ዘፀአት 24

24 ¹ሙሴንም እንዲህ አለው፤ “አንተና አሮን፣ ናዳብና አብዩድ፣ ከእስራኤልም ሽማግሌዎች ሰባ ወደ እኔ ውጡ፤ በሩቅ ሆናችሁም ስገዱ። ²ወደ እኔ የሚቀርበው ሙሴ ብቻ ነው፤ ሌሎቹ ግን አይቅረቡ፤ ሕዝቡም ከእርሱ ጋራ አይውጡ።”

³ሙሴም መጥቶ የአባታችንን ቃላት ሁሉና ሥርዐቱን ሁሉ ለሕዝቡ ነገረ። ሕዝቡም ሁሉ በአንድ ድምፅ፣ “አባታችን የተናገረውን ሁሉ እናደርጋለን” ብለው መለሱ።

⁴ሙሴም የአባታችንን ቃላት ሁሉ ጻፈ፤ በማለዳም ተነሥቶ በተራራው ግርጌ መሠዊያ ሠራ፤ ለእስራኤልም ዐሥራ ሁለት ነገዶች ዐሥራ ሁለት ዐምዶችን አቆመ። ⁵ከእስራኤልም ጎልማሶችን ላከ፤ እነርሱም የሚቃጠል መሥዋዕት አቀረቡ፤ ለአባታችንም የሰላም መሥዋዕት አድርገው በሬዎችን ሠዉ። ⁶ሙሴም ከደሙ እኩሌታውን ወስዶ በሳሕኖች ውስጥ አኖረ፤ ቀሪውን እኩሌታ ግን በመሠዊያው ላይ ረጨ። ⁷ከዚያም የኪዳኑን መጽሐፍ ወስዶ ለሕዝቡ ጮኾ አነበበ። እነርሱም፣ “አባታችን የተናገረውን ሁሉ እናደርጋለን፤ እንታዘዛለንም” አሉ።

⁸ሙሴም ደሙን ወስዶ በሕዝቡ ላይ ረጨ፤ እንዲህም አለ፤ “እነሆ፣ አባታችን በእነዚህ ቃላት ሁሉ መሠረት ከእናንተ ጋራ ያደረገው የኪዳን ደም ይህ ነው።” ^a a v8 ደሙ በሕዝቡና በአባታችን መካከል ያለውን ኪዳን አተመ፤ ኢየሱስም በጽዋው ላይ እነዚህኑ ቃላት አንሥቶ “ይህ የኪዳን ደሜ ነው” አለ፤ እንዲህም የገዛ ደሙን ወደ ቤት የሚመልሰን የአዲሱ ኪዳን ማኅተም አደረገ።

⁹ከዚያም ሙሴና አሮን፣ ናዳብና አብዩድ፣ ከእስራኤልም ሽማግሌዎች ሰባ ወጡ። ¹⁰የእስራኤልንም አባት አዩ፤ ከእግሮቹም በታች እንደ ሰንፔር ድንጋይ ንጣፍ የሆነ፣ እንደ ሰማዩ ራሱ ጥሩ የሆነ ነገር ነበረ። ¹¹በእስራኤልም መሪዎች ላይ እጁን አልጫነም፤ አባታችንንም አዩ፤ በሉም፤ ጠጡም።

¹²አባታችንም ሙሴን እንዲህ አለው፤ “ወደ ተራራው ወደ እኔ ውጣ፤ በዚያም ቈይ፤ እነርሱን ለማስተማር የጻፍሁትን ሕግና ትእዛዝ ያለባቸውን የድንጋይ ጽላቶች እሰጥሃለሁ።”

¹³ሙሴም ከረዳቱ ከኢያሱ ጋራ ተነሥቶ ወጣ፤ ሙሴም ወደ አባታችን ተራራ ወጣ። ¹⁴ሽማግሌዎቹንም እንዲህ አላቸው፤ “ወደ እናንተ እስክንመለስ ድረስ እዚህ ጠብቁን። አሮንና ሆር ከእናንተ ጋራ ናቸው፤ ክርክር ያለው ሁሉ ወደ እነርሱ ይሂድ።”

¹⁵ሙሴም ወደ ተራራው በወጣ ጊዜ ደመናው ተራራውን ሸፈነው፤ ¹⁶የአባታችንም ክብር በሲና ተራራ ላይ ዐረፈ፤ ደመናውም ለስድስት ቀን ሸፈነው፤ በሰባተኛውም ቀን ከደመናው ውስጥ ሆኖ ሙሴን ጠራው። ¹⁷ለእስራኤል ልጆችም የአባታችን ክብር በተራራው ጫፍ ላይ እንደሚበላ እሳት ሆኖ ታያቸው። ¹⁸ሙሴም ወደ ደመናው ገብቶ ተራራውን ወጣ፤ ሙሴም በተራራው ላይ አርባ ቀንና አርባ ሌሊት ቈየ።