibü nyen jembü jaisina shuong yoka hoba jembü sangnyu ka küman akilabü shanga, tokei Moabbü sao Rut, Malon latnyu kho ngei kü yak shanga lea. Tat kan aukabü ki.”
11Hobaje bakhüna kibü müt pendou hoba jaishou shuongei laukei, “Kün aukabü ki. Seneibü Bouei kaibü chem to atbü sao to, haosi hamei Israel chem dangbü Rachel si Lea tegü kümshima. Efrataa nyi jungeiashi hoba Bethlehema kaibü nyen longtiashi. 12Ho yaksa nashou danko seneibü Bouei ka la kubü shousi shuong danko, kaibü chem kho Tamarei Jihuda la bukbü Perez chem tegü yeitishima.”
Boazei Rut yakla lekei
13Hibü Boazei Rut kho yak shanga lekei. Haoei sao yoa yepbei, hoba seneibü Bouei sao peanchühkei hoba sao mang akongko apbei, hoba saoei bousu shou che bukkei. 14Hobaje yaksa shuongei Naomi to laukei, “Tat no to chempen akiko asatphokubü seneibü Bou to nyen sangashi; haoeibü nyen Israela nyen longtishima! 15Haoei kaibü langkei sinngaitilabü hoba kaibü jailean no to samlabü; aishanga no to sanoubü, no shanga bousu shou nyet tokei khaibü kaibü shou yakei hao bukkua.” 16Hobaje Naomiei nashou kho leian lolo khüpan, hao to peanchühkei. 17Lepbü yaksa shuongei hao la nyen kukei, “Naomi la bousu shou che bukkua!” Haoenei hao la Obed nyenkukei, hao kho Jesseeibü bou, Jesse kho Dawideibü bou kikei.
Dawid Sühko Meten
18Tou habü ho Perez mütli: Perez ka Hezron pakkei, 19Hezron ka Ram pakkei, Ram ka Aminadab pakkei, 20Aminadab ka Nashon pakkei, Nashon ka Salmon pakkei, 21Salmon ka Boaz pakkei, Boaz ka Obed pakkei, 22Obedei Jesse pakkei, hoba Jesseei Dawid pakkei. b b v22 Rut le kho shangied ka ho nyen jungto sepeian kiteikei. Dawid chem ka Jisu loulabü — hao kho Dawid Shou, ngühmai chempen Khümenbou ki, aoei shanga Boazei hangsho tetsi kukei.
