Rastî û Şahidiya Rast

Dadî divê ne ber bi elaletê, ne ber bi bertîlê, û ne jî ber bi dilovaniyê ve bitewe, û kerê ketî yê dijminê te dîsa jî alîkariya te distîne. Erd her sala heftan bêhna xwe vedide da ku belengaz bixwin, sê cejn salê nîşan dikin, û qasidek ku navê Bavê me hildigire li pêşiya wan diçe.

Bavê me di ayetan de dipeyive 1–33

Beş 23.

“Tê xeberên derewîn belav nekî û destê xwe nedî xeraban ku bibî şahidekî derewîn.

“Ji bo ku xerabiyê bikî, nekeve pey piraniyê. Di dozekê de şahidiyê nede ku tu alî piraniyê bigirî û heqiyê bidî xwarin, û di doza belengazekî de jî meyla wî neke.

“Heke tu rastî ga an kerê dijminê xwe yê ku ji rê derketiye bêyî, tê bê guman wî vegerînî ba wî. Heke tu bibînî ku kerê dijminê te li bin barê xwe ketiye, wî li wir nehêle; alîkariya xwediyê wî bike ku wî ji bin bar rizgar bikin.

“Tê di dozên belengazên xwe de heqiyê nedî xwarin. Xwe ji sûcdarkirinên derewîn dûr bigire. Kesên bêsûc û mafdar nekuje, çimkî ez kesê sûcdar bêsûc dernaxim.

“Bertîlê nestîne, çimkî bertîl çavên kesên çavvekirî kor dike û gotinên kesên mafdar serobino dike.

“Tê zordariyê li xerîbekî nekî. Hûn dizanin dilê xerîban çawa ye, çimkî hûn jî li welatê Misrê xerîb bûn.

Bêhnvedan ji bo Erdê

“Tê şeş salan erdê xwe biçînî û berhemên wî bidî hev, lê di sala heftan de tê çandiniyê lê nekî û wî neajoyî, da ku belengazên gelê te jê bixwin; ya ku ji wan bimîne jî bila heywanên çolê bixwin. Tê bi rez û zeytûnistana xwe re jî wisa bikî.

“Şeş rojan karê xwe bike, lê roja heftan bêhna xwe vede, da ku ga û kerê te bêhna xwe vedin û kurê cariyeya te û xerîb jî rihet bibin.

“Li hemû tiştên ku min ji we re gotine miqate bin. Navên îlahên din hilnedin; bila ew ji lêvên we neyên bihîstin.

Sê Cejn li Hizûra Bavê We

“Salê sê caran tê ji bo min cejnê bikî. Cejna Nanê Şikeva bike. Çawa ku min li te emir kir, di dema kifşkirî ya meha Avîvê de heft rojan nanê şikeva bixwe, çimkî wê demê tu ji Misrê derketî. Bila tu kes destvala neyê hizûra min. ^a Cejna Dirûnê bike, ango ya berên pêşî yên berhema ku li zeviyê hatiye çandin; û di dawiya salê de, gava tu berhema xwe ji zeviyê didî hev, Cejna Berhilanînê bike. Divê hemû mêrên te salê sê caran li hizûra Bavê Serwer xuya bibin.

“Xwîna qurbana min bi tiştekî bihevîrtirş re pêşkêş neke û bezê pêşkêşiya cejna min heta sibê nehêle.

“Ji berên pêşî yên axa xwe yên herî baş bîne mala Bavê xwe. Tê karikê bi şîrê diya wî nepêjî.

Milyaketê ku Li Pêş Tê Şandin

“Va ye, ez milyaketekî li pêşiya te dişînim ku te di rê de biparêze û te bîne wî cihê ku min amade kiriye. Li ber wî miqate be û guh bide dengê wî. Li dijî wî serhildêr nebe; ew serhildana te nabexişîne, çimkî navê min di wî de ye. ^b Lê heke tu bi rastî guh bidî dengê wî û her tiştê ku ez dibêjim bikî, ezê bibim dijminê dijminên te û dijberê neyarên te. Milyaketê min wê berî te biçe û te bigihîne nav Amoriyan, Hîtîtiyan, Perîzziyan, Kenaniyan, Hîwiyan û Yevûsiyan û ezê wan qir bikim. Li ber îlahên wan neçe ser çokan, xulamiya wan neke û li pey adetên wan neçe. Wan bi tevahî hilweşîne û kevirbelên wan perçe perçe bike. Hûnê xulamiya Bavê xwe bikin û ewê nan û ava we bi bereket bike; ezê nexweşiyê ji nav we rakim. Li welatê te wê tu jin zarokê xwe neavêje û kordunde nebe; ezê rojên te temam bikim. Ezê tirsa xwe li pêşiya te bişînim, her miletê ku tu rastî wî bêyî tevlihev bikim û bikim ku hemû dijminên te pişta xwe bidin te. Ezê mozebeşan li pêşiya te bişînim ku Hîwî, Kenanî û Hîtiyan ji ber te biqewitînin. ^c Ezê wan di salekê de ji ber te neqewitînim, yan na wê welat wêran bibe û heywanên çolê li dijî te pir bibin. Ezê wan hêdî hêdî ji ber te biqewitînim, heta ku tu pir bibî û bibî xwediyê welêt. Ezê sînorê te ji Deryaya Sor heta Deryaya Filîstiyan û ji çolê heta Çem deynim; çimkî ezê şêniyên welêt bidim destê te û tê wan ji ber xwe biqewitînî. ^d Bi wan û bi îlahên wan re peymanê çêneke. Bila ew li welatê te nemînin, yan na ewê bikin ku tu li dijî min guneh bikî. Heke tu xulamiya îlahên wan bikî, ev bê guman wê ji bo te bibe dafik.”