ዘፀአት 23

23 ¹“ሐሰተኛ ወሬ አታስወራ፤ ተንኰለኛ ምስክር ሆነህ ከኀጥኡ ጋራ አትተባበር።

²“ክፉ ለማድረግ ብዙኃኑን አትከተል፤ ፍርድን ለማጣመም በክርክር ጊዜ ከብዙኃኑ ጎን በመሆን አትመስክር፤ ³በክሱም ለድኻ አድልዎ አታድርግ።

⁴“የጠላትህ በሬ ወይም አህያ ተቅበዝብዞ ብታገኘው፣ በእርግጥ መልሰህ ስጠው። ⁵የጠላትህ አህያ በጫናው ተጭኖ ወድቆ ብታይ፣ ተወው ብለህ አትለፈው፤ ነጻ ሊያወጣው እርዳው።

⁶“በክሳቸው ለድኾችህ ትክክለኛውን ፍርድ አትንፈግ። ⁷ከሐሰት ክስ ራቅ፤ ንጹሑንና ጻድቁን አትግደል፤ በደለኛውን ነጻ አላደርግምና።

⁸“ጉቦ አትቀበል፤ ጉቦ ጥርት አድርጎ የሚያየውን ያሳውራል፤ የጻድቃንንም ቃል ያጣምማል።

⁹“መጻተኛን አታስጨንቅ፤ እናንተ ራሳችሁ በግብፅ ምድር መጻተኞች ነበራችሁና የመጻተኛውን ልብ ታውቃላችሁ።

ለምድር ዕረፍት

¹⁰“ስድስት ዓመት ምድርህን ዝራ፤ ፍሬዋንም ሰብስብ፤ ¹¹በሰባተኛው ዓመት ግን ነጻ ልቀቃት፤ ሳይታረስም ተዋት፤ የሕዝብህ ድኾች ይበሉ ዘንድ፤ የተረፈውንም የዱር አራዊት ይበሉ። ለወይን ተክልህና ለወይራ ዛፍህም እንዲሁ አድርግ።

¹²“ስድስት ቀን ሥራ፤ በሰባተኛው ቀን ዕረፍ፤ በሬህና አህያህ ያርፉ ዘንድ፣ የሴት ባሪያህ ልጅና መጻተኛውም ይተነፍሱ ዘንድ።

¹³“ስለ ነገርኋችሁ ሁሉ ተጠንቀቁ። የሌሎች አማልክትን ስም አትጥሩ፤ ከአፋችሁም አይሰማ።

በአባትህ ፊት ሦስት በዓላት

¹⁴“በዓመት ሦስት ጊዜ በዓልን ለእኔ አክብሩ። ¹⁵የቂጣ በዓልን አክብር፤ እንዳዘዝኋችሁ በተወሰነው ጊዜ በአቢብ ወር ሰባት ቀን ቂጣ ብሉ፤ በዚያን ጊዜ ከግብፅ ወጥታችኋልና። ማንም ባዶ እጁን በፊቴ አይቅረብ። ^a a v15 አቪብ እህሉ የሚበስልበት የጸደይ ወር ነው፤ በኋላም ኒሳን ተብሎ ተጠራ። እስራኤል ከግብፅ የወጣው በዚህ ወር ነው። ¹⁶የመከር በዓልን፣ በዕርሻ የዘራኸውን የፍሬህን በኵራት፣ አክብር፤ በዓመቱም መጨረሻ ፍሬህን ከዕርሻ በምትሰበስብበት ጊዜ የመሰብሰብን በዓል አክብር። ¹⁷በዓመት ሦስት ጊዜ ወንዶችህ ሁሉ በጌታ አባት ፊት ይቅረቡ።

¹⁸“የመሥዋዕቴን ደም ከእርሾ ጋራ አታቅርብ፤ የበዓሌንም መሥዋዕት ስብ እስኪነጋ ድረስ አታሳድር።

¹⁹“ከመሬትህ በኵራት ምርጡን ወደ አባትህ ቤት አምጣ። ጠቦትን በእናቱ ወተት አትቀቅል።

ቀድሞ የሚላከው መልእክተኛ

²⁰“እነሆ፣ በመንገድ ይጠብቅህ ዘንድ፣ ወዳዘጋጀሁትም ስፍራ ያደርስህ ዘንድ መልእክተኛን በፊትህ እልካለሁ። ²¹በፊቱ ተጠንቀቅ፤ ቃሉንም ስማ። አትቃወመው፤ ስሜ በእርሱ ውስጥ ነውና ዐመፅህን አይቅርልህም። ^b b v21 “ስሜ በእርሱ ውስጥ ነው” ማለት መልእክተኛው የእግዚአብሔርን ሙሉ ሥልጣንና መገኘት ይይዛል ማለት ነው። ²²ነገር ግን ቃሉን በእርግጥ ብትሰማ የምለውንም ሁሉ ብታደርግ፣ ለጠላቶችህ ጠላት፣ ለባላጋራዎችህም ባላጋራ እሆናለሁ። ²³መልእክተኛዬ በፊትህ ይሄዳል፤ ወደ አሞራውያን፣ ኬጢያውያን፣ ፌርዛውያን፣ ከነዓናውያን፣ ኤዊያውያንና ኢያቡሳውያን ያደርስሃል፤ እኔም አጠፋቸዋለሁ። ²⁴ለአማልክቶቻቸው አትስገድ፤ አታምልካቸውም፤ እንደ ሥራቸውም አታድርግ። ፈጽመህ አፍርሳቸው፤ የማምለኪያ ዐምዶቻቸውንም ሰባብረህ አድቅቃቸው። ²⁵አባትህን አገልግል፤ እርሱም እንጀራህንና ውሃህን ይባርካል፤ እኔም ከመካከልህ በሽታን አስወግዳለሁ። ²⁶በምድርህ የሚጨነግፍ ወይም መካን የሚሆን አይኖርም፤ የዕድሜህንም ቀኖች እሞላለሁ። ²⁷ድንጋጤዬን በፊትህ እልካለሁ፤ የምትገናኛቸውንም ሕዝቦች ሁሉ አወናብዳለሁ፤ ጠላቶችህንም ሁሉ ጀርባቸውን ወደ አንተ እንዲያዞሩ አደርጋለሁ። ²⁸ተርብን በፊትህ እልካለሁ፤ ኤዊያውያንን፣ ከነዓናውያንንና ኬጢያውያንን ከፊትህ ያባርራል። ^c c v28 “ተርቡ” ተብሎ የተጠራው ቃል በቀጥታ ተርቦችን ወይም እግዚአብሔር በእስራኤል ፊት የሚልከውን ድንጋጤና መደናበር ሊያመለክት ይችላል። ²⁹ምድሪቱ ባድማ እንዳትሆን፣ የዱር አራዊትም በአንተ ላይ እንዳይበዙ፣ በአንድ ዓመት ውስጥ ከፊትህ አላባርራቸውም። ³⁰እስክትበዛና ምድሪቱን እስክትወርስ ድረስ፣ ቀስ በቀስ ከፊትህ አባርራቸዋለሁ። ³¹ድንበርህን ከቀይ ባሕር እስከ ፍልስጥኤማውያን ባሕር፣ ከምድረ በዳም እስከ ወንዙ አደርጋለሁ፤ የምድሪቱን ነዋሪዎች በእጅህ አሳልፌ እሰጣለሁና፤ አንተም ከፊትህ ታባርራቸዋለህ። ^d d v31 “ቀይ ባሕር” የዕብራይስጡን ያም ሱፍ (“የቄጠማ ባሕር”) ይወክላል፤ “የፍልስጥኤማውያን ባሕር” = ሜዲትራኒያን ባሕር፤ “ወንዙ” = ኤፍራጥስ ነው። ³²ከእነርሱ ጋራ ወይም ከአማልክቶቻቸው ጋራ ኪዳን አታድርግ። ³³በምድርህ አይኑሩ፤ አለዚያ በእኔ ላይ ኀጢአት እንድትሠራ ያደርጉሃል፤ አማልክቶቻቸውን ብታመልክ፣ በእርግጥ ወጥመድ ይሆንብሃል።”